請先讓乘客落車 please let passengers alight first!(至第廿六章): 第廿五章
「請先讓乘客落車 please let passengers alight first! 」（第廿五章）
「你到左喇! 你終於到左喇….! 」憑把聲聽落應該係中年男人。但當佢轉身對住我果時，點解我好似喺邊度見過佢咁嘅?
************************************
「你係...？」依把聲好熟悉，個樣都認都下，但就硬係講唔出佢係邊個。
「我係依度嘅主管。」
「主管？依度係...」其實我入到黎都未知依度係邊度，淨係知依度係「總
部」。
「哦..依度係NSC。」
「NSC?」我問。
「哦...即係National Security Centre! 國家安全中心。你同1366 都係依度嘅特
工。」
「係喎，Benny佢點呀？」頭先佢俾人帶左去左方走廊，冇人講佢去左邊。
「佢去左我地嘅手術室，唔洗擔心！」
「咁教授去另一邊走廊係去...？」
「佢應該去左佢自己個LAB度。」
教授竟然喺依度都有佢自己嘅實驗室！？
「係喇，你頭先話我終於到左，到底係咩意思呢？」
果位主管企左喺身，雙手插袋，然後慢慢咁由佢果位行出黎。
依個主管間房同出面好唔同，依間房好古典，張枱係紅柚木，房嘅左右兩邊都係高到上天花板嘅書架，書架上全部都係一本本睇落好舊嘅書。張枱前面訓住一幅圓形地毯，係好英式果種皇室圖案。房中央吊住一盞十九世紀嘅燈，暖黃色嘅燈光令成間房嘅古典味更濃烈。
「你叫琛仔，我仲記得你離開果日係動漫展，但係你竟然唔知！ 哈哈！ 但係，
果日之後我就冇見過你。哈，估唔到三十年後嘅今日會喺依度見返你。」
動漫展？三十年前？
究竟佢係邊個？
咦？ 咪住先！ 佢話三十年前？ 而家2046年，咁...咁三十年前咪即係...2016
年？？
2016年動漫展？？
吓？ ....唔係掛...
明仔...？
「你係...明仔...？」
「點呀？ 我都仲keep到呀？！」 佢笑住口灘開雙手，然後唉喺佢自己張木枱
度。
「真係你？」我仲抱有少少懷疑，我冇預到竟然會喺2046年見返佢。
「我地以前返地鐵果時，日日開工前你都係咬住個包嘅，我地仲會同除哥吹完
水先落月台....。」佢竟然up得出我做波板糖人果時d習慣。
「哈哈，教授真係犀利，你睇下我，白頭髮都生哂出黎，你仲個樣都完全冇變
過...」
佢指一指自己個頭。
如果佢真係明仔，咁即係佢應該已經五十三歲。
「ER...明仔....咁點解你會做左依度嘅主管嘅？」其實叫佢明仔好似怪怪地咁。
「哈哈...咁真係要由三十年前講起...」明仔行返埋佢自己個位度，坐返底，然後
繼續講...
「我仲記得動漫展果日，除哥叫我俾個電話你，之後你就衝左走第一卡，有個
女仔喺後面跟住你。之後我就留左喺月台繼續睇住d客，嘩琛仔你都唔知呀d客
牙幾鬼惡呀，果果係咁話要上車喎，但係度車門又死都唔開喎，跟住大概同d客
頂左幾分鐘左右，唔知點解，個頭突然好暈，我依稀記得月台嘅人個個都好似
企唔穩咁。跟住我就真係暈左喇....」
「哦....咁你記唔記得你暈左幾耐呀？」
「唔...唔記得喇，不過我記得我起身嘅時候我係喺車站控制室入面！」
「吓？ 車站控制室？點解嘅？」我問明仔。
「呢層我都唔清楚，我喺控制室醒返之後，喺閉路電視入面見到d人都慢慢起返
身。」
「咁之後點呀？」
「之後...之後我咪即刻落返去月台睇下咩情況囉。點知，又好似回復正常咁
喎，d人照當冇事發生咁再繼續上車落車。但我覺得件事好奇怪，d人好似唔知
發生過咩事咁。跟住我周圍諗住搵你都搵唔到喇...」
「咁...你之後有冇見到果個女仔...？」
「你講果個女仔，即係白色背心，揹住黑色書包果個....？」明仔居然仲記得！
「係呀係呀！ 」
「我冇呀! 佢唔係同你一齊嘅咩？」明仔問返我。
我掃一掃我腦後嘅頭髮，然後話：「本來係嘅，但因為我要追班黑頭盔人..」
「你指HARMY叛軍？」
「嗯！ 咁我咪諗住叫佢留返喺安全嘅地方避一避先囉，我都冇估到之後就同教
授嚟左2046年，之後就冇見返佢....」
我個心喺度諗，唔知阿雪而家點呢？仲有阿飛，佢地有冇被發現呢？
「哦...其實依個女仔...」
「係教授個女吖嘛，我知道。佢返去2016年其實係想搵我幫佢救返佢媽咪。」
「你做到吖琛仔，如果唔係你，特工1366同教授已經俾叛軍捉左！」
「但係...我可以點搵返阿雪呢?」
而明仔冇答我，只係對住我微笑…
其實自從喺2016年見到阿雪之後，唔知點解，我一直都忘記唔到佢，到我見到
同佢嘅合照，我開始相信我係一早就已經認識阿雪…無論點都好，我都要搵返佢!
「咯咯咯…!」突然有人喺出面敲門。
第廿五章 完。待續...
*********************************************************************
如想知道最新故事發展或對故事有任何提問, 可以輕輕like下 小弟 Facebook page 同留言~
Facebook:https://www.facebook.com/peoplelaughmetoocrazy/
同步連載:
紙言：http://bit.ly/2b1ZCRp
Discuss: http://bit.ly/2bLNrYy
Penana: http://bit.ly/2bX5tay