【第三章 2056】
 
2056年7月6日
 
一個年輕貌美嘅女子行出電梯,行到走廊中間一度玻璃門前,輕輕敲一敲門。
 
「Come in.」
 
房內傳出一名成年男性嘅聲音。女子應聲進入房間。
 


「係你呀,Angela。」
 
「林博士,我有啲嘢想同你講。」
 
「講。」
 
一個著住格仔西裝褸,戴眼鏡嘅中年男人一邊睇緊文件,一邊打字,又一邊回答女子。佢就係科學家林天澤,八年前發明穿越時空「技術」嘅林天澤。
 
「Mr. F佢…派咗人去四十年前…想改變歷史。」
 


「Mr. F?你講緊范子軒?國父范子軒?」
 
「係。佢喺八年前知道你成功發明咗『技術』之後,就退出咗政壇。據聞佢之後致力於訓練特務,聽講佢幾個月前,仲得到咗『技術』。」
 
「吓?佢…得到咗『技術』?!點攞到架?」
 
「佢係全國首富,一定有途徑嘅。」
 
「佢想改變歷史?」
 


「係,佢應該係妒忌你發明咗『技術』,所以…」
 
「嗰個范子軒,幾十歲人都仲係咁?明明自己已經做咗全國首富,仲要搞事。」
 
「佢嘅目標應該係四十年前嘅你。你打算點樣做?」
 
「我再睇下先。我對自己有信心,16歲嘅我一定有辦法應對,再者…佢都影響唔到呢個世界。Angela,你出返去先,我再諗下。」
 
「係嘅。」
 
房內又剩下林天澤一個。
 
「范子軒…中學時代已經係煩膠一個,以為佢大個咗就會成熟,點知…」
 
林天澤開始回想過去。


 
2029年1月1日
 
「…民國118年剛剛到來,總統在昨晚的除夕晚會致詞,並邀請中華新黨領袖范子軒共同慶祝除夕。總統在致詞中提到,臺灣政府會盡力協助中華新黨,共同為建立自由、民主的中國而努力。接下來下一則新聞,香港總統…」
 
林天澤坐喺梳化上睇住電視。
 
「好嘢!估唔到范子軒咁犀利,哈哈。」
 
呢個時候,林天澤身邊嘅iPhone α8響起。
 
「喂?」
 
「喂,林天澤。」
 


「你係范子軒?」
 
「係呀,我打嚟係想同你講,我已經做咗成功人士喇!哈哈!你呢?仲教緊書咋?加油啦你,而家你等睇我做新中國嘅國父啦!哈哈哈…」
 
林天澤都未嚟得切回應,范子軒已經收咗線。林天澤只好會心一笑。
 
「呢個仆街,講嘢仲係咁難聽。」
 
2056年7月6日
 
「叮!」
 
一下清脆嘅聲音,叫醒咗回憶中嘅林天澤。
 
「咦?有視像通話來電?」


 
林天澤戴上手套,喺空氣中劃咗幾下,一個投射畫面就喺空中出現咗。
 
畫面中嘅係一個戴住白色面具嘅男人,面具上面印住一個黑色嘅英文字母F。個F字好大,幾乎佔滿咗整塊面具。
 
「好耐冇見,林天澤。」
 
一把熟悉嘅聲音傳入林天澤嘅耳中。
 
「范…」
 
「叫我Mr. F。」
 
「阿F先生,你想點呀?」
 


「哼,我已經派咗人去四十年前,你好快就冇科學家做喇!哈哈哈!」
 
「冇用架,你咁樣改變歷史係唔會影響到呢個世界…」
 
「你講咩都冇用架喇,米已成炊!」
 
「唉…」
 
呢個時候,林天澤聽到電話另一邊有個女人嘅講嘢聲。
 
「Mr. F,馬泰佢返咗嚟…」
 
之後佢又睇到「F先生」十分緊張,仲企咗起身。
 
「咩話?!同我叫佢過嚟見我!」
 
之後見到畫面中嘅F先生好似撳咗一個掣,畫面就消失咗。
 
林天澤一開始都唔清楚發生緊咩事。佢只知道…未來即將發生大事。
 
待續…