【第四章 精英特務?】
 
2016年7月20日
 
「乜又係你呀西裝友?」
 
「林博士,你好。今次我一定要完成任務。」
 
「你又嚟。我都話咗唔得架啦,你仲嚟!」
 


「Mr. F唔俾我返去呀林博士…求下你啦,你俾我洗咗腦就得架喇。」
 
「你都痴撚線。唔俾呀。你咁做係唔會影響到你個未來架,你剩係會影響到我個未來架咋。」
 
「咩呀…你嘅未來同我嘅未來咪一樣,點會分啲咩我未來同你未來呀?」
 
「平行宇…」
 
「唔好講咁多喇,你快啲俾我洗你腦好過啦!」
 


馬泰一邊講,一邊喺褲袋攞咗支筆出嚟。
 
「呢支係根據電影Men In Black整出嚟嘅失憶筆,只要俾佢入面嘅燈照到眼,就可以令你失憶!哈哈哈哈!」
 
「痴線…」
 
我趁馬泰唔為意,調頭走咗。
 
「喂喂喂!林博士!你俾我完成任務啦,好冇?」
 


馬泰即刻追上咗我。
 
「你都傻嘅。」
 
我越行越快,馬泰就跟住我越行越快,呢個時候機會嚟喇!
 
咁都俾我見到!馬泰前面有篤狗屎!只要佢再行多兩步,就會踩中狗屎!我一定要利用呢個機會嚟撇甩佢!
 
「阿澤!」
 
竟然係渣緊車嘅李sir呀!點解我可以咁好彩架?我一定要把握好呢個機會!
 
「李sir!方唔方便車我一程?」
 
「冇問題!你上咗車先!呢度唔俾停車。」


 
於是我用九秒九嘅速度上咗車,馬泰發現我上咗車,仲跑咗幾步,不出我所料!佢真係踩中咗篤屎!
 
「喂!你踩屎呀!」
 
我將個頭伸出車窗,向住馬泰大叫。見到佢個騰雞樣,真係舒服哂!
 
「你同邊個講嘢呀?」
 
「冇嘢呀。」
 
「係喇,你想去邊呀?」
 
「我有啲急事要返屋企,唔該車我返屋企吖?」
 


「冇問題!」
 
因為李sir成日同我哋成班同學一齊出街玩咁,佢又好好人,車埋我哋返屋企,所以李sir就知道哂我哋屋企喺邊度。
 
2016年7月24日
 
經過上次之後又過咗幾日,今日佢竟然又出現。
 
我啱啱食完早餐,佢就企咗喺餐廳出面。但係佢今日冇著西裝,反而著住背心,短褲,涼鞋,當然仲有黑超。
 
「哈哈哈!你果然會再嚟呢間餐廳食嘢!不枉我連續幾日都喺呢度等你!」
 
「你真係精英特務?咁樣等我都得…咦?你今日冇著西裝嘅?」
 
「著西裝實在太引人注目喇。經過我嘅調查,呢套係2016年夏季最多人著嘅服裝,我已經完美融入咗2016年嘅生活喇!哈哈哈哈!」


 
趁佢喺度FF緊,就梗係要即刻調頭走啦。
 
「咪住!我今日準備充足!一定完成到任務!」
 
「好,我今日就俾次機會你!」
 
「好!」佢伸咗隻手入褲袋。「咦…我支筆呢?」
 
佢開始驚,係咁上下摸自己個身。
 
「我果然冇估錯。你因為太著重於件衫而冇帶支筆出嚟。」
 
「冇可能嘅!我明明…」
 


「算數啦你,精英特務。」
 
之後我就好撚型咁轉身走咗。
 
喺嗰次之後,馬泰每過一兩個禮拜都會嚟搵我。
 
但係佢次次唔係俾我搶到佢支筆,就係佢支筆冇電。總之呢,就冇次得嘅。
如是者…暑假過去了。
 
2016年9月1日
 
「你又想點呀...咪阻住我返學呀!」
 
「Sorry呀,林博士,但係我哋必須解決你。」
 
「我講咗幾多次,你咁樣做冇用㗎,你係冇可能完成到任務!」
 
「雖然我已經失敗咗咁多次,但係我都唔會放棄。」
 
「但係我今日要返學呀。精英。」
 
「咁…等你放學先啦!」
 
真係「精英」,咁易就俾我返學。
 
「OK,夠鐘落堂。Good bye class.」
 
「Good bye and thank you sir.」
 
「喂,一陣去食下午茶吖?」阿莫一邊執書包一邊向我講
 
「好呀。」
 
阿莫同我行到學校門口,我就見到馬泰企咗喺對面行人路。
 
「唉…」
 
「喂!林博士!」
 
佢離遠就叫住我。
 
「佢咪嗰陣個西裝友?」
 
「係…」
 
「我今日一定會成功!」
 
佢衝咗出馬路,諗住過嚟搵我。但係竟然有架車衝咗出嚟!
 
砰!!!!
 
馬泰就咁俾架車撞到!
 
待續…