二零五六: 【第九章 二零零六】

【第九章 二零零六】
 
「嗱，我唔知你知道啲咩，唔知道啲咩，總之我會將成件事講一次，明白？有嘢唔明，即刻問，因為我哋時間無多。」
 
「OK。」
 
「首先，我要由2034年講起。2034年7月，我發現咗穿越時空嘅方法，之後我同幾個學生、教授等等組成咗一個team，開始研究。到咗2048年，我哋成功咗將物件傳送到唔同時空，於是就即刻對外公布。」
 
「我想問呢…穿越時空係會影響自身時間線定係會分裂出平行宇宙？」
 




「我做過實驗，係唔會影響到自身世界。而經過我嘅猜測，我哋所存在嘅呢個世界嘅未來，已經同我個世界嘅未來唔同。」
 
「OK…」
 
「咁我繼續講，雖然唔會影響到自身世界，不過我當時都向政府請求，希望將技術保密，唔好進入民間，費事落入不法之徒嘅手中。之後嗰幾年，我都一直不停做研究，直至2056年…」
 
「2056年有人嚟過呢度…」
 
「嗯，佢係F嘅手下，F係想解決我嘅人。」
 




「佢係咩人…？」
 
「全國首富同埋新中國國父。」
 
「吓？一個咁嘅成功人士竟然會…」
 
「因為…佢係范子軒。」
 
「范…范子軒…」
 




「係呀，佢改名叫Mr. F，就係為咗唔好俾世人知道堂堂國父，竟然要去殺一個人。」
 
「佢真係咁憎我咩…」
 
「世人讚美欣賞佢嘅時代已經完結，再加上我發明咗技術之後聲名大噪，所以佢妒忌我嘅成功…」
 
「咁…你會親自嚟到2016年，我諗…事態真係好嚴重啦？」
 
「冇錯。我會嚟呢度…係因為范子軒計劃緊過嚟2016年。更加有可能係佢已經嚟咗。佢嘅到嚟，對你同我嘅生命都有好大威脅。」
 
「咁…我哋點算？」
 
「我會帶你去…2006年。」
 
「點解？」




 
「其實我都係是但揀架姐。呢個年份唔怕太遠，唔使換衫，你放低部電話喺度啦，去到2006年就唔啱用架喇。去到嗰度我哋再諗對策啦。」
 
「好。」
 
「而家我同你會去附近一間荒廢咗嘅學校遺址，我已經set好哂機器喺嗰度。」
 
「OK。」
 
之後我哋就即刻起程。
 
經過十五分鐘嘅步行之後，我哋嚟到咗呢間荒廢學校嘅門口。
 
喺我哋準備入去嘅時候，對面街有個不斷東張西望嘅人。
 




「佢係…！」
 
我眼見嗰個男人左望右望，之後仲望到過嚟我哋呢邊。佢望到過嚟我哋呢邊之後，即刻走咗上前面嘅天橋，想走過嚟。
 
「佢唔通就係…」
 
「係呀！佢係范子軒呀！快啲入去啦！」
 
見到未來林天澤呢個緊張樣，我心跳加速，咁大個仔第一次feel到自己要為咗保命而逃跑，於是我即刻轉身衝咗入間學校度。
 
喺嗰一刻，我個腦已經一片空白。
 
「上二樓，企入玻璃艙度禁紅色掣！」
 
聽到後面未來林天澤把聲，我個心都算安樂咗啲。




 
不過我仲要跑，跑上二樓。
 
跑咗上二樓，我已經見到有兩個大約兩米高嘅圓柱玻璃艙喺度，我即刻企入左邊嗰個艙度，聽未來林天澤講，禁紅色掣。
 
「傳送程序即將開始，十，九，八，七，六，五…」
 
我企喺艙入面，feel到一種緊張感，就好似去旅行要上飛機前嗰種又興奮又緊張嘅心情。
 
「…三，二…」
 
喺最後兩秒，我見到未來林天澤個樣好驚咁衝咗上嚟，跳咗入隔離嘅艙度。呢兩秒入面發生嘅嘢，就好似慢動作咁。
 
之後我又聽到一把聲。
 




「你個仆街林天澤…」
 
係未來范子軒呀！可惜，我啱啱見到佢個頭，眼前嘅畫面就轉咗去第二度。
 
「傳送成功，時間︰2006年10月3日下午12時40分。」
 
穿越時空成功喇，老實講，穿越時空嘅感覺真係好難講，就好似瞓咗一覺咁。
 
「我哋到咗…2006年喇！」
 
待續…