【第八章 林天澤與林天澤】
 
2016年10月3日
 
唉…都過咗成個月啦,仲係咩事都冇發生,唔知馬泰佢點呢…
 
佢老細放棄咗?定係另有計謀呢…媽呀,我好亂呀!
 
「喂,阿澤!」
 


一個帶眼鏡,身材矮小嘅同學行緊過嚟。
 
佢叫李諾彥,係學校足球隊成員,但係佢因為生得細粒,令佢成日俾人誤會,以為佢仲讀緊小學。但係亦都因為佢可愛嘅外表,而吸引到唔少女仔。
 
咁讀男校嘅我哋,梗係好羨慕佢啦,仲俾咗個花名佢叫「男神彥」添。
 
「咦,呢個咪男神彥?」
 
「咪玩啦澤哥,你讀書咁叻,大把女啦。」
 


「而家啲女邊鍾意我呢啲書蟲架,佢哋鍾意你呢啲運動型架咋。」
 
「唉,唔同你講呢樣住,今日阿莫生日呀,有咩搞作先?」
 
「我知,佢生日吖嘛,冇呀,咪又係放咗學就磨下柱咁。」
 
「吓?你同佢咁friend,都係得磨柱咋?」
 
「講笑咋,磨完柱,我哋成班人去請佢食嘢呀。」
 


「果然是澤哥,咁得啦,放學我join埋你哋。」
 
「冇問題。」
 
話咁快又放學,我哋磨完阿莫柱,就走咗去學校附近一間新開嘅韓式炸雞食嘢。
 
「莫哥生日快樂!!!」
 
我哋十幾個人,一齊大叫呢一句,真係好有團結嘅感覺。
 
「大家,多謝哂,我真係好撚感動。」
 
「屌,大家一場兄弟,講埋哂啲咁嘅嘢!」
 
我哋有講有笑,好快,嘢食就送到嚟。


 
「食嘢喇!」
 
正所謂「快樂嘅時間過得特別快,又係時候講bye bye」,兩個鐘嘅聚會,貶下眼就完咗。
 
大家都帶住滿足嘅心情返屋企,而我都好開心咁行緊返屋企,我心諗,有咗呢班兄弟,就算世界末日,都不足掛齒。
 
或者…呢個就係男校嘅魅力。
 
我行行下,突然喺前面兩三米嘅地方,個地下發哂光,一啲粉末開始喺光源飄咗出嚟,啲粉末仲慢慢咁組成咗一個人嘅形狀。
 
好彩嗰陣條街冇咩人,就算有一兩個人,佢哋都只係掛住捉電話入面嗰隻比卡超。
 
之後,地下唔再發光,一個中年男人喺我面前出現。
 


我眼前嘅男人,好熟面口,好似係喺邊度見過咁。
 
佢係…我!
 
「林天澤!」我同佢異口同聲講咗同一句嘢。
 
「果然個座標冇set錯!一出嚟就見到你!」
 
「你係…未來嘅我?」
 
「冇錯,我係林天澤,2056年嘅林天澤。」
 
我十分激動。
 
「我終於都見到你喇!我有好多嘢想問你呀!」


 
「我知,而家返屋企先,我慢慢解釋你聽。」
 
我同佢慢慢行返屋企,一路上我同佢冇咩點交流,剩係見到佢不斷周圍望,好似喺度懷緬過去。
 
話咁快我哋就返到屋企。
 
「呢度,就係四十年前嘅屋企!好懷念呀~」
 
「四十年後嘅屋企又變成點?」
 
「遲啲你就會搬走架喇。大概一年後左右啦。」
 
「吓?」
 


「係呀,乜你唔想住間大啲嘅屋咩?呢度咁細,多幾個同學上嚟都唔夠位啦。」
 
「咁又係…」
 
「呢幾十年世界都好大變化。」
 
「咁…大陸呢?有冇港獨同台獨?」
 
「你放心啦,慢慢中共就會衰退。」
 
「OMG…」
 
「哈哈,驚訝係正常嘅。」
 
「話時話,未來究竟發生緊咩事?」
 
「係喎,唔使急,我會慢慢同你一五一十講清楚。」
 
待續…