《新月派仙術奇譚》之《毒撚•女神•百鬼夜行》: 1. 女僕Cafe

「屌你老味⋯⋯死廢青⋯⋯累阿叔騰上騰落，陣間就拖埋暗角打𨳍你！」

晚上10點幾，波Sir在旺角的一棟舊樓裡，一路沿著狹窄的樓梯往上行，喘著氣一路係咁屌。

佢五十出頭，肥過林雪，只是走了三層樓梯就令佢滿頭大汗。佢正極不情願地帶著一隊便衣警察往上行。

「阿頭，仲有一層就到喇。」跟在後面的木仔見怪不怪地說。

終於到了四樓，一群軍裝警察在一家女僕Cafe門外守著，嚴陣以待。





波Sir問木仔：「屌你老味⋯⋯咩𨶙嘢女僕Cafe？有閪屌嘎？」

木仔木口木面地答他：「唔𨶙知啊，無幫襯過喔。」

「做咩𨶙嘢要開喺四樓啊？」

木仔繼續木口木面地答他：「唔𨶙知啊，無幫襯過喔。」木仔心想：「屌！地舖租貴呀嘛，死肥𨳊！」

一個軍裝警察走過來向波Sir匯報：「波Sir，清左場喇，依家店裡面剩番個條金毛MK西裝友揸住把老牛降住條女店員。其他店員話條友係熟客，懷疑係感情糾紛。」





木仔問：「check唔check到佢哋叫咩名？」

軍裝答：「阿俊同家琪。」

波Sir問：「條𨶙樣除左想屌閪之外仲有咩要求？」

軍裝答：「佢話要見警務處長喔。」

波Sir由怒氣沖沖變成忍俊不禁：「痴𨶙線！我都想見一哥搵佢加人工啊，屌你！木仔，call談判組嚟，呢條𨶙樣真係痴𨶙線嘎！」





木仔：「阿頭，我就係喇。剛剛入左談判組Team A，D個禮拜當更。前排你幫我簽recommendation㗎嘛。」

警察談判組屬於兼任職務，每兩星期輪值，24小時候命。投考加入警察談判組的人員必須擁有至少兩年年資，服務紀錄良好，思想成熟、頭腦冷靜、思緒敏銳、具有積極態度、自發性及無比耐性、具有高度團體精神。獲得所屬主管的推薦後，投考人會接受遴選。

波Sir：「哦，係咩⋯⋯咁快𨶙D開波啦！」

木仔：「其他談判組同事未到喔，我係新手⋯⋯」

「警務處長幾時嚟呀！！！」Cafe裡面傳來疑犯的嚎叫。

「鏘！」緊接打破玻璃的聲音，從Cafe來傳出陣陣天拿水的氣味⋯⋯

波Sir：「哇屌，叫消防快𨶙D嚟！木仔，咪𨳊等喇！我同你入去睇吓先！」

木仔跟軍裝說：「師兄，唔該搵到條MK嘅背景資料就交俾談判組嚟緊D同事。」





於是波Sir同木仔就小心翼翼地進入Cafe。

在Cafe中央那排卡位，那個金毛MK西裝友阿俊左手搭著身穿黑白女僕制服的家琪，右手拿著老牛。家琪閉上眼睛惶恐不安的哭泣，雙手緊握著手機。

目前情況簡直是一觸即發：檯面上放著一堆打火機，幾個石油氣罐放在卡位周圍，滿地都是天拿水⋯⋯

此刻，波Sir同木仔腦裡面都有同一個想法，就係：「爆起上嚟就冚家鏟一鍋熟喇！」

不過波Sir都係忍唔住在木仔耳邊讚嘆：「哇！條女真係得喔！」

木仔唔理波Sir，一於專心做嘢：「阿俊，我哋係談判專家，係嚟幫你嘅。」

阿俊激動地吼叫：「米叫我阿俊！」





「OK，咁點稱呼你好？」

「我要見警務處長！」

「點解要見一哥？我哋都可以幫你噶喔。」

「我要見一哥，我要告佢哋班仆街！」

「邊班仆街？你慢慢講清楚D，等我哋幫你吖？」

「唔知佢哋收埋左我喺邊度呀！」阿俊突然嚎哭起來。

這時，家琪的手機響起，阿俊一手把手機搶過來看，然後遞給家琪說：「叫佢過埋嚟呢度！」

於是家琪按他吩咐跟電話另一邊的人說：「阿強⋯⋯依家即刻⋯⋯即刻過嚟Cafe吖⋯⋯我好驚啊！係文仔啊！」





「啊！啊！啊！！！」

突然，阿俊瘋狂地吼叫，雙眼翻白，全身激烈地抖動，Cafe內的燈跟著不停地閃動！

正當木仔還未來得及反應時，波Sir已經奪門而出，向外面的警察大叫說：「喂！好鬼猛！Call九叔！」

「砰！」

Cafe的鐵閘忽然落下，攔阻波Sir的去路，嚇得他往後翻倒。木仔本來想扶他一把，卻被他拉著一起跌倒在滿佈天拿水的地上。

波Sir同木仔腦裡面又再次浮現同一個想法：「冚家鏟喇！」

「喵！」





一隻黑貓突然從窗外跳進來，機靈地避開地上的天拿水，站在卡位的前面，凝視著阿俊。他好像被這隻黑貓震攝住，漸漸平復下來，然而目光變得空洞⋯⋯

阿俊緩緩吐出一句：「米埋嚟，我捅死佢噶⋯⋯」同時把刀尖指向家琪。