木仔見形勢危急,硬著頭皮再度重返談判員的崗位:「你係愛佢嘎嘛,唔好嚇親佢,有事慢慢講啦。」

阿俊無奈地哭訴:「我D錢被佢哋呃晒喇,佢唔會鍾意我嘎喇!」

木仔乘勢望著家琪說:「家琪,你仲鍾意佢嘎嘛?係唔係呀?」

家琪慌張地點頭⋯⋯

波Sir同木仔腦裡面都有同一個想法,就係:「豬閪!交D戲啊!平時收兵又咁𨶙好戲!」





就在這拉鋸的關頭,黑貓偷偷地跳上了檯面,靜靜地伏下,像睡覺了一樣,隱約有一團綠光從黑貓身上跳進阿俊體內。之後,阿俊雙眼再次翻白,但這次跟之前不一樣,只是口裡傳出「依依呃呃」的聲音和留口水,身體不停的抖動。

波Sir吞啖口水,同木仔講:「木仔,最緊要定,陣間就算佢捅死條女,你老閪都米𨶙開槍呀。」

「知喇,我都唔想被石油氣罐爆菊花⋯⋯你話好唔好入廚房攞把刀劈𨳍佢呢?」

「無用㗎,呢D係鬼上身,你打瓜個人,隻鬼條番出嚟,隨時上你身,仲大𨶙鑊呀。等九叔過嚟搞啦。」

就是這樣,波Sir同木仔都不敢輕舉妄動,整個場面好像被凝結了一樣,一眨眼間就過了十幾分鐘。





「卡拉卡拉⋯⋯」

鐵閘緩緩捲起,一個大叔從半開的鐵閘鑽進來。

波Sir好像得到上帝打救一樣:「九哥!等你救命呀!咁𨶙耐至嚟嘎!」

九叔笑笑說:「屌!你都未死。」

木仔嚇了一跳,心想:「吓?真係差館飯堂嗰個九叔?唔𨶙係吖嘛?!仲以為咩嘢秘密武器。」





九叔個look又真係窄D,短袖恤衫、孖煙通加拖鞋;不過,斑白的頭髮和鬍鬚跟黝黑的膚色形成的反差又幾有味道。

九叔打量過環境,托一托厚厚的眼鏡,輕描淡寫地說:「肥波,你帶條女走,細路,你幫條金毛扣孖葉。」

波Sir對九叔的話深信不疑,很快就把家琪從阿俊手中奪過來,帶出了Cafe。

木仔見阿俊完全沒有反應,於是馬上放膽搶走他手中的老牛,一手掉到老遠,然後把他押在地上,雙手往後扳,扣上孖葉。

接著九叔坐在阿俊背上,剛才那團綠光就從阿俊身上回到了黑貓身上。

「喵!」黑貓醒來後好像向九叔抗議,不滿的尖叫,然後迅速從窗口逃出了Cafe外面。

阿俊也恢復了知覺,憤怒地咆吼:「放開我!」

九叔輕輕搭著阿俊的肩膀,親切地說:「兄弟,出番嚟啦,我幫你快D投胎,下世帶眼識人喇。」





阿俊堅決繼續掙扎:「唔得!我要報仇!」

「你整瓜呢條友,佢做鬼又搵番你報仇啫。」九叔望望窗外,接著說:「同埋頭先隻黑貓想搶走你個魂魄啊,唔好留係陽間喇。」

這時一㗎航拍機飛到窗前⋯⋯

阿俊聲嘶力竭地喊叫:「唔好影我呀!」

九叔問木仔:「㗎嘢你哋嘎?」

木仔答:「唔係喔。」

「呼呼呼⋯⋯」阿俊低頭不語,好像極度痛苦地嘀嘀咕咕。





木仔開始覺得唔對波路,他只見阿俊被扣著的右手用力握住左手手腕使勁的拉扯⋯⋯

「逼逼⋯⋯吧吧⋯⋯」

阿俊把自己整隻左手齊肩扯了下來!

那隻甩皮甩骨,有D似燒雞翼嘅斷臂,兜口兜面車埋木仔塊面度。雖然九叔和木仔本能地彈開了幾呎,飛淺出來熱騰騰的血漿和肉屑依然弄到他們全身血跡斑斑。

現在距離拉遠了,他們只可以眼巴巴看著伏在地上的阿俊從褲袋裡掏出打火機⋯⋯

「咔嚓⋯⋯呼⋯⋯砰!砰!砰!」