「吓?」

「部航拍機爆壞左啊,老總話無得陪就錢債肉償呀!」

「吓⋯⋯」木仔心想:「錢債肉償不如償俾我啦!」

「我依家決定唔靠報館,自己擺段片上網,實爆紅㗎,到時就有錢還俾你啦!不過,你哋捉到嗰個阿強未啊?」

「未捉到喔⋯⋯」





木仔心想這是機密啊!

「咁仲好,冤魂報料俾警察破案,正!我幫你手查吖,我OK㗎!隻鬼話去紋身舖找佢地晦氣,俾阿強打瓜左,即係兇案現場啦,嗱,我搵左全香港紋身舖嘅地址嘎喇。」她從背包裡拿出了一疊資料。

木仔心想:「唔通真係同家琪手臂上個紋身有關?可以同女神一齊查案,死就死啦!」

「女事主手臂上有個紋身,可能有關⋯⋯」

「係囉,一齊查啦!」





「OK吖。」

「咁依家去撳錢啦!」

「吓⋯⋯」

木仔在附近的提款機提款後,交給鯊魚時,她溫柔地說:「唔該晒你呀,你真係好人嘎啫!我哋聽日就開始查案啦,再電聯,拜拜!」

「我⋯⋯送⋯⋯送你返去吖⋯⋯」





「唔使喇,拜拜!」

木仔目送鯊魚於人潮裡消失,突然想到:「會唔會被條女搵左笨𨳍呢?如果呢一皮嘢收唔番嘅話,都幾肉痛,真係好似被鯊魚咬左啖。

帶著疲憊的身軀和迷惘的心情,木仔回家後第一時間躺在床上睡覺,迷迷糊糊當中,忽然覺得涼風陣陣⋯⋯

他睜眼一看,隱隱約約有一個妙齡少女坐在床頭⋯⋯確實是隱隱約約的,是一隻女鬼!

「哇,屌!」木仔慌忙起來,伸手去找伸縮警棍,同時仙氣凝聚,蓄勢待發!

「我無惡意㗎。」

木仔看清楚這隻女鬼,年齡大概只有十五六歲,眉目清秀,但是身型消瘦,我見猶憐。

「咁你喺我屋企做咩嘢呀?」





「我係不知不覺咁就跟左你嚟㗎,可能係因為嗰晚喺醫院我哋撞埋一齊之後,我有一部分魂魄留左喺你身上囉。」

「就係我跑去電梯大堂嗰陣?」

「係啊⋯⋯」

「咁你想點?」

「你唔使理我嘎,我諗,留喺度好過住醫院囉,我知你係好人嚟嘅。

「我唔係好人嚟嘅,我好咸濕嘎!」

「我知你唔係囉,我哋撞埋一齊嗰陣,我睇到晒你嘅內心同記憶囉。你叫木仔吖嘛,我叫阿四呀,三四五個四啊。」





「咁⋯⋯其實你有咩放唔低,要留係陽間呢?」

「我都唔知喔⋯⋯」

木仔心想:「唉,佢都幾似嗰D想自殺嘅無知少女喎,我入左談判組之後都無得發揮,不如依家對住佢實習吓啦。」

於是木仔放膽問阿四:「其實你點死㗎?」

「我十六歲生日嗰晚,同朋友開party,唔知點解突然暈左之後就醒唔番喇⋯⋯我有聽媽咪話無飲酒嘎!」

「即係你留係陽間係想搞清楚自己點死?」

「又唔係⋯⋯啊,你都係唔使理我啦⋯⋯你繼續訓啦!」

「你喺度望住我,我訓唔到囉⋯⋯」





「對唔住啊,我出大聽睇書吖,你D書同雜誌可以俾我睇嘎呵?你慢慢訓啦。」

木仔租住的是舊唐樓,面積不大,但實用率高,總算有房有廳。

「嗯。」

疲憊不堪的木仔只好無奈的接受。

第二天早上醒來,木仔出去客廳看看,阿四已經不在了,而本來凌亂不堪的客廳,現在變得整齊清潔。桌面有張紙條,上面寫著:「今晚見。阿四」

木仔想:「女神就無尾飛陀,攞完錢就閃,反而自己送上門隻女鬼,就咁有手尾,仲話今晚見,個天真係玩𨳊我囉⋯⋯」

回到警察局,木仔跟波Sir報告昨天儉房的事情,希望從他那邊多點了解九叔和Lily的瓜葛。至於跟鯊魚的合作,就絕口不提。





「屌你老味,唔𨶙係掛?成隊殭屍擒𨳊你?」

「堅㗎,本來我都以為自己返唔到出嚟㗎。好彩個女法醫知道我唔係九叔嘅徒弟,最後都放左我。佢哋兩師徒到底有咩仇呢?」

「𨶙知咩!嗱,我今晚約左九叔去大排檔食宵夜,多謝佢老人家幫左我哋手,一齊嚟啦,你條命係佢喺女僕Cafe救番出嚟嘅,你今晚敬多佢幾杯啦。」

「Yes Sir!」

木仔離開波Sir的房間後,本來他已經放棄了的鯊魚打過來了!

「木仔,我哋先從荃灣開始吖,嗰度有個紋身師傅叫紋身GiGi,係呢期最紅嘎,我轉頭send個地址俾你吖,三點見!」

「好呀,三點見!」

木仔想:「荃灣?巴基華佢哋問左電訊公司,個阿強個張飛機卡最後出現就係荃灣工廠區喔⋯⋯」

下午三點荃灣工廠區。

木仔跟鯊魚匯合後,第一站就去紋身GiGi在工厦內的紋身店。在電梯裡,木仔主動找些話題,他問鯊魚:「你⋯⋯有無紋身嘎?」

「梗係冇啦!我第日要做電視新聞主播嘎!」

「哦。」

「你都唔可以紋身啦,係唔咪?」

「係嘎。」

進了紋身店,出來招呼的是個身材瘦削的少女,染了一頭粉紅色的短髮,鼻子和耳朵穿了幾個環,身上穿著圍裙,帶著工作手套。

鯊魚說:「你好啊,我book左三點嘎,你就係紋身GiGi喇呵?」

「我係啊,你男朋友可以坐外面等吖。」

木仔聽到「男朋友」三個字,馬上滿臉通紅,不知所措⋯⋯

鯊魚說:「其實我哋係警察,想嚟收集資料嘎。」

木仔回過神來,把委任證拿出來給紋身GiGi。

紋身GiGi:「吓,咩資料啊?好驚喔。」

鯊魚說:「其實好簡單嘅,想問吓你有無一個叫家琪嘅客人,同埋呢個紋身係唔係你紋嘎?」木仔把家琪手臂上的紋身和她的照片給紋身GiGi看。

紋身GiGi看過後說:「唔識邊個家琪喔,呢個紋身咁肉酸,梗唔係我紋嘎啦!」

鯊魚說:「咁你估D英文字母代表乜嘢呢?」

紋身GiGi不耐煩地說:「鬼知咩,呢D嘢通常得個客人至知點解嘎喔。」

鯊魚說:「咁你識唔識呢個人?」木仔遞上阿俊的照片。

紋身GiGi說:「識佢老鼠,呢DMK仔,個個都差唔多樣嘎喔。

鯊魚說:「咁你識唔識阿文、阿俊同阿強呢?」

紋身GiGi忍俊不禁說:「喂,呢D名一條街搵到幾十個啦,你哋無其他問題就唔好阻住我做生意喇!」

於是木仔和鯊魚只好往名單上下一家紋身店繼續查問。

在紋身GiGi店裡,她把大門鎖上,然後走進側面的一個房間裡,向一個躺在床上的男人責罵:「你個仆街帶條女嚟紋完身就連我都溝埋,依家仲要我幫你執D蘇州屎⋯⋯」

「真抵碭⋯⋯」他指著監控鏡頭的屏幕說:「頭先你都幾好戲吖!」

「食屎啦你!」紋身GiGi嬌嗔地說。

「聽新聞講,個傻女真係傻左啦,仲呷醋⋯⋯」

說罷,那個男人站起來一手把紋身GiGi抱在懷裏。

他右手前臂的內側有一個紋身,圖案類似一根粉紅色舌頭,下面有兩個英文母‘TR’,‘TR’下面又有兩個英文字母‘LO’。

紋身GiGi把她的左手反過來與男人的右手拼在一起,合成了一個紅心,下面是「TRUE LOVE」。

這個壯實的男人就是木仔他們在尋找的阿強!