《新月派仙術奇譚》之《毒撚•女神•百鬼夜行》: 11. 3P

木仔和鯊魚離開了紋身GiGi的紋身店後，他們去了管理處找看更阿伯問話。

看更阿伯色迷迷地盯著鯊魚說：「啊喲，樓上又有劏房，又有迷你倉，由朝到晚咁多人出出入入，好似時鐘酒店咁⋯⋯邊認得邊個打邊個吖，D後生又唔同人打招呼嘅，𨶙知佢地叫乜名咩。」

鯊魚覺得被阿伯盯得渾身不自在，急急拉著木仔離開了。阿伯望著他們的背影喃喃自語：「唉，後生仔女，事不關己，己不勞心啊⋯⋯」

木仔與鯊魚按名單前往下一家紋身店繼續調查。在途中，鯊魚心有不甘地問木仔：「其實咁樣問佢哋會唔會好戇居啫？如果身有屎就梗係死都唔認嘎啦！」

木仔馬上一本正經地用專業的語氣說：「通常D疑犯身有屎既話，被我哋chok兩chok都會騰雞嘅，跟住就前言不對後語，我哋再追問佢地就投降招供嘎喇。同埋我哋喺現場有時都會發現一D蛛絲馬跡可能係破案關鍵嚟㗎。又有時，D證人唔會即時睬你，遲吓又返轉頭爆料嘎。當然，好多案件唔係一兩日就破案嘎，而係喺好多年後，探員鍥而不捨查落去至水落石出嘎。」





鯊魚無奈地回應：「係咩⋯⋯」

他們離開了工廠大厦一個小時後，阿強出去了一會，回來時推著手推車，上面疊著幾袋水泥。看更阿伯跟他打招呼說：「泥水強，上面又開多檔劏房，好生意啦！」

「OK啦。」

#####

從下午開始到傍晚，木仔和鯊魚去了幾家紋身店，同樣是一無所獲。鯊魚伸著懶腰說：「喲，好肚餓呀！我哋去食飯吖？」





「我哋？好呀！咁食咩呀？」這一刻，木仔的內心像是大地回春一樣⋯⋯

「不如麥記吖⋯⋯」

「麥記？好呀。」木仔心想：「肯食麥記？搵老婆就係呢D喇！」

「不過金朝至食過，食日本嘢啦！」

「哦，好呀。」





於是，木仔跟著鯊魚的帶領到了一家高檔日本餐廳。木仔尷尬地拿著menu翻來覆去，還沒有弄清楚點甚麼菜時，鯊魚開聲了：「嗯⋯⋯散叫貴好多㗎，嗌套餐啦⋯⋯呢個餐有鮑魚，有龍蝦，OK吖。」

「哦，好吖。」

在享用這一頓豐盛的晚餐的過程當中，雖然鯊魚花了不少時間忙於為食物拍照然後po上網，以及跟朋友用手機聊天，木仔並沒有介意，他還挺享受這種他從未有過的「拍拖」感覺。

「啊，你對女仔都幾好㗎喎⋯⋯」突然一把女聲在木仔耳邊傳來⋯⋯

是女鬼阿四！

木仔馬上倒抽一口涼氣，壓低聲音說：「喂，你嚟呢度搞咩呀！」

阿四楚楚可憐地說：「我見你八點都未返屋企，咪出嚟揾你囉，原來你拍拖！」

木仔：「唔係呀⋯⋯」





鯊魚隱約聽到木仔「自言自語」，一邊看手機，一邊問他：「咩話？」

木仔慌張回應：「哦額⋯⋯我想去廁所啫。」

阿四跟著木仔去廁所，依然故我說：「Sorry呀，其實你唔使理我㗎⋯⋯」

木仔也不搭理她，進了廁所就對著尿兜撒尿。可是，阿四還是喋喋不休：「你女朋友嘅意志力都幾強㗎喎，頭先我都上唔到佢身，如果唔係就可以同你二人世界囉⋯⋯」

木仔已經開始習慣自己被鬼魂騷擾，但是把鯊魚扯上他就怒不可遏了：「喂！你唔好搞佢呀！」

「Sorry囉⋯⋯」阿四帶著滿眶淚水慢慢消失於空氣當中⋯⋯

木仔回到座位時，原來鯊魚已經叫了埋單。他見她沒有異樣，也就沒有細看那張帳單，迅速地付錢了，反正他肯定這是他有生以來最貴的一頓飯。這時，他只想盡快送鯊魚離開，然後再看看如何應付阿四。





在餐廳外，鯊魚她溫柔地說：「多謝你呀，我哋聽日再繼續查案啦，再電聯，拜拜！」

「我送你返去吖⋯⋯」

「唔使喇，拜拜！」

木仔目送鯊魚離開時，他心想：「唉，本來同女神二人世界，變左3P，依家又剩番我一碌棍⋯⋯」

阿四的聲音又傳來了：「其實你哋都未係拍拖啫！」

被阿四這句話所刺激，木仔馬上把這次失敗的「約會」遷怒於她：「唔好跟住我呀！我依家去同九叔食宵夜啊，專捉鬼嗰個呀！」

「Sorry囉⋯⋯」阿四再次含淚慢慢消失於空氣當中⋯⋯

木仔心情稍微平復下來時，他打電話給波Sir，告訴他現在就過去大排檔：「波Sir，我電話就無電喇，陣間喺大排檔食住等啦。」





「屌！我到𨶙左喇，快𨳊D過嚟啊！」

#####

鯊魚在回宿舍的途中，收到紋身GiGi發來message說：「關於你哋問嘅嘢，我醒起D線索，有時間可以過嚟舖頭傾，依家都可以。」

鯊魚心想：「真係好似木仔咁講，遲吓又返轉頭爆料？好！」

於是她回了紋身GiGi：「好，現在過來。」

然後她就打給木仔，可是打了幾次他的手機都是關機狀態。她也顧不了那麼多，只好單刀赴會。

到了GiGi的紋身舖，鯊魚按了門鈴後，出來開門的是阿強，他說：「你就係Madam？GiGi沖緊涼喎，入嚟坐低等陣先啦。」





鯊魚面對這個陌生男人，直覺感到有點不對勁，她說：「咁佢沖完涼打俾我啦，我喺附近行吓先。」鯊魚說罷掉頭就走⋯⋯

說時遲，那時快，一隻強而有力的手臂包圍著鯊魚，另一隻手已經拿著一塊沾滿哥羅芳的布按著她的嘴吧⋯⋯

「嗯⋯⋯」鯊魚雙眼慢慢閉上⋯⋯