農曆七月限定短篇：陪我倒數: <七日之約> 上

阿嫂你好，我係阿權。

相信你睇到呢篇嘢嘅時候，我已經出發咗去搵Wilson。

以下嘅說話，我都唔知道應該點樣親口同你講，所以我唯有藉著呢個機會，寫底係呢度等你日後打開時會睇到。

其實係Wilson出走果晚，我已經有少少頭緒佢去咗邊，可惜我已經遲咗一步。係第二日，我去咗你地屋企附既小巴站頭度問，終於比我問到有人係車上執到佢部電話仲交低咗比司機。

好彩我講得出個電話號碼同我記得Wilson成日係我地面前慢慢解鎖果個圖案，所以站長先肯比部電話我。非常唔好意思，我頭先無同你講，因為部電話已經係我搵返Wilson既最大線索同希望。





今朝我交底比你既金剛杵吊墜，請你好好跟身，最少跟足四十九日，其它注意事項都已經同你講得好清楚，基本上同之前Wilson係日記寫既一樣，請好好留意。

你要知道今朝我見到你時發現你居然都有邪氣纏身時幾咁驚訝，好彩發現得早同對你影響甚微，否則發展到好似Wilson咁時，你就唔會同我親口講你尋晚睇到Wilson寫既日記時再次見到果張相。

我係睇晒所有日記之前已經封咗同刪除埋果張相，宜家希望張相無流出去外面啦。

講起張相，經我睇完晒Wilson既日期之後，我終於大約摸清楚成件事係點。

其實係初一果日，Wilson佢已經中招。





按時間睇，張相係踏入初一無耐，上小巴返屋企時影既。按我估計係佢一邊用電話一邊上時，唔小心揩到個掣影既。但係就係呢一下動作﹐引起咗果隻野既注意。

學我師父講，有時啲野係整定既。

月頭當時我同佢地一齊食飯，當晚已經覺得佢有啲唔妥。但當時我又功力唔夠，睇唔到有幾嚴重。但我之後已經第一時間比咗我之前係泰國求返黎果條佛珠比佢，仲教埋佢唸六字真言。

其實諗返當初寄佛珠比佢果時都覺得無咁簡單，起初快遞公司次次都漏派佢份件。我投訴過兩次後快遞公司比咗負責Wilson果區既派件員電話我，我係佢再派件果日同佢講住電話黎確認Wilson收到件。可能就係佢終於收到串佛珠，我一放心咗落黎之後又無深究件事。

當時我真係諗唔到隻野已經影響緊佢既行為，除非我一早睇到佢既日記，我宜家睇返件事先覺得自己真係太大意，以為自己識得少少野同幫緊佢，點知原來唔係…





由佢比隻野初初纏上時，本來影響唔算大，淨係留意到隻野吸取咗Wilson少少陽氣之後靈氣外洩，造成咗啲無關痛癢既「靈動」現象。好似我係你地屋企既廚房、廁所同房入面睇到既「靈動」痕跡，本來都無乜傷害性。但你放心，我已經幫你地消除晒﹐而無咗源頭之後都唔會再次出現。

雖然我一早知道Wilson唔信呢啲野，但又真係唔睇返都唔知道佢到十四都無戴過串佛珠同唸經。但宜家我終於知道真正原因：隻野係會影響比佢纏上果個人既心智。

初期仲係處於「纏上」呢個階段時候只會有淺層既影響，例如影響佢既決定之類。隻野一直放大佢既抗拒心理，去忽視同忘記會影響到隻野既一切，包括Wilson上車之後同隻野對上眼建立咗連繫果一剎那。

但係隨住Wilson既生活習慣：夜瞓、鐘意熄晒燈睇電視等，係七月期間加速聚陰同隻野對佢既影響。之後到十四果既佢果日都無戴串佛珠，當晚又係隻野陰氣最強之時，種種原因之下隻野已經唔係「纏上」咁簡單，而係發展到「入侵」既階段。「入侵」呢個情況本來就少見，但係後尾我算個Wilson既八字之後，就知道佢七月果排本來就時運好差，種種因素加埋先會咁。

由果日開始，一切事情都急轉直下。