你記得有一日你發現地上果啲木珠嘛?就係佢原本戴上果一晚、或者係得幾個鐘時間既黑檀木佛珠。我相信係佢係「入侵」之後,發覺Wilson戴上佢之後無耐,就用Wilson雙手整斷咗。而每晚隻野整瘀Wilson既舉動,係用黎評估自己對Wilson肉身既入侵程度,同埋同步率:即係可唔可以感受到Wilson既感覺。因為纏上後一般最易影響表面或四肢,繼而先到軀幹,最後先係完全影響大腦。

而係十四之後,隻野已經可以奪取佢四肢既感覺:痛楚。

但今次個情況唔止咁簡單,因為Wilson係無用佛珠既情況下唸經,之後如果佢買既係真正開過光既佛珠返黎就未必會搞到咁大件事,偏偏佢就買咗條膠珠返黎。唸經本來就會有令人更接近「靈」既世界,而「靈」呢樣野本身有好有壞。修道者持法器定心神去唸係可以有助提昇自我既層次去接近「靈」,亦有啲修行既人係街邊後巷派糖實行布施時會唸經去招靈之類,但呢啲一般都要有人指導過、有基本修行或者,持有合適法器既人先可以進行。

而Wilson偏偏在最壞條件都齊全之下進行,被邪靈纏上、時運低、無法器甚至用咗假野,同埋十四果日經過重陰之地:佢公司後樓梯。我搵Wilson期間去過現場睇過,果度陰氣好重,有大量「靈動」既痕跡,我諗果棟大廈既人都感覺到仲不自覺咁避開:我未見過工廈有咁乾淨既後樓梯,地下咩煙頭都無咁滯。何況佢公司附近真係死過人,Wilosn身上既邪氣仲爭啲招惹埋佢,果頭真係一條陰路。果晚最無辜既係佢樓下個看更,比Wilson點去睇部電梯。唔睇由自可,電梯開門時啲陰氣衝晒出黎,唔講你唔知,電梯槽不知幾聚陰,個看更果晚應該奶晒野。比我都唔撈走人啦,見過鬼唔怕黑咩。

題外話,果日你比電話我睇時都話你一定怪錯Wilson。我係去佢公司時撞正佢地放飯。我係睇Wilson電話個whatsapp時睇過Rachael張大頭。(嗱!阿嫂,講清楚先,我係想睇下仲有無果張相,我想封埋佢咋!)之後我係無幾遠撞到佢同埋係Wilson口中既「孖寶」既物體。一睇就知果對「孖寶」咁幼稚唔岩Rachael心水,Wilson佢平時咁幫人又比較成熟,睇怕都係Rachael單相思,而且佢面相好勝,果日個whatsapp都係佢有人send比Wilson搏你睇到多。





Wilson份人擔屎都唔偷食,我地幾個好清楚架。

講返正經野,Wilson係咁樣既情況下唸經,變成日日加強佢同隻野既連繫,由本來已經少見既「入侵」慢慢發展到「嵌合」。係呢個過程中隻野越來越容易吸收到Wilson既陽氣,所以發生「靈動」既次數越來越頻密﹐仲引過「朋友」入黎。不過隻野有好強烈既地盤意識,最後其他「朋友」都去而無蹤。其實隻野都好想趕埋你走,相信你宜家知我講咩:掉走你常用既湯匙、鏡上留字都係隻野既傑作。偏偏你八字命硬,所以搞你唔到,你見你成日周圍去住咁多酒店都無出過事就知呢啲野本來離你甚遠。

再之後Wilson有晚覺得自己「比鬼壓」,其實係隻野完成咗「入侵」呢個程序,之後伯佢開始夢到初一果時既事,係因為已經係「嵌合」既預兆,隻野唔想比佢記起既經過都因為佢地係「靈」既層面接觸而曝露咗出黎。

到你嬲咗Wilson走咗之後打擊咗佢,佢情緒低落後好快連成個人都比隻野搞到迷迷糊湖,連自己做緊咩都唔多清楚。直到我地入屋,Wilson見到你之後精神一振,加上我既身上法器既氣場,先令到隻野既操控減弱,令Wilson一時之間清醒過黎。

所以點解最後係我嘗試軀走佢時Wilson會痛苦成咁,而且失敗。我以為我灌過頂學識咗啲手印就真係好勁。果日我用到金剛印同金剛經都趕唔到佢走時,比隻野潛藏得更深黎蒙蔽咗我地,之後仲因為「定」既境界太低比你一句說話搞到心神亂咗,再出手用直接按壓Wilson人中去灌注法力既時機都太遲,之後既發展就係你未睇呢篇留言前已經知道。





件事一早發生到超出我力能所及既範圍之外,我誤判我累事我對你地唔住。修行呢條路真係唔係一朝一夕既事,呢個世界仲有太多野超出我所知既範圍以外。但係你放心,我一定會盡力去救Wilson既,因為我一早已經同佢結咗「緣」。

仲係西藏時我收到過Wilson既whatsapp,佢同我講過發生緊咩事。當時我已經請教過師父,問佢有咩睇法。師父開頭淨係講咗句「一切皆有命數。」之後就無理我。直到七月二十果日師父見我日日都去搵佢求教,佢先同我講叫我閉關七日,最後幫我灌頂同教我結印之後就講多句「願有緣者得助。」就安排埋我返香港。睇黎佢老人家一早睇通睇透。

你都知道我地四個當中Wilson同我唔係玩得最埋果個,可能係佢唔鐘意我講埋晒啲宗教野之類,我鬼知佢有咁既過去咩。但係前年我屋企出事後,最主動同最熱心幫我既係佢。阿嫂你都知佢果排成日夜返同唔陪你係因為佢幫緊我呢個獨子去處理屋企人身後事。再到之後我忽發奇想想去西藏時,言談間講過我有財政既憂慮,第一個馬上借錢比我既就係Wilson佢。如果唔係我就去唔成西藏,去唔成西藏我就遇唔上我師父。因為呢個因緣又好,情誼又好,我一定會拼盡全力去救Wilson既。

事發到如今已經第三日,係第七日之前我會盡我所能去救Wilson既。師父一早算到我要過呢一劫先會真正有所成長,佢已經叫咗兩個師兄黎幫我。

阿嫂你呢幾日要做既事就係留意下新聞,有無啲咩發現有人係街昏迷咗同埋「傻人發現案」之類。唔知你有無留意香港新聞,早排有單行山人士行行下失蹤,之後係離事發地點好遠既地方出現,搵返佢時又有啲神智不清、又講埋晒好奇幻既旅程之類?





Wilson就係類似既情況,不過係無咁好彩會自己出得返黎果隻。你知道香港一年有幾多人失蹤?又得幾多搵得返?每一千個都係得九百個搵得返,其餘果啲都…

但你放心,我會去救佢。係我按佢人中灌注法力既時候,已經有一小部份氣入咗佢身體。相信只要搭返果條小巴線既小巴,我終會感覺到佢係邊度消失,再帶返佢返黎。

萬一,我話萬一真係到初八都無我地消息既話,我已經whatsapp定我師兄既wechat id比你。到時你同佢講係佢師弟香港權交底過既,佢就會幫你。

希望初七或之前,有緣再會。