[港版無限流][長篇] 恐怖輪迴: 公屋驚魂～真正殺著

保安控制室

「哈哈，你哋兩個都平安返嚟，證明妳哋今場任務運氣爆棚，快啲過嚟俾哥哥抱抱，等我沾下妳哋身上啲好運。」李文大聲淫笑地説著，準備把其魔爪伸出，但很快便被喬欣與林恩一起暴揍起來。

「點講都好，妳哋兩個無事咁返嚟始終係一件值得高興嘅事。不過呢個任務真係幾難，淨係頭一日已經攪到我哋癱癱腰喇。」凌天皺眉笑著說道。

「咪就係，頭一日已經咁，其餘嗰9日點捱呀。」李文撫摸著額頭，哀嘆道。

「我想問，今日係幾號？」林軒突然出聲問道。





「哈，仲洗問，今日咪8月17號囉。」喬欣笑著說。

「哦？！好，唔該。」林軒點頭應道，然後繼續低頭看向手上的筆記本電腦。

「咦，新一份巡邏路線圖又出咗喇喎。」李文指著凌天身後的牆壁，果然又多出了兩份巡邏路線圖。

「睇吓先，今次出去巡邏嘅係林軒同林恩。」凌天看了看身後的巡邏路線圖，向林軒笑着問道「點呀，有冇把握？」

「冇乜，但保證到自己唔會死。」林軒平淡回應。





「軒爺果然係我偶像，串嘴可以串到咁平淡，小弟拜服。」李文淫笑地讚嘆道。

在李文身旁的何芬見到其噁心的樣子，又看了看對面的凌天，不禁搖頭哀歎起來。

「你哋出去等陣巡邏嘅時間係夜晚11點，距離宜家仲有半個鐘，最好趁呢段時間休息一下。」喬欣沒有理會李文的說話，微笑說著。

「嗯，我哋會㗎喇。」林恩也笑著回應。

「隊長，過一過嚟，有啲嘢想同你傾傾。」林軒突然對凌天招手，然後又向李文說道「淫蟲，過埋嚟啦，有嘢要傾。」





「哦，好呀，咦？咪住，點解我要認做淫蟲？」李文皺著眉走過來說著。

何芬見到李文的樣子，撫摸著額頭，哀歎地暗道「雖然知道你係扮嘢，但可唔可以唔好扮得咁樣衰呀。」

「點，係咪有咩事？」凌天平靜地低聲問道。

「係囉，軒爺特登叫齊我同天哥，莫非想學劉關張咁喺到玩桃園結義？！」李文笑著說道。

「我已經估到呢場任務想點。」没有理會李文的話，林軒分別各自給二人一張紙，平淡地說「所以我同林恩行完呢轉之後，希望隊長同李文可以各自帶住其他隊員，兵分兩路咁去指定嘅地方。」

「咁呢場任務究竟想點？」凌天皺眉問道。

「唔係我唔想講，係宜家講咗都冇用，因為呢位干涉。」林軒用手指指著上方，平靜地說著。

「冥主？！」李文也不禁認真起來說道。





「冇錯，呢場任務嘅真正殺著我都係無幾耐之前先發現倒。」林軒平淡地說著「我好肯定一樣嘢，明天你哋最好唔好再留喺呢間控制室到。」

「呵呵，軒爺，你今次唔會又諗住揾我同天哥較飛呀？」李文再次顯露其猥瑣的笑容問道。

「我似啲咁嘅人？」林軒一臉無辜地反問。

見識到二人的虛偽演技，凌天感到有些無語，説「你俾我哋嘅呢張紙，入面所寫嘅嘢都係好普通，你唔諗住解釋一下？」

「解唔解釋都係一樣，總之呢兩張紙你哋兩個自己放喺當眼處，廢事到時唔記得睇。」林軒平淡地回答道。

「既然係咁就無計啦，唉，時間差唔多喇，你準備同林恩去巡邏啦。」凌天無奈點頭說道。

林軒没有回應，只是與林恩一起走到控制室門口處。





「林恩妹妹加油，李文哥哥支持你。」李文正以其猥瑣的笑容說著。

但他剛説完，便又被喬欣揮拳打臉。

後者卻若無其事地說「打慣咗，一時手痕。」

眾人無語。

「總之照我講嘅去做啦。」林軒對著凌天說道，然後便與林恩走出控制室門外。

當他們二人走出門外時，林恩便皺眉問道「少爺，呢次任務真係好似你所講咁樣？」

「冇錯，冥主今次玩陰招，好彩我有留到一手，如果唔係都俾佢陰到。」林軒平淡地說著。

「真係可怕，但隊長佢哋掂唔掂㗎？雖然有你張紙提醒，但今次冥主差唔多等同出術咁滯喎。」林恩擔憂地問道。





「規則係由冥主定，況且佢今次又冇犯自相矛盾嘅錯誤，咁又何來出術？」林軒微笑地説「至於凌天同李文，佢哋唔蠢，有我提醒，呢場任務殺唔死佢哋。」