[港版無限流][長篇] 恐怖輪迴: 公屋驚魂～搏奕

林軒依照著巡邏路線圖的指示走到商場天台處。

天台很平静，左邊是一個被鐵網圍著的籃球場，右邊則是有數張下象棋的石桌及石椅。

「我等你好耐喇。」

突然一名身穿白色上衣黑色短褲，雙腿穿著人字拖，口中抽着煙，身型略顯肥胖的中年男子出現在林軒面前，平和地笑著說道。

「唔好意思，頭先有啲事攪到遲咗。」林軒略帶歉意地回應著。





「哈，遲咗都冇計，既然一場嚟到，陪我捉返場棋啦。」中年大叔展開雙手，大方地向林軒邀請道。

「樂意之至。」林軒點頭回應。

說罷，二人一同走向石椅並了下來。

中年男子雙手拍了兩聲，石桌上便多了一副象棋，象棋旁邊則多了一壺茶及兩個茶杯。

「飲茶？我啲功夫茶有番咁上下水準㗎。」大叔微笑問道。





「唔喇，我都係飲慣咖啡。」林軒微笑地婉拒。

「呢家啲後生真越來越唔念舊。入正題啦，你知唔知我係邊個？」中年大叔搖頭微笑，然後便在棋盤上下了一子。

「估到啲啦。」林軒微笑回應，接著也在棋盤上下了一子。

「哦？既然係咁，仲可以咁氣定神閒咁陪我捉棋，有啲膽識喎。」大叔一臉讚賞地説著，手中卻不忘下棋，跟著再次下了一子。

「呵呵，我要怕啲咩，你都唔夠膽喺到郁手。」林軒笑著説，然後問道「我反而好奇，你一個管理住外面嘅鬼王會特地走嚟屋苑到同我捉棋傾計。」





接著，林軒又在棋盤下了一子。

大叔看了看棋盤，笑著說「捉棋嘅套路，某程度上可以反映下棋者嘅諗法，我覺得你宜家好似想引我入局，咁我順唔順你意好？」

「咁要睇你嘅好奇心有幾大喇？」林軒喝了口咖啡，平淡地説著。

「哈哈，你都估到喇，睇嚟你都算幾有腦，冇錯，我嚟同你捉棋，純粹係好奇你哋呢批外來者。」中年大叔大笑地説著，然後在棋盤上再下一子。

而這步棋亦表達了他願意入局的訊息。

「嗯，你對我哋呢批外來者所知幾多？」林軒平淡地問道。

「可以話好多，但亦都可以話好少。」中年男子苦笑地說著，嘆氣道「好奇心害死人呀。」

「哦？你好怕佢？」林軒好奇地問道。





「當然。就算諗都有危險。」中年男子搖頭說著。

「咁你都認真唔簡單，竟然知道佢嘅存在，佢做過啲咩令你咁驚呀？」林軒微笑問道。

「佢…………哈哈哈哈，哈哈哈哈，你想陰我？！」中年男子指著林軒，瘋狂地笑著。

「試探吓啫，睇嚟你哋有過啲不快嘅經歷。」林軒再次喝了口咖啡，平淡地説道。

「呢個…………你又想陰我。」中年大叔笑著說，然後大手一揮，狠狠地拍向自身的後腦。

林軒冷冷地目視著一切，再次開口問道「呢個世界同你有相同實力嘅有幾多個？」

「8個。我就係感覺到呢個屋苑存在住另一種規則，所以先好奇入嚟睇睇，結果差啲俾你害死，我都係趁早離開好過，痴住你太危險。」中年大叔沒好氣地說著「啊，提多你一句，天台呢到本身有隻怨靈，佢暫時俾我困咗喺籃球場到，我走咗之後，佢應該唔洗2分鐘就出嚟，細路，你好自為之啦。」





「多謝提醒，一路好走呀。」林軒微笑地揮手告別，回應他的是大叔的一記中指，然後整個背影化作一陣清風，揚長離去。

「有意思，估吾到呢個世界嘅高階生物竟然強到可以感知到冥主嘅存在。」林軒撫摸著下巴暗道「更有意思嘅係，呢啲高階生物知道咗冥主嘅存在，但為咗避免被冥主抹殺滅口，竟然强行封印，甚至消除自己相關嘅記憶。」

「碰！」「碰！」「碰！」

空無一物的籃球場卻在此時響起劇烈的碰撞。