[港版無限流][長篇] 恐怖輪迴: 公屋驚魂～消失的新人

保安控制室

蘇琳張開眼睛，迷迷糊糊地醒來，看到坐在她身旁的凌天，問道「我訓咗幾耐？」

「唔係好耐，幾個鐘啫。」凌天微笑地說「今次冇事算係咁啦，不過返到空間仍然要加倍訓練。」

「哦。」蘇琳無奈地點頭，繼續問道「咁宜家係邊個出緊去巡邏？」

「係林軒同林恩佢哋兩個。」凌天微笑說著「佢哋兩個條命比妳更加硬，所以唔洗擔心佢哋。」





「冇錯，成隻蟑螂咁，命硬之餘又討人厭。」坐在凌天對面的李文正悶悶不樂地說著。

聽到此話，凌天心中冷笑了一聲，臉上卻苦口婆心地說「李賢弟，咁你就唔啱喇，林軒雖然有時係乞人憎啲，但佢好多時咁做都係為成個團隊好，呢個時候我哋應該俾多啲包容。唔好話哥哥話你，賢弟你有時心胸真係太過狹窄喇。」

當凌天說完此話後，全個房間所有人均感到一陣雞皮疙瘩，當中更以李文感受為最甚。

李文皺起了眉頭，接著緊閉雙眼，深深地吸了口氣，然後轉頭看向凌天淫笑道「天哥講得啱，係細佬小心眼喇，天哥一番話，令細佬如雷貫耳，茅塞頓開，細佬對天哥嘅欽敬，簡值猶如滔滔江水連綿不絕，黃河氾濫一發不可收拾呀。」

「客氣，客氣，做大佬嘅，見啲細嘅間唔中犯錯，提點吓佢哋係應該嘅，只要知錯能改，唔好再得寸進尺就可以喇。」凌天拍著李文肩膊，大方地說道。





「有天哥咁嘅大佬，簡直係細佬幾世修返嚟嘅福份，今日滴水之恩，他日定當湧泉相報。」李文一臉感動地説著。

「李弟……」

「天哥……」

「李弟……」

「天哥……」





房間內，喬欣，蘇琳及何芬3人看到此情此景，心中不由感到一陣嘔吐的感覺。

當中又以何芬感受最深，皆因她原本對凌天還抱有的良好印象，也因為這次虛偽而噁心的演技而撤底幻滅。

剛醒來的蘇琳實在頂不住房間的氣氛，不由開聲説道「不過我醒返之後，間房好似冷清咗咁多咁嘅。」

「哈，只係林軒同林恩出咗去啫，間房未至於太冷清掛，妳掛住佢哋兩個？」喬欣微笑地説著。

「唔係喎，感覺上真係少咁咗幾個人喎。」蘇琳皺眉說道。

「仲會少咗邊幾個呀，林軒同林恩出咗去，第一轉嘅新人孫揚又瓜咗老襯，宜家間房得番我，天哥，蘇琳，喬姐，何芬，仲有…………咦，係喎，啲新人去曬邊到？」發現這個問題的李文正一臉凝重地説著。

的確，保安控制室內除了何芬，其餘新人竟全都不見踪影。

感受到這個問題的嚴重性，凌天也不由說道「奇怪，我好似完全冇印象批新人有行開過。」





「唔好話你，我都冇印象。」喬欣也皺眉説道。

「我都冇。」李文和應著説。

「我都係，冇印象。」何芬搖頭說道。

「我之前暈咗，更加冇可能見到。」蘇琳也無奈搖頭回應。

「佢哋只係普通新人，就算有人暗地裡扮豬食老虎，但都冇可能强到可以無聲無息咁全部人離開我哋視線，除非……」凌天皺著眉，自言自語地分析著。

「有某人或某生物喺我哋面前無聲無息咁帶走佢哋。」喬欣接過凌天的話，臉色難看地說著。

「但係如果真係咁，帶走佢哋嗰條友實力未免強過我哋太多喇掛，實力相差太大，唔係幾啱冥主一直以嚟嘅規矩同口味。」李文搖頭說道。





「但話唔定佢轉口味呢。」喬欣皺眉反駁道。

「呢個我比較傾向李文㗎諗法，冥主應該唔會派一隻實力強我哋太多㗎生物嚟同我哋打，咁樣太快玩完，對佢嚟講冇乜趣味。」凌天眉頭緊皺地説道「可惜我哋最有腦嗰個行開咗，如果唔係可以問問條仆街。」

李文眼珠轉了轉，向凌天低聲說道「天哥，我記得林軒臨走之前好似俾咗張紙你，好似話要留意啲咩。」

「竟然有咁嘅事，點解我唔知嘅？」凌天奇怪地說著。

「你冇印象？」李文驚訝地問道。

「冇呀。」凌天奇怪地在儲物空間中搜尋，然後一臉驚訝地拿出了之前林軒交給他的白紙。

只見紙上的第一行句子寫著「留意閉路電視。」