[港版無限流][長篇] 恐怖輪迴: 殭屍戰爭～反殺

喬欣此時在梵諦岡一間房間內低聲哭泣著。

「任務二結束。請試煉者選擇在任務世界逗留三天再返回空間還是立刻返回。」冥主提示音此時在喬欣腦海中響起。

喬欣想了想，低聲道「逗留三天。」

話畢，按著耳筒道「凌天李文，你哋兩個幫吓我諗計殺死6號隊班人，我要佢哋血債血償………」

*******





在意大利邊境的一處山坡

「隊長，12號隊條女應該係走咗返去梵諦岡，宜家趁教廷㗎人被德古拉拖住，我哋直接殺入去喇。」古力向秦輝建議道。

「冇錯呀隊長，12號隊已經被打殘，比較似樣嗰兩個都已經死埋，得返啲新人，機不可失呀。」陰沉男子同意道。

「我同意。」御姐也表態

秦輝沉思著，向洪定問道「你點睇？」





「睇你隊長想點，其實有利有弊。利就係每人多2000冥幣。弊就係增加唔少變數。」洪定閉著眼道。

「有咩變數？」秦輝繼續追問道。

「講唔清，總之好多，人臨死前㗎反抗係最猛烈嘅，雖然12號隊佢哋做唔到同歸於盡㗎地步，但如果拼死一搏，整死我哋一兩個人都仲係有可能。隊長，你要有呢個心理準備。」洪定張開雙眼，正色看著秦輝道。

「嗯，我哋大家一起走到呢步唔容易，而且我哋都有唔錯嘅收穫，離任務結束仲有1日時間，我認為返去柏林係最好㗎選擇。」秦輝對眾人說道。

「好吧……」眾人雖然有少許不甘，但也沒有異議。





「隊長，有一隊大約百人㗎教廷軍隊向住我哋呢邊過緊嚟。」瘦削男子突然急忙説道。

秦輝皺著眉頭，看向山下。

只見喬欣帶著大約1百名聖光軍，騎著馬對士兵們大聲道「教皇有令，我以聖騎士之名，命你哋拿下山上嘅德意志間諜，眾人賞金幣百枚，賜予男爵爵位。」

重賞之下必有勇夫，聽到有封賞後，1百名聖光軍立刻大叫跑上山。

「哈哈，本來仲諗住放生你，結果你仲走上嚟送死，咁就唔好怪我喇。隊長，我去也。」壯漢古力拿出大斧衝下去，大叫道。

「小心唔好大意，佢夠膽一個人嚟，肯定有所依仗。許晨，你去幫下古力。」秦輝皺眉說著，對古力私自行動有些不滿。

「好！」瘦削男子回應了一句便快步走下山。

「嗯，好似有種俾人算計㗎感覺，真係乞人憎。」洪定低聲說著「究竟係咩呢………條女一個人帶兵過嚟………但1百個普通軍人喺隊長面前又冇咩威脅………而12號隊宜家對我哋最大嘅威脅係………弊！隊長，快啲叫古力佢哋返嚟。」





聽到洪定的話後，秦輝心中一慌，立刻按著耳筒，向山下的古力大叫回來。

但此時古力已開始殺得性起，在他斧下的聖光軍已逾數十人，距離喬欣的位置也近在咫尺。

「古力，唔好再殺喇，隊長叫我哋返去。」許晨對古力說道。

「你傻咗咩，條女就喺前面，仲差小小就可以殺到佢，你宜家叫我走？」古力不滿地說。

「但隊長佢……」許晨還想再說「得啦，你咁驚就自己返去先，我遲吓會同隊長交代。」古力打斷了他的話，自顧自地向前衝殺。

許晨無奈，正想再勸，突然一名聖光軍士兵拿著長槍，欲刺向他。他不耐煩地向那士兵飛了一張卡片，卡片劃過士兵的頸部，人頭掉落。

然而，正當許晨準備走向古力那邊時，發現之前已掉下頭顱的士兵正以無頭的軀體抓住他的左腳，而不遠處的頭顱正對他詭異地笑著。





心知不妙，許晨欲逃回山上，但奈何左腳被死死地抓著，他立刻拿出一張金色卡片並飛向腳邊的無頭屍體，那屍體頓時爆裂起來。

正當許晨重獲自由的時候，耳邊背後不遠處突然出現一道聲音「血林！」

血光閃現，許晨感到全身一輕，慢慢失去知覺。

「6號隊一階試煉者許晨被擊殺，12號隊各人獎勵2000冥幣。」

「總算有番啲進帳，但可憐嘅係我喺戰場到吸收咗咁多怨氣而煉制成㗎陰兵，結果俾條友一張卡片就攪掂咗。」李文騎著馬，手中拿著一個滿載著黑氣的木碗抱怨道。

「煉制咗幾日就有咁嘅成果算唔錯啦。」在李文身旁的喬欣安慰道，她見成功擊殺6號隊成員，心情也因此開朗了少許。

「兩位，我哋準備要騎馬走人喇，對方嘅隊長應該準備發火。」此時凌天也從戰場上回來，喘著氣地說著，使用「血林」後，耗盡了他身上的内力及體力，對其身體造成不少負擔。

「啱，殺得死條友其實係我哋好彩，如果唔係我喺陰兵啲指甲落毒，再加上天哥嘅絕招，條友都未必有咁快死。」李文也點頭說道。





「你哋仲認為我會放你哋走咩？」秦輝突然出現在3人的50米外，憤怒地叫著。