秦天晴 — 有鬼 新章《畫》正式展開: 貓妖 — 終章（上）
再一次，強烈嘅危機感漫延於全身，但係俗語話《敵不動，我不動》，所以佢用兇狠嘅目光瞪住我嘅時候，我仍然保持鎮定咁望番住佢，同時亦緊緊咁握住手上嘅果條九節鞭
但係望下望下嘅時候，我突然間諗番起第一次對峙時，佢走嚟瞪我！果時我得張《鬼畫符》，而且要護住思語，無能力去抗衡！
到第二次碰頭，佢響我面前上映左一段人體解剖，之後仲追殺我！果時我乜都無，仲抱住隻狗狗！好彩最後遇到軒轅皓，如果唔係實死無生！不過最後我都比佢嚇到大喊，仲害到我嘔到七彩！
而家第三次，我手上有條鞭，由三歲就開始練秦家鞭法嘅我仲要比你瞪！？你就想！哼！！
越諗越嬲嘅我，終於忍唔住爆發！於是我拎住條鞭舞左幾下花之後，就對住佢一下抽打落去！
貓妖反應好快，馬上向後跳開，凌嘯峰同軒轅皓見到就即刻走過嚟，一左一右咁護響我身邊，而其他人見到呢個情況，亦都趁機跑到去我地身後，護住細榮！
我嘅呢一鞭，頓時令靈警同貓妖面對面咁對立著
或者呢個時候，貓妖已經知道有我地響度，佢根本就無辦法殺到細榮，又或者係我剛剛嘅一鞭，已經成功咁激怒左佢，佢嘅注意力已經集中響我地身上
軒轅皓望住貓妖然後冷冷咁話“除左呀峰同天晴，其他人同我守住誘餌！呀峰！天晴！攻上去！”
佢一講完，就拎住把劍衝上去！凌嘯峰亦拎起枝長槍攻上去，而我就不斷響外圍邊打邊偷襲！
“神兵火急如律令，飛劍！”軒轅皓大喝一聲，佢手上把劍就向住貓妖嘅面門直飛過去！
凌嘯峰亦都出左招“火焰槍”向貓妖個身度刺落去！
而呢個咁好嘅機會，我當然唔會放過！我手上條鞭亦都向佢背後抽擊！
“噗！”一聲，凌嘯峰嘅長槍刺中左貓妖！貓妖瞬間發出悲鳴！但係凌嘯峰嚟唔切收番枝長槍，就被掙扎中嘅貓妖甩飛倒地！
鮮血不斷咁從貓妖嘅身上流落嚟，但係佢仍然馬上撲向瞓響地下嚟唔切爬起身嘅凌嘯峰！
“呀峰！”我同軒轅皓同時驚叫
軒轅皓即刻衝去凌嘯峰身邊，而我就甩出鞭子纏繞住貓妖嘅尾巴，然後運用靈力，用力一扯！
“吼！”貓妖再一次發出慘叫聲，而我亦同樣被佢甩飛倒地，萬幸嘅係，貓妖停低左對凌嘯峰嘅攻擊，軒轅皓趕得切將佢扶起！
而不幸嘅係，我嘅武器同凌嘯峰枝長槍一樣，仲掛響貓妖身上，而貓妖嘅雙眼，一直望住我，即係話佢而家嘅目標，係我！
我望住佢向我快速咁衝埋嚟，我知道我根本就唔夠時間企響身！於是我爬起，坐響地下度，握住衫袋入面嘅符紙，準備向佢飛出去！
就響佢越嚟越接近我嘅時候，突然之間有個火球從我身後飛出嚟，直接打中向我撲埋嚟嘅貓妖！妖貓被打個正著，成隻翻飛左出去！同時，亦有啲唔知咩野響我身邊走左出嚟，企左響我面前！而我就趁呢個機會即刻企番響身！
當我企左響身，然後望清楚眼前係乜野嘅時候，我馬上滿頭黑線。。。點解又係你。。。為食狗！
狗狗好似知道我望住佢咁，轉頭望一望我，然後擺擺尾，之後就望住貓妖響度“咕咕”叫，一副戰鬥格咁
我即刻叫“為食狗，危險！快啲走開！”，然後想踎低抱起佢，點知佢轉頭對我“汪！”左一聲，然後做左一樣令我目瞪口呆嘅事！
佢竟然慢慢咁變大，變大，再變大！大到同貓妖一樣咁大隻！望落去已經唔再係一隻狗，而係似一隻兇猛嘅狼！之後，佢就對住貓妖撲上去！
為食狗。。。竟然變左隻猛獸！？
我成個人呆住左，完全接受唔到呢個現實！而軒轅皓同凌嘯峰就即刻跑過嚟拉住我走，因為兩隻猛獸嘅戰鬥，已經唔再係我地呢啲凡人可以參與！
我地所有人都聽從軒轅皓嘅指示，撤退到遠少少嘅地方，以免不幸中流彈！
軒轅皓同凌嘯峰拉左我埋安全嘅地方之後，就即刻上上下下，左左右右咁檢查下我有無邊度受左傷！而當佢地檢查完之後，發現我除左隻手臂擦損左，有少少流血之外，其他地方乜事都無，都頓時鬆左一口氣
就響呢個時候，我聽到為食狗響亮咁慘叫左一聲，我轉頭一望，見到狗狗已經比貓妖撞低左落地，仲用利爪按住響地下度動彈不得！
“為食狗！”我叫左一聲，就立即想衝出去，點知兩隻手都同時被人拉住，然後聽到有人講左句“唔准去！”
我望下左邊嘅人，再望下右邊嘅人，然後。。。我扮痛“哎呀”咁叫左一聲，佢地果然即刻鬆手！
我趁機衝過去，然後一邊跑，一邊拎出符紙，同時唸
“天地無極，乾坤借法！火矛！”
小火矛向住貓妖直射過去，而貓妖雖然感受到危險，馬上避開，但火矛嘅速度實在太快，瞬間已經飛到去佢身邊，結果佢避開嘅同時，皮毛亦被火矛燒燶左一大片！
無左貓妖嘅壓制，狗狗馬上從地上爬起嚟，再次向貓妖撲過去！而我呢，就決定行遠少少，然後偷襲！
“天地無極，乾坤借法！水箭！”
“乾坤無極，風雷受命！風刃！”
我一下又一下咁不斷出咒術攻擊，而軒轅皓同凌嘯峰亦都響我不遠處一齊偷襲，仲邊打邊瞪我，我知道佢地嬲我啱啱扮痛逃走，但係呢個時候，我決定扮睇唔到
由於多左狗狗嘅關係，形勢已經係一面倒，眼看貓妖已經頂唔住，軒轅皓即刻大喝一聲“一齊出招！天雷破！急急如律令！”
凌嘯峰迅速拎出符紙大叫“雷電之刃！斬！”
而我就用最純熟嘅一招！
“乾坤無極，風雷受命！雷降！”
頓時滿天雷電交加，然後直直咁劈向貓妖身上！
“吼！”貓妖發出驚天動地嘅慘叫聲，然後伏響地上面奄奄一息