秦天晴 — 有鬼 新章《畫》正式展開: 貓妖 — 第七章
我望住枱面果一叠啱啱畫好嘅符紙，滿意咁點點頭，雖然畫得唔算好好，但係相比起之前所畫嘅“鬼畫符”，已經進步左好多，最起碼拎出嚟都唔怕會比人笑
見準備得差唔多，我抬起頭望一望個鐘，顯示三點四十五分，仲有十五分鐘嘅時間，於是我就開始收拾好枱面啲野，再將啲符紙收好響衫袋同褲袋入面，然後坐響度等軒轅皓過嚟接我
柳鳳儀見秦天晴已經畫好晒啲符，一副準備好出發個樣，心入面就覺得越嚟越不安，佢好後悔今朝早因為軒轅所講嘅野，而點頭答應左比個女加入靈界警察，去做呢件危險嘅事！如果個女出左事，咁點算。。。
秦洛望住柳鳳儀，知道個老婆好擔心個女，其實佢心入面同樣不捨個女去冒呢個險，但係佢好清楚咁知道，呢個係比個女去歷練嘅好機會，佢遲早都要完成家族嘅使命，與其之後一次過面對，不如而家等佢慢慢咁一步步去成長！
秦洛輕輕咁捉住柳鳳儀隻手，同佢講“放心，有軒轅家嘅小子響度，晴晴一定會無事嘅！” 而且仲有佢。。。
四點鐘，門鈴聲響起，柳鳳儀馬上走去開門，但當佢見到軒轅皓之後，竟然唔係邀請佢入屋，而係選擇將佢攔住響門口
“呀媽？”，“老婆？”，我同呀爸同時驚呼
柳鳳儀攔住個門，深深咁吸左一口氣，然後望住軒轅皓認真咁話“我個女而家就交比你，你一定要將佢平安咁帶番嚟！”
軒轅皓意會到柳鳳儀攔截住自己，係因為擔心秦天晴嘅安全，於是就用好肯定嘅語氣回應話“嗯，一定！除非我死！”
柳鳳儀聽到軒轅皓竟然用死作為保證，感到詫異，同時亦明白左秦洛所講嘅“有軒轅家嘅小子響度，一定會無事”係咩意思，諗一諗之後，就讓開放行
我企響旁邊聽到佢地嘅對話，知道呀媽好擔心我嘅安全，所以離開之前，我輕輕咁抱住佢，同佢講
“媽，放心，我一定會平安咁番嚟。。。”然後就跟住軒轅皓出發
響車上面，軒轅皓一邊開車，一邊同我講解等等嘅部署同行動，而聽到佢咁講嘅我，先至知道佢地今朝所講嘅番屋企休息，原來只係番去沖左個涼，換左件衫，食左少少野，就已經出晒去做準備嘅工作
好快我地就到左尋日果條邨，而落車之後，軒轅皓就帶住我行左埋一架貨櫃車度，然後企響個櫃門前面好有節拍咁敲左幾下，跟住其中一邊嘅櫃門就慢慢咁打開左一條罅，一條剛好可以比一個人爬上去嘅門罅
軒轅皓率先咁爬左上貨櫃入面，然後伸出左一隻手同我講“天晴，比隻手我！”
我聽到之後，就伸出隻手捉住佢，同時順住佢手上面嘅拉力，成功咁爬左上貨櫃入面，但係當我企好嘅時候，我立即被眼前嘅景像驚呆了！
貨櫃入面有一張好大嘅枱，枱面上面佈滿左一堆電子儀器，而牆上面就掛滿左各式各樣嘅槍械武器，甚至連冷兵器都有！令我諗到《移動軍火庫》呢五個字
軒轅皓見我呆愕愕咁嘅樣，就開口向我介紹“呢個係我地靈警嘅移動基地，我地任務所需要嘅物資都會響晒呢度！”
跟住佢隨手拎起左牆上把劍，然後同我講“呢把劍響你眼中可能只係一把好普通嘅劍，但係如果你留心咁望下劍上面嘅暗紋，就會發現上面其實係刻有一道道嘅符咒！”話畢，佢伸手將把劍遞左過嚟比我，而我接過之後就細心咁望望，上面的確係刻有一道道複雜嘅符紋。。。
佢見我拎住響度研究，就繼續話“響靈警入面，並唔係每個人都擁有靈力，除左我同呀峰之外，其他人都只係帶有天生嘅陰陽眼，所以呢啲冷冰器，其實係佢地隨身攜帶嘅護身法器！”講完之後，佢拎番走我手上果把劍，然後向劍柄上面嘅按鈕一按，把劍瞬間變成一枝警棍！
“哇！ ” 我驚訝得哇左一聲，因為太神奇啦！一把劍竟然可以縮到變成一枝警棍喎！
軒轅皓見到我咁嘅反應，輕輕咁笑一笑，然後話
“你應該都知道，靈警同天師嘅職責一樣，都係要砍妖除魔，但由於靈警嘅另一個身份係警察嘅關係，所以我地同樣會配有槍，甚至係其他高科技嘅儀器，只係呢啲配備全部都經過特殊處理，可以雙面使用！”佢指一指另一邊牆上面嘅槍同枱面上面嘅儀器
哦。。。原來係咁！靈警係由傳統同現代科技所結合而成！
呢個時候，響外面做準備功夫嘅其他靈警成員，都已經全部搞掂番晒嚟，同時亦都將貓妖今晚嘅目標“細榮”帶左番嚟
“呀頭！誘餌已經帶左番嚟！並且對佢施左迷魂術！其他人亦都已經根據你嘅指示佈好陣！”凌嘯峰向軒轅皓匯報
軒轅皓點點頭，然後話“嗯，咁等到天黑，你地就將佢帶去陣法中間，然後埋伏響四周，呀峰，你負責守住響誘餌身邊，以防萬一！呀龍，呀明同軍仔，你地三個去守住果間屋，等我指示！有無問題！？”
佢地響亮而齊聲咁答“無問題！！”
只有我一個響佢地答完之後弱弱咁舉手，然後細細聲咁問“咁我要做啲咩。。。？”
軒轅皓深深咁望左我一眼，然後話“去揀件護身法器，然後跟住我！”
“遵命！”得到任務，我開玩笑咁對佢敬左個禮，然後就去兵器牆前面左挑右揀，而其他人就開始收拾行裝，準備出動
我拎起左把刀，揮左兩下之後，就放番低，因為唔就手，再拎起左枝長槍，即時放番低，因為太重，然後又拎起左把劍望一望，最後都係放番低，因為我唔識劍法丫！望住呢堆兵器，我崩潰了！
凌嘯峰準備好行裝之後，就望到秦天晴不斷咁拎起，放低，拎起，再放低呢個動作，於是走埋去好笑咁話“小姐，呢棵菜好靚架，可以考慮下，仲個呢個蕃茄同薯仔都唔錯架！”
我聽到之後滿頭黑線，雖然我知道自己好似響街市買菜咁，但係你都唔好講出嚟丫嘛！嗚嗚。。。
因為凌嘯峰九唔搭八嘅說話，令到軒轅皓都注意到秦天情嘅行為，於是走埋去問“揀唔啱？”
我望住軒轅皓欲哭無淚咁話“係。。。我可唔可以唔揀？”
軒轅皓聽到我咁問之後，佢既無點頭亦又無搖頭，而係望一望我之後，就行埋一邊拎左個盒比我，然後淡淡咁話“用呢個，啱你！”
我打開一睇，裡面係一條纖細輕巧嘅九節鞭！咦？佢點知我唯一識用嘅武器就係鞭！？我抬起頭正想問佢，可惜佢已經行開左
好快夜晚就開始降臨，大家已經依照軒轅皓嘅指示分散行動，而我就跟住軒轅皓藏身響凌嘯峰嘅附近，準備隨時支援
時間一分一秒咁過，周圍再次變得同尋晚一樣，一個人同一隻鬼都無，我記得軒轅皓話過，呢個就係貓妖嘅空間。。。咁即係話。。。貓妖隨時都會現身！
果然，響寂靜嘅環境底下，有一下一下嘅腳步聲慢慢咁響起！
守響細榮身邊嘅凌嘯峰馬上拎起佢嘅法器，化身為長槍，警惕咁留意住四周嘅環境！同時，軒轅皓亦都舉起左手上把槍，瞄准住傳嚟聲音嘅方向！而我見到呢個情況，就握緊腰間上面果條九節鞭，準備隨時行動！
軒轅皓冷冷咁對住手上嘅多功能手錶講“目標出現！準備行動！”話音一落，貓妖已經出現響眾人眼前！
貓妖慢慢一步一步咁行，直至行到去凌嘯峰身前嘅五十米範圍左右，先停左落嚟，而佢發出青光嘅雙眼一直緊緊咁望住佢嘅目標細榮，齜牙咧嘴，但係佢並無再接近，而係響度不斷順時針咁行圈，仲不斷咁發出起起伏伏嘅嘶嘶聲，意圖分散凌嘯峰嘅注意力
就響佢行左好幾個圈之後，佢突然向逆時針方向跑，然後直直咁向細榮撲過去！
軒轅皓馬上向貓妖開槍！但係貓妖反應好敏捷咁閃身避開左呢一槍！而呢個時候，軒轅皓跑出去叫左聲“天羅地網！起！”
貓妖一落地就瞬間被陣法困住！而靈警嘅所有人亦同時現身，舉起手上面嘅槍將貓妖重重咁圍住！
被困住嘅貓妖一邊煩躁咁響陣中徘徊，一邊用兇狠嘅眼神將圍住佢嘅人一一咁掃過！突然，佢發出一聲響亮嘅咆哮聲！竟然將陣法震破！甚至將其他人都震開彈飛到地上各處！
而呢一刻，貓妖發現左呢個大好嘅機會，於是就趁大家未反應過來之前，再次撲向細榮！
就響千均一發之際，我從暗處衝出同時將腰間嘅九節鞭解開！再順勢向細榮揮出！九節鞭馬上纏於佢嘅腰間，我用力一拉！將細榮拉出貓妖嘅攻擊範圍！
我即刻閃身擋住響細榮面前，而貓妖 。。。就同我面對面咁對峙。。。