我能夠發現到佢,並唔係因為我嘅靈力感應,而係因為雙眼掃過佢嘅時候,發現到佢隻左手上面,有一攤烏黑嘅痕跡!所以。。。

我可以好肯定佢就係尋晚比我用雷降打左個招呼然後跌左落街嘅果位!

既然已經知道左佢嘅真身,咁就要開始確認一下,佢究竟幾時先會行動!

於是我開始向住佢一步一步咁行過去!同時,我放響褲袋入面果隻手,已經拎實左張符紙,以防萬一!而為食狗就響我身後,準備隨時支援我

當我同佢嘅距離變得越嚟越近,我發現佢雖然無郁過,但係我可以從佢隻眼珠度,感受到佢對我極度不滿,甚至帶有恨意!





唔通。。。係因為我尋晚搵雷劈佢!?

就響我準備出手試探佢之際,啱啱沖完涼出嚟嘅Cindy,講左句“天晴!你嚟左啦!”,就從後向我撲埋嚟!

佢嘅突然一撲,令我個人失去重心咁向前跌,但係果隻試探嘅手已經伸左出去收唔番,結果,Cindy嘅衝力令我隻手一下咁拍左落隻洋娃娃度,而我個人就趴左落張床度

“哎呀,Sorry丫天晴!我無心架!你有無事丫?”Cindy企左響床邊尷尬咁話

我心諗。。。無事。。。不過我又唔係男神。。。你推倒我做咩丫。。。





我有啲無奈咁將個頭慢慢咁抬起,然後向前一望,竟然見到自己隻手,完完全全咁包住左洋娃娃個頭!

哈。。。咁樣嘅話。。。即係啱啱。。。我將佢個頭一野咁拍左埋幅牆度。。。

我慢慢咁移開我隻手,見到佢個視線已經唔係恨我咁簡單,而係升級為恨不得殺死我先至啱!但係見佢連郁都無郁過,咁就證明左,佢日光日白係唔識郁!

多得Cindy,我連試探都唔洗做!於是我從張床度爬番起身,一手拉住Cindy,另一隻手拖住悠悠,為食狗跟住我地後面,一齊瀟灑咁行出去,淨番洋娃娃一個留響房入面,散發住強烈嘅怨恨!

出到去大廳,Cindy同Zoe招呼左我一陣之後,就雙雙去左補眠,所以大廳就得番我,悠悠,同埋為食狗三個





我問悠悠拎左張畫紙,然後響上面畫左今朝所講嘅計劃,然後一邊畫,一邊問悠悠明唔明,而悠悠就會點頭,或者響唔明嘅地方畫上個“?”問號

如果呢個時候有人見到嘅話,肯定會以為我地玩緊《畫公仔》,而事實係,我地響度傾緊今晚嘅事!

我地嘅計劃,正在慢慢咁實行中。。。

好快就到六點鐘,Cindy要去醫院睇下佢媽咪,而Zoe就要番工,佢地出門口果陣,一直同我講”唔好意思又要麻煩你照顧悠悠多一晚”,而我就同佢地講”無問題!放心出去!”

到佢地出晒去,淨番我地之後,果陣不自在嘅感覺越嚟越濃烈,為免悠悠出意外,我響佢身上放左幾張充滿靈力嘅符紙,只要果隻野敢掂悠悠,佢就等住再次比雷劈啦!

雖然我地都感覺到,果隻野一直緊緊咁注視住我地,但係我地就一直都扮唔知,繼續食飯,睇電視,而我就一直都戒備住,擔心佢會突然之間衝出嚟,殺我一個措手不及,但係好可惜,直到十一點幾,佢都係無現身

我諗左諗之後,就決定,既然你唔出嚟,咁我地就引你出嚟!而最好嘅方法,就係響個廳度熄燈扮瞓覺!我就唔信咁好嘅機會,你都忍得住唔出手!

我對為食狗同悠悠打左個眼色之後,就行去熄燈,熄到淨番一盞小夜燈,就開始合埋眼扮瞓覺,而為免會穿崩,我響悠悠身上落左個《寧神咒》,等佢個人放鬆啲,無咁驚





時間一分一秒咁樣過,被我抱住嘅悠悠好似真係瞓著左咁,安靜咁伏響我身上,為食狗就久唔久搖下條尾嚟掃下我隻腳,令我知道有佢嘅存在,唔洗擔心,而我就仍然打醒十二分嘅精神,去感覺周圍嘅動向

突然,“嘀。。。嘀。。。”一下一下嘅腳步聲由遠處傳過嚟,慢慢由遠到近,再由近去到非常接近。。。

就響我感覺到佢已經近在咫尺嘅時候,我瞬間睜大雙眼!出現響我眼前嘅係洋娃娃詭異嘅臉,而佢隻手正拎住把刀,向住我個頭用力咁拮落嚟!

為食狗反應迅速咁撲埋去佢度,將佢撲倒響地下,而我就“丫。。。!”咁驚叫左一聲,然後抱住悠悠開門衝出去!

我狂奔左三層樓梯,終於都上到天台,而為食狗亦都緊隨其後咁跑到上嚟,企定之後,我馬上放底悠悠,然後不停咁喘氣!

始終悠悠都成五歲,有番咁上下重量!抱佢慢慢行都仲還好,爆衝三層樓梯真係會無左半條命

正當我不斷吸氣呼氣咁調息緊嘅時候,果隻洋娃娃已經追到上嚟!





“睇你地仲走得去邊。。。桀桀桀” 佢一邊拎住把刀慢慢咁行埋嚟,一邊用尖銳刺耳嘅聲線同我地講,同時仲發出一陣陣好似巫婆咁嘅笑聲

聽到佢咁講,我即刻好驚慌咁將悠悠護住響身後面,然後把聲帶住抖震咁話“你。。。你。。。你呢個妖怪。。。想。。。想點。。。丫。。。!?”

佢見到我咁驚,就好興奮咁話 “桀桀桀。。。本來諗住將個靚妹虐待到死,然後將佢果個帶住仇恨嘅靈魂奉獻比大人,點知你呢個賤人出嚟阻頭阻勢!咁我就唯有提前行動。。。殺晒你地!桀桀。。。”一講完,佢拎住把刀嘅果一隻手,就向我迎面咁飛過嚟!而佢個頭,就對住悠悠飛過去!

“丫。。。”我扮晒驚咁尖叫左一聲,而我嘅雙手已經各自拎住左張符紙,對住佢直直咁飛出去,然後唸

“乾坤無極,風雷受命!雷降!”

隨著我不斷咁練習,同時間發出兩道雷咒已經唔成問題,所以兩道雷電瞬間直擊向佢隻手同個頭上面,發出左響亮嘅“啪”一聲!

洋娃娃受到我嘅攻擊之後,就即刻召喚番個頭同隻手番個軀幹度!

佢果隻被雷打裂左嘅手,勉強咁裝番上個身度,但係個頭爆左一忽就裝極都裝唔番上去!唯有用完整嘅果隻手拎住佢個頭,然後面目猙獰咁同我講“你個八婆!竟然敢呃我!仲破壞左我個身體!”





聽到佢咁講,我冷笑左一聲,然後話“我何止要破壞你個身體,我仲要打爆佢等你合唔番!等你虐待悠悠虐得咁爽丫拿!我虐死你!”

講完,我就抽出我腰間嘅九節鞭,對住佢狠狠咁抽落去!

佢啲手手腳腳即刻分開晒嚟避開我呢一擊,然後迅速向各個方向逃走!

就響呢個時候,一直哩埋響暗處嘅軒轅皓立即衝出嚟,然後大喝一聲“天羅地網!起!”

隨住佢話音一落,一個金色大網瞬間將佢全身上上下下一個不留咁罩住!

我望住網中嘅佢,甜甜咁笑一笑,然後話“你再拆散啲可能會逃到出去架,不如我幫下你丫。。。”

“你敢!!”今次到佢驚叫,但係我先唔理,我輕輕咁對悠悠講左句“悠悠,行遠少少,然後合埋對眼,兩隻手遮住隻耳仔。。。”





“知道!”悠悠好乖咁應左我一句,然後跟住做,但係我嘅注意力都響晒個地下度,而忽略左悠悠竟然會開口回應我呢件事

我對軒轅皓同為食狗揚一揚手,示意佢地行開少少,然後深深咁吸左一口氣,之後。。。

“你敢走!我打扁你!” 我一鞭抽落去

“丫!”佢發出淒厲嘅慘叫聲

“叫我八婆!?叫我賤人!?我抽死你!”我又一鞭狠狠咁抽落去

“哎呀!你個魔鬼!你係惡魔!大人唔會放過你地架!”佢再次淒厲咁慘叫

“哈?姐就係惡魔!虐待悠悠!?想殺我!?我虐死你!大人!?我大你個頭! ”我再次狠狠咁抽左佢幾鞭

如是者,我都唔知抽左佢幾多鞭之後,佢已經由慘叫,叫到唔識再叫,而果幾件殘肢,亦都已經化為一堆碎到不能再碎嘅碎片

我輕輕咁呼出左一口氣,正想起手打出靈火嘅時候,軒轅皓突然叫住我,“天晴,等等!”然後踎低響堆碎片度拎起左一個黑色樽仔

我好奇咁行埋去望一望,見到樽上面畫左一道符咒,就開口問“呀皓,呢個咩嚟架?”

軒轅皓研究左一陣之後,就回應我“應該係令到呢隻公仔變成咁關鍵,入面裝左啲咩,要拎去化驗先至知。。。”

我對佢點點頭,然後對住堆碎片打出靈火,靈火能夠消除一切穢氣,所以當佢燃燒緊嘅時候,升起左一陣陣黑煙,然後慢慢咁隨風飄散。。。

我望住呢一陣陣嘅黑煙,諗起洋娃娃口中所講嘅“大人”,仲有果個寫有符咒嘅黑色樽仔,入面到底係裝住啲咩呢。。。?

呢一切一切。。。暫時都係一個謎。。。
已有 0 人追稿