當一切都化為灰燼,我轉身行去悠悠身邊,輕輕咁拍左佢一下,而佢就因為我果一拍,瞬間睜開雙眼,放低遮住耳仔果兩隻手,轉為攬住我隻腳,然後叫左我一聲“晴姐姐!”

咦!?。。。我好似聽到悠悠叫我?

悠悠見我呆住左無反應,就開口話”晴姐姐,悠悠叫你呀!”

再次聽到悠悠講野,我震驚得瞪大雙眼,伸手拍左軒轅皓個膊頭幾下,然後問“呀皓!你聽唔聽到?悠悠講野丫!”

軒轅皓見秦天晴前一刻仲兇猛無比,下一刻竟然會因為悠悠講左兩句野而變得傻下傻下,頓時覺得好搞笑!前後差別實在太大啦!





軒轅皓點點頭,然後回應話 “聽到,走啦!”講完就一馬當先離開左天台,所以無人發現,佢個咀角一直掛住淡淡嘅笑意

見到軒轅皓走左,我即刻一手拖住悠悠,一手抱住為食狗,快速咁跟上去

行到去Cindy屋企門口,我突然諗番起,剛剛我抱住悠悠衝左出嚟果陣,根本就無閂到門!

但係而家對門閂埋左。。。唔通。。。有賊!?

我捉住軒轅皓隻手臂,深深吸左一口氣,儘量保持冷靜咁話“我啱啱根本就無閂門,所以。。。可能有賊響入面,我地洗唔洗報警?”





軒轅皓對住我搖頭,然後話“天晴,你可以打比我!”跟住就走去敲左幾下門

其實軒轅皓心諗“我係警察,要報警不如搵我!” 可惜以秦天晴嘅思考方式,肯定領略唔到佢嘅意思

打比你!?打比你做咩。。。?

就響我諗緊嘅時候,對門已經打門左,我抬起頭一睇,竟然係凌嘯峰!?

“咦!呀峰,點解你會響度嘅!?”我驚訝咁問





凌嘯峰一邊開門,一邊話“呀頭驚你地引唔到隻野上天台,會響屋入面打起嚟,到時得你地三個會搞唔掂,所以叫我響度Stand by,點知你地又成功左喎,不過見你地無閂門,我咪幫你地閂番,順便入埋嚟坐下囉!”

呢一刻,我非常之慶幸有凌嘯峰響度,假如真係有賊入左嚟嘅話,我都唔知點同Cindy交代。。。

入到屋,我將悠悠抱起,然後問”悠悠,可唔可話比晴姐姐知,點解你肯開口講番野丫?”

悠悠望住我,然後扁扁咀咁話“娃娃唔比講,娃娃會殺死婆婆,媽咪同姨姨,尋日悠悠話鐘意姨姨個公仔,娃娃唔鐘意,推左婆婆落地!姐姐打贏娃娃,悠悠唔怕!”

哦!原來係果隻鬼娃娃威脅悠悠!如果悠悠同人講野嘅話,就殺晒佢全家!而果日因為悠悠同Cindy講野,引起左佢嘅不滿,所以就去推跌Auntie,令到悠悠食左隻死貓

”可惡!早知係咁我就鞭多佢幾下啦!”我惡狠狠咁話

軒轅皓聽到我咁講,竟然伸手輕輕咁拍左我個頭一下,然後開口問悠悠“細路,你隻公仔響邊度得番嚟?”

悠悠諗一諗,然後話“爸爸屋企有個女人比我,要我帶番屋企!”





凌嘯峰聽完之後,就話”原來係二奶害元配個女!啲女人真係惡毒!”

聽到佢果句“啲女人真係惡毒”,我即刻轉頭望住佢笑一笑,而佢可能已經知道自己口快快講錯野,再加上見到我嘅笑容,情急之下,就決定班救兵!

”呀頭!事關重大!睇嚟朝早要去查下先得啦!”凌嘯峰無比認真咁對住軒轅皓話

軒轅皓又點會唔知凌嘯峰係驚秦天晴去報復佢,所以快快趣咁拉埋自己落水丫!不過講真,如果凌嘯峰知道啱啱響天台上面,果隻公仔嘅下場,可能以後都將秦天晴當姑奶奶咁侍奉著

第二朝一早,Cindy就番左嚟,當然,軒轅皓佢地已經一早就走晒啦!一個番左去做調查,一個就拎左果個黑色樽仔去化驗,不過佢地臨走之前,對悠悠施左催眠術,令佢忘記左關於果隻恐怖娃娃嘅一切

唔知點解我見到軒轅皓對悠悠施法果陣,總係有種似曾相識嘅感覺嘅,可惜我諗極都諗唔起。。。

番到屋企,我即刻去沖個熱水涼,然後行番入房諗住好好咁瞓番一覺,點知一推開門先醒起,我間房仍然仲係比人打完劫果個狀態丫!





嗚嗚。。。欲哭無淚!我一邊執,同時一邊諗”早知就抽多佢幾下啦!”唉。。。死死氣咁執番好之後,終於都可以瞓個天昏地暗

突然,一陣音樂聲響起,將瞓到不醒人事嘅我嘈醒左,我拎起個電話睇都無睇,就接起嚟,含糊不清咁“喂。。。”左一聲

耳邊即刻傳來軒轅皓把聲,佢話“天晴,仲瞓緊?”

我隨口咁“嗯。。。”左聲,然後就咩都聽唔到

軒轅皓響個電話度不停咁叫“天晴!”,但係都無人應,知道佢肯定又瞓番,所以就決定同凌嘯峰走上門尋人,順手買埋宵夜野上去食

唔知過左幾耐之後,一陣音樂聲再次響起,今次嚇到我成個人彈起!因為個電話貼住我塊臉響度震!

我再次接聽,但係都未開口,軒轅皓就對我講左“開門!”兩個字,然後就收左線

我坐響床邊呆左一陣之後,就摸黑咁行出去開門 ,一打開道門,軒轅皓同凌嘯峰就拎住一包二包走入嚟,而熟路嘅軒轅皓就走去開燈





我行去沙發度坐低,然後迷迷糊糊咁問佢地上嚟做乜,凌嘯峰就話,個化驗報告出左

聽到呢句,我即刻醒晒!然後話“咁快出左!?”

軒轅皓搖搖頭同我講“天晴,唔快啦,而家係凌晨12點半!”然後伸手遞左碗粥比我

我接過,即刻食左啖“嗯,好食!”滿意咁笑一笑,就開口問“咁入面到底係啲咩嚟?”

凌嘯峰眼神古怪咁問我“你確定要而家知?”

我拎起左條油炸鬼咬左啖,然後話“個樽咁細個放得啲咩丫,快啲講啦!”,諗起自己成半日無食野,唔怪之得咁餓啦!我快速咁咬多幾啖,但係凌嘯峰講嘅野,差啲令我哽親

佢話“入面裝嘅除左有骨灰,仲有屍油!”





“咳。。。咳。。。”吞到一半嘅油炸鬼比屍油兩個字搞到唔上唔落

軒轅皓即刻走過嚟拍下我個背脊,而凌嘯峰就馬上遞左杯豆漿比我飲

飲左幾啖之後,我終於都舒服晒,但係手上果條油炸鬼已經比我拋棄左響枱面

我望一望凌嘯峰,竟然見佢咬緊條油炸鬼,仲咬得得津津有味,真係。。。有啲衝動想打獲佢!

軒轅皓見我望實凌嘯峰,就扯開話題咁話

“根據今日晏晝嘅調查,送公仔比細路果個女人叫宋娟,響一間物流公司度做野,表面上好似無咩可疑,但係軍仔今日跟蹤過佢,見佢空手入左去一個貨倉度,出嚟嘅時候拎住一大袋野,而袋野嘅外面,畫左道符咒!”

凌嘯峰剛好食完條油炸鬼,接住話“軍仔影左張相send比我地睇,我地對照過道符咒,同拎去化驗嘅果個黑色樽仔外面所畫嘅係一模一樣!”

聽到佢地咁講,我有啲疑惑咁問

“咁即係宋娟就係製造鬼娃娃嘅兇手?而佢今日去果個倉庫就係造鬼娃娃嘅地方?咁果個符咒究竟係咩嚟?有咩用?”

軒轅皓見秦天晴好似對個符咒好有興趣咁,就拎部電話出嚟,打開軍仔今日send過嚟果張相,然後指住個袋上面話

“呢個叫《拘魂咒》,簡單啲嚟講,係將啲鬼魂封鎖住響一個地方,然後利用驅鬼術驅使鬼魂為佢做事!至於宋娟係咪果個製造者,我地對呢個有所保留,但係可以肯定嘅係,果個倉庫極有可能就係製造鬼娃娃嘅地方!”

講到呢到,佢突然望住我,認真咁話“所以等天光之後,我,你,仲有呀峰,三個人去倉庫度探一探!”

清晨七點半鐘,我地三個就全身武裝咁企左響個倉庫嘅不遠處,準備入去視察!而今次亦係我咁大個女以嚟,第一次全身上上下下包到實一實,只係包淨兩隻眼咁係度周圍走!

至於點解我會搞成咁嘅樣,係因為出發之前,軒轅皓話“我地一陣所去嘅地方,假如真係製造鬼娃嘅基地,咁果度一定會有屍體,骨灰,屍油,甚至係其他邪術會用到嘅野!所以我地要做好防禦嘅準備!”

我地響度監視一個鐘,都唔見有人出入倉庫,於是軒轅皓就發出指令, “出發!”,然後就慢慢咁接近個倉庫門口,而我同凌嘯峰亦都迅速咁跟隨佢

當行到過去,軒轅皓舉起隻手準備推開對門之際,我個心即刻緊張起嚟!不斷祈求千祈唔好有啲咩嘔心嘅野響度丫!

隨著對門慢慢咁打開,出現嘅並唔係我所驚嘅嘔心野,而係令我同凌嘯峰驚訝到同時講左句“唔係掛!?”,就連軒轅皓亦都皺晒眉頭嘅震撼景象!!

出現響我地眼前嘅係。。。數以千計嘅洋娃娃!
已有 0 人追稿