透過門外嘅光線,我地可以清楚咁睇到,響倉庫嘅地下度,佈滿住各式各樣嘅洋娃娃,有高有矮,有大有細,甚至有男有女。。。而佢地嘅表情基本上係一模一樣,都係帶住令人毛骨悚然嘅笑容

呢個情境除左令我地震驚之外,仲令我地聯想到一件事!

如果呢啲係普通嘅洋娃娃,仲未被邪化嘅話,咁呢個情況只係會令人覺得詭異,但係如果呢啲全部都已經邪化左呢?然後同時流入巿面呢?後果簡直就係不堪設想!

佢地不斷咁殺人奪魂,奉獻比所謂嘅大人,到底有啲咩陰謀!?

製造佢地嘅人,到底有啲咩目的!?





震驚過後,我地互望一眼,就決定入去繼續視察!

無辦法,我地係靈界警察!既然發現左呢度,我地就應該去追查一下!響件事去到最壞嘅情況之前,搵出個方法去制止佢!

軒轅皓依舊行響最前面,凌嘯峰壓後,我就響中間比佢地前後護住,而隨住我地入到去,凌嘯峰閂埋對門之後,成個環境都變得非常陰暗,得番天窗射落嚟嘅微光可以照明

我地企左一陣,等對眼適應左個環境之後,就準備出發,但係倉庫入面根本就無路可以行,密密麻麻嘅洋娃娃幾乎霸佔晒成個地下,如果我地要過去對面嘅話,就只可以從娃娃與娃娃之間嘅空間慢慢咁穿過去

呢個係唯一嘅一條路,無辦法之中嘅辦法!於是我地就開始依照呢個方法,一步一步咁前進!





光線不足,而且寸步難行,再加埋詭異嘅氣氛,令到我個人處於一種極度緊張嘅狀態!

雖然我個心不斷咁安慰自己,有軒轅皓同凌嘯峰響度,一定唔會有事!但係每當我踏出一步,都要不停咁望實腳踝旁邊嘅洋娃娃,而抬起頭果陣,又會見到佢地全部都望住我詭異咁笑嘅時候,我真係好驚!

我會諗,如果佢地突然之間郁,然後同時間一齊襲擊我地,咁我地應該點做呢!?

或者,因為我個人過份緊張,令到個人情緒好唔穩定,被身前嘅軒轅皓感應到,所以當我向前行多一步嘅時候,我右手嘅拳頭,就馬上被佢捉住左!

我抬起頭,不解咁望住佢,而佢就同我講左句“放鬆!”,就拉住我繼續向前行,不過多得佢呢一拉,我剛才仲好慌亂嘅心,已經慢慢咁穩定落嚟





經過我地不斷咁左穿右插式前進之後,我地終於都穿過左呢片詭異嘅娃娃海,然後開始慢慢咁行入去倉庫嘅深處!

而隨著我地越行越入,周圍嘅環境亦都變得越嚟越陰暗!天窗所透射落嚟嘅光,已經開始照射唔到呢邊嘅位置!

呢個時候,我總係覺得陰風陣陣咁有啲凍凍地!本來我以為係自己嘅心理作用,點知原來個溫度真係低左!因為軒轅皓突然停低,然後舉起左隻多功能手錶比我地睇,顯示呢度只有12度!

12度!?響無開冷氣,而家又唔係冬天嘅時候,根本就無可能發生!呢度嘅情況已經變得越嚟越詭異!我地再次互望左眼,走?定繼續?

軒轅皓同我都覺得先撤退會好啲,因為我地無辦法知道,前面會遇到啲咩!但係凌嘯峰指住不遠處果對門,提議不如入埋去睇下先至撤,結果,我地都係向住果對門進發

當我地行到過去,企響對門前面嘅時候,氣溫已經跌到越來越低!就響呢個時候,軒轅皓突然拎出三張符紙,將其中兩張遞比我地,然後話

“用靈力催動佢,會暖啲!如無意外,入面應該會更加黑,所以由而家開始,用靈火照明!”

我同凌嘯峰聽到之後,就伸手接過,然後催動靈力,果然全身即刻變得暖晒!望一望佢地都已經準備好靈火,我都趕緊伸隻手掌出嚟凝聚我嘅小火球





軒轅皓見我地都準備好之後,就推開面前呢對門,而推開左之後,我真心後悔啱啱做咩唔捉凌嘯峰走!

入面無血腥,無內臟,唔算嘔心,但係好恐怖!

因為太黑,我地無辦法睇到太遠嘅地方,但係以靈火所照耀到嘅地方,我地可以清楚咁見到,房門嘅左右兩邊,都放左一層層嘅貨架,而貨架上面所放嘅係。。。一具具全身赤裸嘅屍體!

呢間房,令我聯想到”殮房”呢兩個字,而呢一刻,大家都能夠百分之百咁確定,呢個係製造鬼娃娃嘅基地!

我同凌嘯峰望實軒轅皓,等佢發出指令,應該繼續?定係徹退?而軒轅皓諗左陣之後,就望住我,同我講左句“驚就捉住我!”之後就行左入去

我諗左諗,驚係驚,不過應該都未至於驚到捉住你嘅程度掛!始終更血腥嘅又見過,連更嘔心仲識行識走嘅都見過,呢啲雪到僵硬晒嘅,應該還好掛。。。

呢個時候,我係咁樣諗,但係行左陣之後,我發現我嘅想法實在係太天真!





面對前面見唔到路,後面又唔知行左幾遠,而左右兩邊都係死屍,呢一刻,我有啲不安,唔知點解我總係覺得,佢地會睜大雙眼望住我地!

就響呢個時候,我手上帶住嘅果條平安繩,忽然之間斷左,跌左落地下!

我輕呼左一聲“等等!”,然後馬上踎低去執,同時心諗“嚴正晞你肯定又比人呃啦,條平安繩咁易斷!”

等我執番之後,就求其塞左入褲袋度,然後抬起頭諗住企番起身繼續行,點知。。。我見到一啲好奇怪嘅現象!

如果唔係我踎低左嘅話,根本就唔會留意到,每條屍嘅背面,都刻左一個符咒,而果個符咒,正正就係軒轅皓所講過嘅《拘魂咒》!

咁如果個靈魂真係比個《拘魂咒》封住左響個身體入面嘅話,即係。。。呢啲所謂嘅死屍。。。隨時都會翻生!?

我被自己嘅假設嚇到腳都軟埋,一時之間無辦法企番起身,甚至凍到成個人不斷咁震!就算有軒轅皓個符都無用,因為呢個凍,並唔係肉體嘅凍,而係心寒!

心入面傳出嚟嘅果種寒意瞬間遍佈全身!
已有 0 人追稿