《90後銀行小妹甩轆記》: 《入行》

當年讀完個廢科，就嗱嗱聲去搵工。見同學個個都走去報MT、GT等Trainee Program，根據港媽家訓第一條，當然唔執輸報埋一份。如是者，基本上各大公司只要是請fresh grad的，都會收到小妹的精美CV一份，附養眼車頭相一枚。
 
其實現在回想起來，許多這些被大公司吹噓為Fast Track的所謂Program，有幾fast track呀？為的是吸納一批廉價新力軍跑數。當然，有極少數的公司是真心培養一批未來的管理層，能夠被選中的，可算是best of the best。
 
可惜，小妹只空有一副可愛性感的驅殼，最後只能夠轆入某大銀行的Fast Trap Program，如何萬劫不復，便是後話。
 
被招聘為跑數新力軍一份子後，我並未即時被推落大海捉魚，而是先學習如何捉魚。我非常欣賞呢套「授人以漁」的做法，在短短的數星期Training期間，我已快速掌握不同漁具的基本用法，例如保險、基金、結構性產品等等，以及「魚餌」soft-selling skill。
 
當時好天真的我，期望能憑著學會的一套捉魚大法大展鴻圖，有朝一日成為出色的銀行家，幻想終有一日可以對家母大叫「呀媽，我得咗啦！」，好周星馳，但誰說這不是每個畢業生對自己職業生涯的憧憬？
 




我的憧憬就在最後一堂的Training被幻滅。
 
一眾新力軍獲悉自己被派的分行及即將要背負的任務(即是Target)，剛開始的Target是推銷信用卡，應該無難度吧？望著我們一眾初生之犢懵懂的樣子，呀靚仔Sir個樣奸奸地，手中晃著一張宣傳單張說：「你地叫Banker，中文譯銀行家，係咪好威威呢。」新力軍們相視而笑，似是頗滿意這個虛銜。
 
「嗱，我以過來人身份話你地知，你地唔好以為落行之後自己就真係銀行家，其實大家同街口個電訊「街霸」無分別。」What？
 
「試過有師奶走過嚟問我，申請信用卡送嘅麵包機size幾大？每次可以焗幾多個麵包？值幾錢？……無錯，你地其實係sell緊信用卡(宣傳單張)上面個麵包機咋！」Are you kidding me?
 
事後我發現呀靚仔Sir原來無講大話。
 




「呢幾星期既課堂你地吸收到幾多就得幾多，大家之後好自為之啦！」原本我仲對即將落行滿心歡喜、充滿期待，但聽到曾是Top Sales，風魔萬千師奶的靚仔Sir一席話，我不禁開始擔心我會否浸死於茫茫大海。
 
後記：當小妹第一日落行見到大堂個Display換成了單車，個腦只有「點解嘅？點解嘅？說好的麵包機呢？」枉我還背好了它的spec……