《每個人點都要食一次檸檬》: 獨自一人既時候

呢一種感覺無逗留係我心入面好耐，因為中學有好多新鮮事，都係我地第一次接觸，而呢一種新鮮感係會上癮。

「喂！你今日放學留低溫英文呀。」西西佢拍一拍我張枱，同我講。

「今日要練波呀，前幾日咪溫左囉。」我hea應佢。

「你講過既野都唔算數。」佢有d嬲嬲地。

「咩喔，我又唔係唔溫，聽日留低溫得唔得呀？」我好聲好氣咁同佢講。



「你留就留飽佢啦！廢是彩你。」佢之後又係成日無搵我。

我以為佢會好似之前咁，嬲一陣無事啦，點知……

係我放學既時候，我當然好似上次咁去練波，雖然都會有d唔開心，因為佢嬲左我。

但我覺得我無錯呀，今日真係唔得呀嘛。我只係覺得佢好無理取鬧，咁都好嘈一餐架。

我一放學就衝左落球場，都無理到佢，事實上我的確趕時間，因為遲左落堂。



練完波，換好衫，同上一次一樣，個天都黑曬。

我諗住佢會係門口等我，同之前一樣。

現實係，我一出學校門口，唔見佢既蹤影。

果一刻，我第一次有失落既感覺。

因為我對佢有期望，有期待，亦理所當然咁希望呢個期待會出現。



因為果陣時既溫馨實在太美好，令人忍唔住想再重溫一次。

我依家好想佢突然跳出黎，俾個驚喜我。

我留係學校門口等，等佢出現。

上一次佢係度等我出黎，今次我等返佢，好公道呀。

時間半個鐘半個鐘咁過，等左成個鐘佢都唔出現。

我終於明白，原來等人係好辛苦，由其時果陣時無手機可以玩。

等一個人係需要用好大既耐性，你少咁d耐性都會搞到你癲呀。

等左咁耐都係得個吉，我決定要返屋企，都晏架啦。



我行返當日既果條路，沿路我都係度執緊野，執緊咩？

執緊我地既回憶。

一幕一幕咁係我個腦海咁浮出黎，而且個畫面仲好清晰。

我仲可以見到前面就係我同埋西西一齊行返去既畫面。

一切就好似岩岩發生咁，好自然。

兩個人一齊既時候，我意識唔到我係鐘意佢。

一個人既時候，我想我身邊有佢。



我依家好想西西係我身邊，人真係好犯賤。幾個鐘頭前先怨人地無理取鬧，依家就想人地係度同你無理取鬧。

種樹根，得樹果。你點對人，人點對返你。

「無事既，聽日見返面就無事架啦。」我咁樣同自己講。

一樣既路，一樣既地方，但只有我一個。

好似少咁d咩咁，係果種歡樂既氣氛，果一種甜蜜既空氣。

我可以更加肯定既係，自己真係鐘意左西西。

西西佢唔靚，平平凡凡，我都唔知點解自己會鐘意佢。

但此時此刻我好想佢係我身邊，我需要佢，即使佢再平凡，我亦唔介意。