《每個人點都要食一次檸檬》: 習慣的可怕

第二日我返到學，緊係早d返去啦，去同西西和好呀嘛。

但係我一早入課室，卻唔見平日佢既蹤影。平時呢個鐘意佢係係度架喎，點會今日…… 唔通佢專登避我？所以先唔早返？！
 我一路等，一直望住個門口，想下一個返黎既係佢。
 一個接一個既人返黎啦，都唔係佢黎既。

「迪迪仔！做咩野成日望住個門口呀？思春咁款。」陳嘉榮走過黎同我傾計。
 呢個係平時同我玩得幾埋既男仔黎，但本迪少今日無心情玩。
 「無呀，好眼訓發緊夢姐。」我特登打左個一眼就知好勉強既呵欠。「俾我訓陣啦。」
 佢見我好扮野咁，都識趣咁走左，仲留低一句，「琴日一定又唔知打左幾多次飛機啦。」


 我無理到佢，我訓係張枱度，但一直望住個門口。
 直到打鐘，佢都係無入到黎，我心諗，佢搞咩呢？
 如果係依家，whatsapp下佢咩事就得啦，但果陣時中一，我手機都無呀！
 班主任入黎，又係要開早會呀果d野，交下功課咁。
 班主任姓鄭，老男人黎，老而不黎既。
 「西西同學佢因為加拿大既親戚有事，所以向學校請左2個星期既假。所以要請呀林迪一幫手留意下佢d功課。」鄭sir叮嚀我。
 呢下真係晴天霹靂啦，以前既聯絡方法係咁架啦，無電話無電腦無facebook，完全搵唔到佢。
 唯有係靠其他人知道佢既消息，中一既時候又點會想像到依家既資訊咁發達呀？
 我正係知，我依家自己一個人坐，好悶！
 係佢出走果兩個禮拜，開頭果一兩日真係好唔慣。


 上堂無人陪我傾下計，無人可以俾我串，無人可以俾我玩。
 我依家知，西西之所以琴日咁想我留低，係因為佢知道今日佢已經唔係度。
 早知道琴日就氹下佢啦，依家連氹佢既機會都無，都唔知佢返黎點架？
 一個禮拜我都係咁樣生活，無左西西。
 習慣係一種可怕既野，無論係咩都好，當你習慣左一樣野，你就唔想佢改變。
 只要有一樣你可以keep住做21日，根本上你已經形成左一個習慣。
 我由習慣左西西係我身邊，到習慣左佢唔係我身邊。
 雖然有時候係會掛住佢，總係希望隔離可以有個人，但基本上我既生活都係無咩太大改變。
 就今日炸嘛，班主任話要調位，我同西西隔開左成行，隔離坐左個唔知咩女仔。
 睇落去宅宅地，唔講野，可能又係一開波啦。


 但係我已經無動力去同佢fd，因為真係好攰……
 西西返左黎之後，都無再好似以前咁。
 自從佢一返黎調左位之後，佢無再主動搵過我，我自己都係唔夠膽搵佢。
 交帶完d功課根據就無講野咁制，佢反而係班上慢慢活躍上黎。
 其實佢份人熟左就幾活潑下架啦，但對我都係冷淡。
 有時都無傾下計，但我知道，唔再係以前咁。
 溫馨時光已不再，談笑風生已難存。
 你可能會話我，係咪男人黎架，唔想人地咁冷淡就去搵人地。
 我可以同你講，呢一番說話我都可以一模一樣咁同返你地講，我自己都知啦。
 但做就難呀嘛，我都識同人咁樣講，但最後要去搵西西既係我，not you。
 所以中一既我由得佢無疾而終，大個左，中一既野其實好多已經唔記得左。
 發生過咁既事唔代表d咩，只係…唯獨得我自己一個惦記住咁解。