《我獲得一個願望，我選擇左係學校做一次男神》: 第十章：力挽狂瀾

輸左一局既我，好灰心，亦都好攰，但係眼前仍有學生會要處理；全校只有阿峰同阿軒參選，輸贏，就要睇今鋪。

話說已經好耐無揾穎心，有啲掛住佢，雖然佢有黎睇上次既比賽，但係睇完就走左，個樣仲好似有啲唔開心咁；講到上次比賽，的確，我個球射失左，我亦都好自責，好在我既隊友體諒我，雖然輸左，但係我同佢地講，我仍然願意一個禮拜同佢地踢一次波。
男神輸左既感受係點？比起毒男落敗痛苦十倍啊！唔能夠擺晒樣話你好唔開心，希望人哋可憐你；你要保持自己笑笑口個樣，但係個心揪得好痛，我覺得自己好唔知羞，我討厭做男神！

「阿明，唔好灰心，今次你最好既巴打我同男班長都係到，相信我地，一定會當選到學生會。」其實我更加擔心阿峰，佢究竟當唔當選到，話晒阿軒係學校都有一定既名氣，又有跟班；阿峰只係一個唔起眼既男仔...
「一個禮拜之後就係質詢會，而當日既lunch time就係投票時間，希望大家準備一下當日既對答，係生係死，睇個日架啦。」阿峰搭住我既膊頭，嗯，我都要盡全力，再輸一局的話，後果真係不堪設想。
「見係兄弟先益你，呢份係質詢會既稿，唔洗你預備啦。」下，我無諗過係我出去講喎。
「嗱，你知架啦，我出到去就死機架姐，所以我都係後面提下你啦。」果然係好兄弟...
唉，份稿長到乜咁，我點背啊大佬。





當我行出班房門口，我見到穎心，好耐無咁近面對面過啦。
「Hi，穎心，好耐無見。」我笑住同穎心打招呼，但係佢面有難色咁。
「Hi，我有野做，下次再傾。」我拉住佢隻手，佢都無放開手；當佢再令轉頭既時候，眼淚已經沾濕臉龐。
「做咩...」佢無答我，就攬左埋黎，仲雙手緊抱我條頸，差啲搞到我窒息。
「咳...咳。」
「哦，sorry啊，攬到你咁實。」佢雖然重拾笑容同我講，但係我感覺到，佢心裡面仍然有一絲不悅。
「阿明，你可唔可以為我贏到阿軒？」我無講多餘既野。
我點頭示好，再將穎心抱進懷內。只係希望，呢一次，唔係我最後一次攬到穎心。





雖然穎心唔係太鍾意阿軒，但係為左遵守承諾，逼不得已，都要委屈一下，亦害怕穎心想要逃跑既時候，阿軒佢會再次做啲傷害穎心既野。
「我真係趕時間啦，應承我，贏到阿軒。」佢回頭再次離我而去，令我感覺到無比的失落感，更可能係永遠的失落。

「大家好，我係候選內閣The One既副主席，白志明。」可能大家都估唔到我呢個男神會參選學生會，台下既歡呼聲都幾高漲下。
「以下係我地內閣既政綱簡介，當選後...」講完一大輪野之後，返去後台聽阿軒佢地講，個口真係乾到一滴口水都無。
「嗱，飲啖水先啦，講得好好啊今次。」阿峰再次搭住我膊頭，其實我都幾鍾意巴打搭住我膊頭。

「大家好，我叫王子軒，以下會係...」呵，原來佢個名叫王子軒，真係自大。
阿軒講完一輪之後，亦得到唔少掌聲，話晒都係學校學生「大佬」。





兩位mc出左黎講野：「跟住落黎，係大家最期待既環節，係雙方辯論既時候，同學們拭目以待。」哇，啲掌聲多過晒我同阿軒出黎講野個陣，成班花生友...
「我想問，你話你會供應借貸服務，你點確保你有一定既資金，同埋同學會攞啲錢黎做咩？」阿軒先拔頭籌，一下子射左落黎。