《我獲得一個願望，我選擇左係學校做一次男神》: 第十一章：首嘗勝利

「請副主席白志明回答。」指定我回答？啲福利唔係我諗架喎。

唉，頂硬上啦！「嗯，首先，我地好似外面既借貸公司有背景審查，根據同學既品行去決定借貸，而我地內閣雖然得五個人，但係我地為左呢個貸款服務，合力貢獻左二十萬出黎，而真與假，當選之後，同學們都可以嘗試呢個服務。最後，借貸，都係講個信字，我地相信既只會係台下所有既同學，多謝大家。」我連個「家」字都未講晒，台下既掌聲已經轟如雷聲，亦夾雜「好！」等等認同我地既聲音，好彩，今次唔輸比阿軒。

「到The One學生內閣作出質問。」
「好，我想問，你地學業輔助福利，點樣幫到我地同學呢？」我提出問題。
「我地會有同學，包括我在內，每日租借圖書館兩個鐘，比有需要既同學揾我地問功課，溫習等等。」呵，係我還擊既好時候。
「但係，我知道你地內閣既成員，連自己既學業成績都未搞掂，點樣幫助其他有需要既同學啊？而且，我唔係亂講，我係同佢地同班，所以我清楚知道佢地既成績如何。」我一個嘲笑既笑容送比阿軒，佢望都唔敢望過黎，成個內閣既人凈係望住地下。

台下討論既聲音越黎越大，當然係質疑佢地能力既聲音啦。




「台下既同學請安靜，留心台上既回答。」
「唔好意思，我想請返The Flame既主席回答。」以其人之道，還治其人之身，比佢感受下奚落人既滋味。
「我...」
「既然你答唔到，不如等我幫你答啦。」全場靜晒，期待住我會講啲咩。
「你從來無諗過要當選！唔係既話，你憑咩話你地內閣可以幫到人，連舉手之勞，幫助同學都無能力，你仲點樣維持到整個學生會？」
「總括而言，你地整個學生會都係無能！」
「你！」阿軒已經比我激到心臟病發，我都費事再講落去。
「mc，佢講野唔注意言詞，攻擊我地！」即使佢向mc投訴都無用，我講既都係事實。
「最後，多謝同學們既支持同信任，請投票比我地１號候選內閣The　One，The Only One，多謝！」
汁埋個尾彩，再次獲得全場掌聲，估唔到，今次掌聲比起mc話要開始辯論既時候誇張。同時我望到穎心，佢亦對住我笑，睇黎佢都認同我為佢所做既一切，當然，應承左穎心要贏，就一定要贏！





最後半個鐘，都係我地壓住The Flame黎打，佢地野都唔敢講，而我地The One講既每一句說話，都能夠取得同學們既歡心，每一個人既掌聲。
成個質詢會順利完結，亦都係投票既時候，我地兩個內閣出到禮堂外面既室內操場，亦都係同學出去門口食lunch既必經之地。
雖然我地人少，唔能夠點樣分散拉票，但係公道自在人心，有啲野唔洗夾硬黎，反而有時靜候，先係最好既決定。

雖然阿軒係質詢會輸左比我，但係憑佢人脈都唔少人投票比佢既內閣，我最期待既人終於黎到，穎心，究竟你會投票比邊個？
佢無望我地其中一個，只係直接入左佢投票區，投完就返左上班房。
投票結果會係聽日早會宣布，我地The One五個人都好緊張，究竟憑住我地五人之力，贏唔贏到阿軒呢。

到左第二朝，差唔多成晚都訓唔著，輾轉反側，期待緊早會上既結果。




返到學校，大家見到我都同我講聲「加油！」而家講都無用啦，結果已經定左，不過起碼比到啲信心我既。

副校長講完一大輪野之後，終於到同學們最期待既一項宣布啦，緊張到我隻手濕晒。宣布既係由今屆學生會，不過我唔識佢，但係佢地學生會好做到野，希望我地當選到既話，都有咁既質素。

尋日係投票選學生會既日子，結果已經係我手上，我現在公佈兩個候選內閣所得票數。
「１號候選內閣得票３６７票，嗯，高過預期。而２號候選內閣所得票數為１９３票。換言之，一號候選內閣順利當選成為今屆學生會，恭喜！」同時亦得到全校既掌聲，呼叫聲。
「Yeah!!得左啦我地！」我即刻攬住男班長同阿峰，仲差啲喊埋出黎。
「都話架啦，要贏既，我地三個巴打齊心實贏到！」
「多謝你啊，阿峰，你幫我贏左。」我衷心多謝阿峰，幫我贏返一局。
「唔好唔記得，唔係凈係為你架，我都同阿軒打賭左。」但係既然阿軒輸左，即係唔能夠接觸穎心，仲要永遠離開香港；我諗佢一日未同我鬥埋最後一局，佢都唔會認輸。

去到小息既時候，阿軒過黎同我講：「我地仲有一局，未到最後一局，都唔知邊個先係贏家。」
「好，拭目以待。」

最後一局係由穎心去決定。




但係，係我當選之後個日，佢就已經無再係學校出現。