《我獲得一個願望，我選擇左係學校做一次男神》: 第十二章：消失的承諾
由於穎心係我當選之後個日離開左學校，聽聞已經退埋學，代表最後一局既決鬥要無限期延遲。
每一日，縱使風吹雨打，我都願意企係班房門口等佢，呢到係我同穎心，最後一次單獨見面既地方；即使以後唔能夠再見，但我相信，我同穎心都唔會
忘記，相擁時既一刻。
而今日已經係穎心離開左第六個月，音訊全無；係我心目中成為左最重要既一位之後，卻消失得無影無踪。
「阿明，穎心走左咁耐，你都係放唔低咩？」阿峰係我身邊問我。
「放低？！你明唔明啊？我應承左佢，要贏到阿軒阿，而家只係差一局...」我每次諗起穎心，我都不禁流下男兒淚，或者係班房門口既個一次擁抱係最後一次。
「Sorry，語氣重左。」係巴打面前，我都係唔應該去到咁盡。
「其實，阿明。」我抬起頭望返住阿峰。
「我唔係叫你放棄，你可以繼續等，但係作為你既巴打，我想你知道，面前有好多野等緊你；你係咪諗住日日返學等放學，然係企係班房門口等穎心返黎？你咁做究竟有咩意思？要醒下啦，阿明，就黎大考，你係咪想留班；就算你咁樣等到穎心返黎既時候，人哋可能入左大學啦，但係你中學都未畢業，係咪要人哋照顧你啊？」我再次灑下男兒淚，我唔係因為被阿峰罵而喊，而係，我真係好掛住穎心，究竟我地既將來，仲會唔會見到大家...
「多謝你，我無野啦，我會聽你講，點都好，努力讀埋個中學佢先，唔想比穎心擔心我。」每一次佢搭我膊頭，我都能夠感覺到無比既溫暖。
日復日，可能真係太忙啦，不論係學生會，或者係眼前既學業，都令我唔能夠再每一日企係班房門口等穎心。
「阿明，幫我處理下呢位同學既貸款。」
接過文件後，我打開黎睇。
姓名：洛穎心
申請日期：２０１７年１月３日
咦，個日咪即係穎心消失個日囉，做咩要同我地借貸，點解會擺到而家先比我地出黎既？係我頭上有無限既問號出現左。
睇下申請原因先。
「你好啊，我係穎心，如果睇緊既唔係阿明既話，麻煩交比佢啊，我有野想親自同佢講啊，唔該。」
「白痴明，恭喜你當選啊，當你睇到呢封信既時候，我已經離開左香港啦。因為，我要去英國讀書同結婚，我特登叫阿峰遲啲先比你睇，費事你發晒顛啦。阿明，對唔住啊，我粒聲唔出就去左英國，仲要去英國結婚，你唔好嬲啊，呢一切都係我父母安排，我真係唔想同個個男人結婚架，又惡，成日罵我；但係白痴明你就唔會呢，我知道你好錫我，可惜，對既人，錯既時間啦。雖然我係英國都係讀緊中學，但係我一讀完大學就要結婚啦。你係一個好好，係超級好既男仔，我都好鍾意你，只可惜緣分無將我地拉埋一齊，但係至少我唔係同個個衰人阿軒一齊。放心啦，我會好好照顧自己，你都係啊！唔好凈係掛住追女仔，要比心機讀書，第時就可以飛過黎睇我婚禮。男人流血不流淚啊！睇完封信唔準喊架。」
「最後，只能夠講聲對唔住，亦都多謝你，阿明。」
由一開始我已經忍左好耐，最終都係忍唔住，我既眼淚已經沾濕左成張紙，我差唔多流盡我一生既眼淚，點解？點解要咁對我？點解係多謝我，而唔係我愛你？我地既關係就係要停留係呢一段說話到？明明大家都鍾意大家，點解要係我飛過黎睇你婚禮，而唔係我同你一齊舉行同一個婚禮啊！
我放低文件，上到天台，亦都係最初同穎心表白既地方。
係呢到，我成功做左男神。我諗，如果我最初無選擇做男神，我會傷得如此痛嗎？或許，我只係睇住穎心嘻嘻哈哈同佢既朋友過每一日，睇住佢上堂專心聽書個樣，甚至係佢lunch time訓覺，我都心滿意足，唔需要知道佢要離開香港，去英國結婚。
「唉。」
「明仔，唔洗灰心。」
「又係你？」無錯，係從前毒男既我。
「穎心要結婚，你忍心咩？」
「大佬，你玩野咩，又話穎心注定係我，而家就注定同人結婚，唔忍心又可以點啊！」我對住以前既我大喝。
「冷靜啲先，我地天仙從來都唔呃人，穎心的確注定係你架，睇你原唔願意改變眼前既事實姐。」同佢講野真係講到興興地。
「你都話係事實啦，咁點改變啊！」我轉頭一走，想落返去個陣，對門自己拴左，仲要鎖埋，真係...
「請問你想點呢？」
「想點？咁便宜你，比左個男神你做，你而家同我放棄穎心？」
「我唔想再做男神啊，我寧願你比返個毒男我做。」
「唔好意思，毒男已經被我封印左，除非...」
「除非咩啊？」
「你追返穎心。」我真係無佢咁好氣，我打爛個鎖，行返去學生會間房算。
「唉，呢個阿明真係無鬼用。」
入返去，阿峰即刻行過黎。
「對唔住，係穎心叫我咁做，我都無辦法...」
「算啦，過左去啦，我會好快忘記呢啲人架啦。」講出黎既時候，個心真係揪到縮埋一舊，痛到喊都喊唔出，點解我可以講啲咁既野出黎...
時間飛快消逝，我諗呢句野，係中六既先能夠講得出呢句野。
符符碌碌咁升到中六，經過一個暑假，我都將穎心放低左，但係最慘既係，每一次突然既想念，會令我喊到好似痴線佬咁，甚至係地鐵喊都試過。
你問我，做左男神，無女仔追你咩？呵，有我都只會拒絕，拒絕得多，啲女仔都唔敢再同我表白，因為知道我唔會接受任何一個女仔。係我心裡面只係存留左一個位置。
上到中六既我，學生會既工作已經差唔多完畢，係時候交棒，亦都要開始比心機讀書。無錯，我都係決定左儲錢去英國睇穎心既婚禮。