《我獲得一個願望，我選擇左係學校做一次男神》: 第四十章：愛，像一陣風

「阿明成日同我講你啲野。」我聽完呢句，都坐低左，因為我知道呢個男人應該有好多野同我講。

「跟住呢？」

「佢好愛你。」聽完呢句，我已經覺得係個笑話，愛我？哈。

「唔好講笑啦，阿叔，我唔知阿明係咪叫你幫佢講好說話，但係點都好，我講過既野係唔會收返。」

「Ok，我唔理你收唔收返，同埋佢無叫我幫佢講好說話，但係我凈係知道有野要話比你知。」





「好，咁你講。」

「係呢個月，阿明好傷心。」嗯，已我無關。

「夠啦，佢都有女朋友架，唔好講到佢好似好慘咁啦，其實我先係最慘個個啊！」

「你知唔知，個女仔搶走左阿明，本身我同阿明大家都對大家有好感，不斷培養感情，甚至去到一個曖昧既境況，但係就係一句說話就可以搶走左阿明。」

「你可以話，我同阿明都未開始拍拖，阿明根本就唔係我邊個，但係我可以話你知，感情唔係咁樣衡量，點解阿明可以係醫院識左個護士，唔夠幾日，一個禮拜，就一齊，我呢？我識左明仔都唔少日子啦，點解唔係我先啊！點解人哋夠靚，就可以一齊，佢係咪當我只係個妹...」我真係越講越痛，喊到唔想講野，講真一句，我對阿明既感情，已經超越幾個月既相識，甚至遠遠高過幾個月，但係就憑一個局外人，入侵我同明仔既感情，就咁比佢粉碎，但係我對阿明既愛，始終，如一。






「我叫阿明，不過你都無需要知道我個名，我諗之後都無必要再同你傾計。」即使阿明講到咁串，光仔胸襟仍然廣闊，帶著微笑。

「我想同你講，芊雪唔會係你既女朋友，即使而家係，不過，將來，好快就唔會再係。」聽到呢句之後，光仔臉色有變，收起笑容，認真起黎。

「你咁講咩意思。」

「有無聽過一句野，唔係你既野，就唔會係你既，就算你用咩方法都好，佢始終會離你而去。」

「你錯啦，阿雪而家就係我既，你憑咩話唔係我。」





「愛情來得太快就像龍捲風，聽過未？」

「當然聽過啦，周杰倫首龍捲風阿嘛。」

「咁下一句係咩？」

「不能承受我已無處可躲。」

「錯，係愛情亦會像龍捲風咁離開你。」

「一個巧合，一個無緣無故既戀情，我唔相信會持續得耐，再睇下其他由朋友，曖昧，然後先拍拖既情侶，時間一定比龍捲風愛情耐，拍拖唔係比你互相認識，係朋友，曖昧時段先係互相認識既時機，拍拖係戀愛，戀愛係將你另一半既好與壞都去愛，包容。」

「你好啦喎，而家邊個先係阿雪男朋友啊，你講完都改變唔到，我愛阿雪，阿雪都愛我，呢個係事實，我唔想再同你講野。」光仔起身行返去阿雪到，但係阿雪已經哭成淚人。







「阿雪，做咩喊得咁犀利啊？」

「阿叔，你對阿雪做過啲咩黎！」

「無野啊光仔，我地走啦。」芊雪望一望我一眼，就再次離我而去。




「阿雪，做咩喊啊，話比我知啦。」

「無野啊，頭先個阿叔講下佢自己經歷比我知，搞到我好感動啫，咁你呢？阿明同你講左啲咩？」呼，其實阿叔根本就唔係講自己經歷，只係唔想光仔繼續問落去。





「哦...我...佢話要好好照顧你囉，係咁啦。」哇，你講大話真係屎到，不過大家都係欺哄緊大家，都無權話邊個。

「好啦，我地去行陣街啦。」

「但係今日星期日喎，又熱，條街又多人，睇下，我件衫都濕晒啦。」



「其實你有無睇到阿明啲信息。」

「信息？」啊，我記得起啦，阿明係我離開醫院無幾耐，就whatsapp我，但係我無睇到。

「我無...」呢個阿叔又會知道阿明傳信息比我既。

「唉，唔怪得。」





「做咩？」

「不如你而家睇返啲信息，或者我就唔洗再講野。」

我打開電話，揾返被封存既阿明，其實佢傳左三十四個信息比我，而我只係睇左一個，就係對唔住。

我再向上拉，一直睇，都覺得無乜野，但係見到一句打進左我個心既說話。

「芊雪，點都好，我得返一年命，比我人生一個最美好既一年，可以嗎？」

點解，點解你而家先講！第一次做檢查，醫生比完報告你，你都無話比我知，我都係因為怕你唔想講，先唔問你，但係你而家真係臨死一刻先同我講，咁樣有咩用...

「咳，其實佢好慘，佢諗左好耐話唔話比你知。」





「佢諗過要離開香港，寧願客死異鄉，永遠消失，都唔想比你知道佢係一年內就會死。」

「對唔住...」

「好傻...嗚啊。」

「佢咁做只有一個原因，佢好愛你，將你放左係佢心目中第一位。」