《我獲得一個願望，我選擇左係學校做一次男神》: 第四十一章：只因　愛

一個人死左咩都帶唔走，但係就唔想留低一啲遺憾係人間。的確我係會死，不過唔係一年之內，而係好似平常人咁，有六，七十年命，我要呃芊雪，都係因為我愛佢。

「幫我一次，以後都唔會叫你再講大話。」

「唉，怕左你，見係你，大家同病相憐我先幫你講一次大話。」其實龍叔好討厭講大話，講大話只會傷害自己，更加會傷害人，見係今次善意既大話，先肯幫我。

「你想我點幫你？」

「好簡單，我只需要你同佢傾計，再同芊雪講我好慘，好唔開心同埋一年之內就會死，咁就完事。」





「明明你同個個晨曦拍拖拍得咁開心，而家又要哄返芊雪，都唔知你個腦諗乜。」晨曦，已經唔能夠再存在係我心內面。

「我已經同佢分左手。」

「咁快？真係識玩。」

「唉，我唔想講點解，不過多謝你肯幫我講大話，我欠你一個人情。」

「好，出院之後請我食餐飯。」






「阿聰，你今日乖唔乖啊。」係晨曦面前，係一個六十歲既鹹濕伯父。

「嘻嘻，乖，乖。」阿伯摸下晨曦隻手，但係晨曦並無反抗，臉上仍帶笑臉。

「嗱，摸完我就要食野架啦，擘大口。」

「啊。」阿伯擘大個口，以為自己三歲細路仔，臨死都要好色一翻。

「乖啦。」





「嗱，食完飯要食咩架？」晨曦又真係當阿伯係細路仔咁湊。

「食藥...」講到食藥，阿伯即刻擺個扁嘴樣出黎，如果我係晨曦，我一拳打左落去。

「比個位我坐低，等我餵你食藥好無？」阿伯即刻比床邊個位晨曦坐，而個阿伯就好順手摸左落晨曦對腳到，同樣，晨曦亦視若無睹，完全無抗拒。

「今日食三款藥，呢款係有睡意，所以食完係要乖乖地訓覺，唔準周圍走架。」

同樣，晨曦都係當餵飯咁餵阿伯食藥；隻藥根本就唔係普通有睡意，而根本就係安眠藥黎，阿伯食完之後，好似昏迷咁訓左係到。

「搞掂。」晨曦係櫃桶攞左一個黑色銀包，攞晒入面啲錢，袋係自己裙袋到。








點解我會知道？因為我係門口見到晒囉。

「晨曦！你究竟係到做緊啲咩！」我已經忍受唔住，點解一個護士可以咁樣被人對待，更加去攞人哋啲錢，究竟係護士定係援交少女！

「點解...你係到既？」

「你梗係想我唔係到啦，原來你底裡係啲咁既人，人哋摸你，你唔介意，到最後仲好似做交易咁，攞埋人哋啲錢，我識錯你啦，晨曦！」

「我...」

「算啦，你唔需要解釋，亦都無野可以解釋，我地分手啦，你以後都唔洗過黎我間病房啦，我會叫人換走你，你慢慢服侍呢個阿伯啦。」

「阿明...」





唉，我係咪永遠都識唔到一個正常既女仔，我係咪就算變成點都好似同個毒男一樣，無女，無愛。咁我仲做男神黎做咩。

我同晨曦分手，當然介意佢做啲咁既野，更加唔明白佢點解要咁做，都已經係護士，有穩定收入，仲要出賣自己身體，究竟少少既錢係咪就可以出賣自己底線。




「咁如果件事失敗左呢？」

「唔會，絕對唔會失敗，」

「點解你咁肯定。」

「因為芊雪仲好愛我。」





「好，我信你，加油！」







「哇，好熱啊！」去到光仔屋企，雖然唔係好大，但係都算係小康之家。

「我去沖涼先，你沖唔沖涼啊？」光仔已經除晒衫，甚至只係着緊底褲，但係我唔介意，因為佢係我男朋友。

「唔啦，你沖啦。」睇黎光仔真係好熱，連毛巾都唔攞就入左去，等我去幫佢攞毛巾先。








入到去光仔間房，都幾整齊，窗前就係毛巾，當我行過去攞既時候，有啲野絆倒我。

「咦，唔通係光仔既日記？嘻。」一本史迪仔封面既日記，雖然睇人哋私人好衰，而且仲要係日記，不過我係佢女朋友應該無問題既。




十二月二十九日　晴天

今日同Tracy去左玩通宵，入到長洲真係好多人...




到左夜晚，我地book左個獨立屋，不過都幾貴下，為左條女，在所不辭啦。

返到間屋到都已經凌晨一點幾，因為我地同Tracy班FD去左燒烤，吹水先搞到咁夜，都攰訓著先肯返黎，不過正合我意。