《我獲得一個願望，我選擇左係學校做一次男神》: 第五十五章：隊友

係中大見到塊board，上面寫住聯校決戰港超，詳細就話中學打大學，最後贏個隊可以同港超冠軍比賽，但係我都無隊，好想踢啊。

「想踢波啊？」

「係啊。」同我講野既係一個差唔多有三十歲既男人，睇個樣都唔係大專生。

「你係？」

「我咪呢個比賽既負責人。」





「你好，我叫阿明。」我立刻同佢握個手，希望可以同佢傾傾足球隊啲野。

「你有無報名？」

「足球隊唔收我。」

「喔，真係可惜，記得你中學學界都幾犀利。」估唔到有人會因為我踢學界而記得我。

「係咩...」





「嗱，一係咁，既然中大就唔比你入，我寬容比你入科大足球隊啦。」下？科大？

「科大今年少人踢，十五個都唔知有無。」咁又真係幾少喎。

「就咁話啦，你自己去科大報名，我會批准架啦。」

「多謝你啊，請問你叫咩名？」

「英雄莫問出處。」哈哈，洗唔洗咁。





「有緣再見啦。」

太好了，有得踢波，希望今年可以藉著科大入到決賽同港超踢啦。


我搭車過去科大，唔知佢地係咩人呢？同埋踢波勁唔勁呢，不過，我只希望佢地同我踢得融洽。

當我到左科大既時候，我先唔知係邊到報名，揾黎問去都無，係咪真係冷清成咁...

係廁所隔黎，見到有張poster，正正係關於杯賽既資料，但係連攤位都無個，點報名...

「咦，你想報名啊？」令轉面，見到一個女仔，把聲好甜，但係好矮，仲唉過芊雪，不過樣就真係普普通通。

「係啊，但係要讀科大既學生先得喎。」





「我讀中大，頭先有個男人話比我加入你地足球隊喎。」

「男人？」

「啊，我知啦，咁你快啲填左份報名表佢啦，同埋我叫阿亮啊。」呵，係科大完全唔需要咩選拔，填張表就可以入選，真係好。

「咁幾時開始練波同比賽？」我最關心都係呢兩樣野。

「聽日。」咁突然？

「你今晚就會係個whatsapp group到，你會收到消息架啦。」

「哦，好啦，唔該晒。」

唔知點解，覺得特登搭車過黎填個form就可以入選，成件事都好似好兒戲，唔通UST無人踢波架咩？








阿亮：「聽日朝早九點華天足球學院練波，請準時出席！」點解唔係whatsapp group既，唔通佢地唔歡迎我？不過係華天足球學院練波又真係怪左啲，對於我黎講，個到係港超球員練波既地方。



第二日到左足球學院，我慢慢行過去，見到十一二個人係到踢波，腳法好熟悉，特別係個前鋒。




當我再行近啲既時候，我發現呢班人，係我中學邀請同阿軒比賽個班。





「阿元！」

「阿明？」我地呢刻好似兄弟失散咁，興奮咁攬埋一舊，而其他隊員見到係我都衝晒過黎。

「估唔到，你地一齊入晒UST喎。」

「係啊，我地由中一已經決意入科大架啦。」

「咁你呢？你都係科大架咩，無乜見過你既？」

「其實我讀中大，不過有個男人寬容比我同你地踢波啫。」

「咁就好啦，你知唔知，我地好掛住你，仲成日話如果你讀UST就好啦，可以同我地踢波。不過而家願望真係成真。」見住佢地班友，好似返到中學咁，好熱血，好傻，為左少少野就開心都見牙唔見眼，不過見返佢地，我都好開心，不竟入左院後，都無聯絡佢地。








「既然齊人，我地開波啦。」

「未得。」阿元咁講，唔通仲人其他人？

「嗱，比你架。」阿元親自將隊長臂章帶我係身上。

「多謝。」估唔到，大家仲對我有情有義，好感動...




「咇！」阿亮吹起哨子聲，十一個人對住其餘中學足球隊既人，睇落唔係好勁，但係速度唔錯。我亦係時候測試一下自己入院後球技差成點。

「阿明！」

阿元一個長傳比我，我控都控唔實，比左對面界外球。

「Sor！」睇黎自己球技真係差左好多，連控波都控唔到，我仲點做隊長。




「阿明！」今次又係阿元傳波比我。好彩今次邊線傳地波，比我輕鬆射入。

「阿明，過一過黎。」上半場完結，比數係三比二，我地係贏緊個方。

「你今日做咩，係咪入完院後唔習慣做激烈運動？係既話，我地可以換出先，費事你咁辛苦。」

「唔洗，我要鍛練返自己，唔可以比自己衰落去。」

「好，欣賞你，咁我地下半場放慢啲黎踢，唔好一次過爆晒上去。」

「佢地好快，我地要猜多啲波，組織多啲。」

「嗯，咁我地叫聲先！」隊長都係攞黎凝聚隊友，激發士氣。

「我地今次叫UST啦！」

「１！２！３！UST！」雖然我唔係讀UST，但係同一班以前踢過波既隊友，感覺依然如此。