《我獲得一個願望，我選擇左係學校做一次男神》: 第八十二章：絕美

「哇，啲風景好靚啊。」係車窗望出去，一路都係雪山，不過而家既季節只有山頂先有雪，不過咁樣我覺得仲靚。

「望住啲風景好舒服啊，無高樓大廈，無咩車，剩係得大海同雪山，第時退休可以過黎住添啊。」

「你係咪傻左啊，咁都好地方要黎呢都退休？」

「因為呢個係我同你最後一個一齊去既地方。」

「你又講得啱既。」





「穎心，你估下我地而家去邊？」

「唔知啊，你做啲野咁神秘。」

「係呢，呢到係市區黎架？不過呢啲屋仔好得意啊，全部都係細細間，而且三角頂架。」

「哈，呢到唔係香港，就算城市都無咩高樓大廈架。」









「兩位，到啦。」

「呢到邊到黎架？」

「落車先。」








「我會係到等你地架啦，兩位慢行。」

「唔該。」




攞齊野，費事穎心凍，我帶多件衫比佢，但係佢都話唔使，真係。

「咦，做咩攞行山仗出黎既？」

「我地要行去個到。」

「咁高，你個心得唔得架...」





「唔使擔心我喎，我以前踢波架嘛，嗱，又有氧氣樽，使乜驚喎，我驚都係驚你啫。」

「我有咩好驚啊，我以前係行山學會會長黎架。」

「哈哈，香港啲山點同美國啲山比啊，傻妹。」

「唔緊要啦，到時有我睇實你架啦。」

阿明咁樣講，即使有幾凍，條路幾難行都好，我都覺得好安全。




「其實我睇過資料，行上去只需要個兩個鐘，行完就啱啱好食午餐，正。」





「咁快啲行啦。」




係山腳我同穎心影左一張自拍，我地兩個都包到成隻粽咁，真係搞笑。

「出發！」




講過而家呢個季節既雪山個頂先最多雪，但係亦唔代表山腳一塊雪都無，咁樣一部分有雪，一部分地方無雪仲危險。





「拖實我。」

雖然穎心行得好穩，但係避免意外都係拖住佢穩陣啲。




行左差唔多半個鐘，我地都坐低休息下，不過坐係雪地都有啲辛苦。

「飲啖茶先啦，穎心。」

「唔該阿明。」

「好香啊啲茶，係咪花果茶黎架？」





「係啊，知你鍾意飲咪特登整比你囉。」

「真係有我心，低錫。」

穎心真係錫左埋黎，估唔到係冰天雪地到親吻係咁特別，呢一吻，可以融化一切。

休息左大概五分鐘，我地再起行，越行越高，空氣亦越黎越稀薄，但係對於我地年輕人黎講，都無咩分別，只要慢慢行，控制呼吸就可以。

「行啦。」




再行既時候，我地已經唔覺得有咩辛苦，好似已經習慣左行雪山咁，仲周不時停低自拍，影風景，不過，就越黎越大風。




「開始對眼有啲痛添。」

「穎心，無事阿嘛。」

「無，少少痛啫，細風返就無野架啦。」

「好啦，我企係你前面，你捉住我衫尾行，咁咪唔會有風吹到你對眼囉。」

「嗯。」




行左個半鐘，風亦都停低，雪就更厚，開始要用到第二支行山仗。

「你對眼好啲未啊。」

「而家無野啦，你呢，你幫我擋晒啲風，你對眼都應該好痛架喎。」

「等我睇下。」

「無野喎，為愛人遮風擋雨，至死不渝啦。」

「哈，傻佬。」




終於到啦！感覺好正啊，好似征服左啲野咁，係雪山上，望住既唔單只係頭先行上黎既足跡，係另一邊，仲有無盡既冰河,上面有許多既動物。而天上就係一層一層既雲海，有啲雲更係粉紅色，而係遠處，係我既人生第一次見到完美既彩虹。

「哇，係冰河啊。」

「好想落去啊，不過係咪又要行架。」

「落去唔使行架啦，隔黎有吊車落去。」

「哦。咦，呢到有幾間屋仔喎。」

「行啦。」

「又行？去邊啊。」




「歡迎光臨。」

「請坐啊，兩位。」

「唔該。」




「原來我地黎食野啊。」

「係啊，等我比你試下阿拉斯加最出名既美食啦。」

「哇，出面個風景都好正啊，依然望住個冰河，上面仲有海象，海豹啊。」

呢個穎心啊，掛住睇風景都唔使理我啦。

「唔該，要六份阿拉斯加蟹，六隻生蠔，同一個拼盤。」

「要多一杯啤酒，一杯熱麥茶。」

「多謝惠顧。」




「全部都係海鮮？」

「係啊，你最鍾意架啦。」

「太好啦，有長腳蟹食，正啊！」




啲野食黎到，我地都真係唔客氣，不斷肢解啲海鮮，啪晒啲生蠔落肚；呢到既海鮮，真係好鮮甜，聽講全部都係啱啱捉返黎，香港同阿拉斯加長腳蟹真係無得比，正！