《我獲得一個願望，我選擇左係學校做一次男神》: 第八十三章：無憾

「好好味啊啲蟹，可唔可以唔好咁快走啊。」個傻妹差唔多食左十隻蟹，仲多過我，真係誇張。

出返黎冰天雪地既世界，我決定左帶穎心落去冰河睇下，雖然係好危險，但係人生只有一次，行完就死而無憾啦。

「我地落去啦，穎心。」

「真既？」

「去個到搭吊車啦。」





坐吊車都有吊車既好，唔係凈係唔使行咁簡單，而且睇風景可以360度，好過癮，只可惜速度都比較快，唔夠十分鐘就落到山腳。




「穎心，要拖住我啦，跌左落去無人救你架。」

「知啦。」

我地都攞支仗督下個地下，原來啲冰都幾厚，幾實正，所以我地都唔係幾怕。





「啲海豹好得意啊。」

「都唔夠你咁得意啦。」

「哈。」

我地兩個已經完全沉醉於呢個世界，更加忘記左我即將會死，不過，我黎呢到，正係想咁樣。








「哎呀！」

「阿明！」

「阿明！你唔好死啊，你快啲上返黎啊，你係邊啊。」

穎心立即跪係冰河上，而阿明就正正跌左落穎心隔黎裂開既冰下。

「呼，好凍。」

「嚇死人啦...搞到人哋喊啦。」

「嘻嘻，嗱，嫁比我。」





我從褲帶攞出一個戒指盒，打開再擺係穎心面前。

「點解...」

「我特登跌落去架，見前面有個位裂開，咪試下落去有咩感覺囉，不過真係好難游返上黎，仲要好凍，我咁有誠意，你願唔願意嫁比我啊。」

「我願意啊，傻佬，快啲上返水啦，凍死你啦。」

「太好啦！穎心係我老婆啦！穎心係我老婆啦！」雖然無人聽到，但係呢份喜悅，有我同穎心分享就夠啦。

「得啦得啦，你嚇走晒啲動物啦。」

「衰人，成日搞到人喊先安樂既。」





「但係今次你係開心到喊阿嘛。」

我地係冰河上攬埋一起，唔知我地係咪世界上第一個咁樣求婚既男人呢？

「你快啲去換衫啦，凍死你啦。」

「知道，老婆大人。」




坐吊車返返到去頭先既屋仔，叫老闆借個地方比我換衫佢亦好願意，當地人真係好。








「老公，我地跟住去邊啊。」原來我地都好享受互相稱呼大家做老公老婆。

「我地落返去，去第二個地方，享受一個世界級既美景。」

「仲有美景？呢個都好誇張啦喎。」

「跟我黎啦。」




我地今次唔行落山，都係搭返吊車落去，因為時間緊逼，個個景無左就無左，追都追唔到。

「返黎啦？玩得開唔開心啊？」David食住雪茄挨係車到等我地。





「梗係開心啦，好正添。」

「開心就好啦，跟住仲正啊，上車啦。」




「阿明，你凍唔凍啊，頭先咁樣落水。」

「無野喎，都話我身體強壯。」

「身體強壯就唔使成日入醫院啦。」

「哎呀，衰婆串我咁話，而家做左我老婆囂張啦。」

「唔係咩。」




係車程裡面，我地都無咩點講野，只係挨住膊頭，望住外面既風景，拖住手，互相取暖，我覺得咁樣既環境，真係好舒服。

「兩位到啦。」

不知不覺，天色都暗晒，更加坐左兩個半鐘車程，黎到一個好似森林既地方。

「車後面有柴木，等陣我會幫你地起火架啦。」

「起咩火啊，我地打邊爐咩？」

「你凈係掛住食，不過都啱既，等陣就知啦。」

起完篝火，David幫我地捉到幾條魚，有野雞，我地燒黎食，估唔到都幾有風味。

「係呢，都咁黑啦，仲有咩睇？」

「睇下！」




係人煙稀少既阿拉斯加，除左長腳蟹出名，能夠媲美既都只有北極光。眼前既北極光千變萬化，紫色，紅色，綠色既光帶劃破漆黑既夜空，更帶有一種神秘既感覺，呢啲既光帶形影飄逸，變幻無窮；原來用盡一切既墨水，都難以描寫眼前極美既北極光，唯有用眼，用心去感受大自然既變化，一切盡在不言中。




「好靚...我係咪發緊夢。」見到穎心淚痕未抹好，就已經出現新一條淚流。

「我都好感動，人生第一次見到咁靚既風景。」

「多謝你，阿明，即使呢啲風景幾靚都好，最重要既都係有你陪住我。」

「當然，唔係我，而家我地兩個互相陪住大家先係最重要。」




係天上，有一粒晶瑩剔透既水晶跌左落黎。

「好感動，不如唔好懲罰阿明啦。」

「我都想，不過，你睇下。」




「咳咳！」

「阿明！」