[扮工中環傳] 第四章 頹務處女職員 

聽講寫高登故,要夾硬搵甜野來寫先有人睇, 
但其實日日返工,都係對住個滾動石C9上司... 甜條X。 
隔離TEAM係有後生女同事,不過無乜機會合作,無得同佢地又合又作。 
係有主動出擊,不過做政府頹務署,連識女仔都好頹。 


返工頭兩日,同兩個男同事食飯,兩個都睇落好HEA, 
返左兩日已經知佢地無女朋友,因為C9同事們成日拎呢樣來笑。 


食飯問佢地平時星期六日會做咩,一個答我話,會去賭馬... 
另一個全程玩手機無乜講過野。 
我想像個畫面係佢識女仔介紹自己,第一句講自己興趣係賭馬...。 


自問係扮工高家,hea到可以寫上高登講自己有幾hea, 
但都會扮勤力扮上進追女仔,入政府先見識到,有種hea叫做hea之入骨。 
hea還hea,女還是要溝的,我見到hea足三年後既自己。hea到我驚。 
兩個男同事SKIP,主動識女仔。 




幾個政府工識女仔途徑,首先返工之前三日係training, 
連部門都未知,好似ocamp咁分組,做下小組討論,討唔討到電話就睇你。 
連教果個都幫你,叫晒所有人寫電話開whatsapp group,驚死你識唔到女仔咁。 
都有識到女同事,不過唔關頹務署事,skip。 


入職後就當然係認職同部門同事,不過識同部門女同事,有個好大伏。 
樓下有個靚女同事,有時工作上會見到,係我仲研究緊點識人地, 
終於有一次,佢來我個位,同我傾計,傾完仲... 派利是俾我 


#仔都生埋系列 
之後知道佢係我上司個上司個上司,上上上司,人工高我好多條街。 


返左兩個月,我同一層樓有新同事入職, 
每兩三個月都有新同事入職,都係後生女仔,可能其他我無視晒啦。 
同呢位女同事同時間放工,終於有得同女同事吹住水一齊放工,都開心左幾日。 
佢放工非常準時,急急腳走,終於我忍唔住,問左一條唔應該問既問題︰ 
「見你放工都係趕住走,你係趕住去邊架」 
「返去湊仔」 
「下... 呃... 你屋企有BB仔?」 
「係呀我個仔幾個月大呀」 
#仔都生埋系列2 
似乎政府工係俾人安穩養胎用... 起碼唔係俾人搵女朋友用。




政府工有另一個識女仔途徑,有進修堂可以報,上上司會定期問我報唔報,
報完可以工作天一整日去上堂,代表政府工既野,根本間中返少一日都做得切。
之前講話做人要堅遲,真係有用架,我遲5分鐘先到,
座位坐得7788,就可以好理所當然坐去靚女隔離位啦。
無錯係7788,我遲5分鐘都仲有近10人遲過我...
連主講者都係比正常遲左10分鐘先開始講,佢都預左人遲。
 
 
去得上堂,梗係都hea上,聽下書吹下水,又有小組討論玩下,
去得上堂,梗係無得帶飯叮,梗係問埋人地lunch一唔一齊去食,多數都得。
去得上堂,梗係問埋人地,之後會唔會報其他堂,不如俾whatsapp我下次一齊報。
拎得人whatsapp梗係起底,起得底梗係又見到,人地恩愛放閃既合照。
今次好d,未生仔,只係似乎有老公或者男友。
#婚都結埋系列


 
 
政府工識既女同事,幾乎都係有男友、結左婚、仔都生埋,唔知係咪淨係頹務署
。有無單身絲打想反駁,歡迎PM。