[扮工中環傳] 第五章 扮忙告急 

記得去投票。我無報part time投票人員,好後悔無報, 
我睇到人口普查某新聞又HEA又溝女,而家都仲後侮緊無報, 
將來做到政府pt再寫故講有幾hea。 


終於講我既工作,我既工作係上午做野,下午扮忙。 
返工遲到、到食早餐、到開電腦,平均拖到九點三開始做野, 
初初唔識做要花時間摸索下,做熟左漸漸發現, 


咦,做到朝早十點半,已經做完既喂。 


我每日有固定工序要做,做到十點半,有時難搞少少要到十二點, 
上午內實完成;然後下午既固定工序,就係扮忙。 
當然係有各種野要做,份工係季節性繁忙,忙既幾個月,日日要做到成4點架, 
平均一半日子左右,係下午無野做,唔知做咩好。 
我聽上司講之前上手,係嫌呢個位辛苦得滯,提早退休, 
心諗,每日得兩個鐘野做,都嫌辛苦提早退休,佢人生係HEA到咩地步... 




問上司有咩要做,係答「你得閒去睇疊說明書同舊file,大把野學呀」,講笑搵第樣。 
但係電腦無得上網,而玩下手機五分鐘,又會俾上司話, 
如果完全唔搵野做下,可以話係坐監, 
犯人犯下貧窮罪,即日起執行HEA到你悶死之刑。 
後來漸漸識得print書睇、聽電台、去廁所蛇、偷玩手機、溫習,都係環境逼出來。 


一,去廁所蛇,除左每日正常既廁所時間外,就係要拎俾野上上司, 
上上司係另一層樓,因為要去第二層樓,所以係大好懶機。 


蛇完埋位,上司可能會話「咦佢同你講左好耐喎」,只要笑就可以了。 
上司唔知你見上上司幾耐,上上司唔知你幾時返位,利用呢個資料不流通性來HEA。 
就算真被踢爆,咪話去左廁所囉,咬我食,最多果幾日去少D廁所。 
拎野去第二層樓,似足中學雞咁放十五分鐘小息,除左無小食部。 
成語「瞞天過海」咪咁解。 


二,偷玩手機,我初初直接舉住手機玩,幾分鐘會俾人話, 
但係明明附近同事都係舉住手機玩,上司一樣會叫你篤少D手機啦,做野先啦。 
改為放手機係keyboard tray,mouse上方,離遠睇係非常似控緊mouse (示意圖)。 
------------------[phone]--------- 
|---[keyboard]-----[mouse]---| 
------------(keyboard tray)----- 

再用厚FILE,睇落似工作既文件,各種單擋來幫手遮住。 


唔係睇得太清楚個mon,所以用來睇fb、傾whatsapp之類係唔方便, 
不過打爐石,玩pokemon go無問題,離遠睇唔覺玩緊。當然上司其實都知。 
扮工打爐石係要付出架,有時上司上上司行埋來講野,只能默默由佢燒線輸。 
成語「望門興嘆」咪咁解。


三,溫書,都實在太HEA,懶到盡頭就是勤,返工悶到要溫書,我其實好勤力。 
讀書竅門我從來得一個,就係悶,悶到覺得讀書有趣,如果生活太精彩自然嫌讀書悶, 
記得有個中學同學,考試低分之後講既金句, 
「最衰都係CAPCOM啦,考試期間出MON HUN, 
又要出到咁鬼好玩喎,搞到考試炒左囉。」我同學不是我。 


係咁得閒既環境,自學英文日文之類幾好,睇落似做緊野,扮工而不hea, 
順便可以同女同事講我自學緊,順便顯得自己上進,順便charm下女同事,順便咋。 


甚至屋企信件我都係帶返晒公司睇,總之除左玩之外既私事都盡量係公司做埋。 
來緊會報course讀書,仲話左俾上司知,來緊會去考上上司個位, 
佢聽到我將來有可能做返佢上司,嚇到從此對我好左d,考唔考到一回事。 
成語「虛張聲勢」咪咁解。