[扮工中環傳] 第六章 HEA足96小時 


可能,我用,多幾次,逗號,立會,都有,得做, 
咁就,叫做,作家,我都,得啦,我考得,高分,好多添。 
之前提過,我上司有成40日年假,就遲早會放長假旅行, 
加上更之前又提過,我燒碟燒左一堆漫畫電影,期望有機會用, 
我寫野好有品,有伏線有回收,終於上司放假一星期,機會來啦飛雲。 




「HEA足96小時」計劃係,上司交落既假期功課,星期一通通做晒佢, 
星期二至五要HEA足96小時,要完完全全咁盡HEA, 
除左必要做既每日任務外,盡量乜都唔做,連返屋企後都要完全HEA晒佢去。 
I dont know who you are, but I will find game and I will kill time. 


星期一好勤力做晒野,上司俾落以為要做好耐既野,實際上快好多做完。 
我經常負責核對數字,係一樣可勤力可HEA既工作, 
要核對到完全準確乜都唔錯,需要高度專注力、花費大量時間精神, 
而HEA做求其TICK,就好快做完。如果上司發現有錯,咪講對唔住囉。 




熟悉扮工心法後,我都係快速HEA做求其TICK,之後唔交, 
慢慢玩住手機慢慢核對一二三次,隨時佢催都交得,就可以順利扮工。 
上司去左旅行就更唔駛講,星期一快速做晒之後, 
扮工都廢事,直接拎起手機掃。


但原來上司走左,我係要做埋佢果份架,好大鑊。 
上司負責接聽查詢電話,即係用左乜乜服務,個盒會寫住既查詢熱線之類。 


平時係上司聽,都有時要我聽,但上司唔係度我係要聽晒。 
正常來講,如果我好勤力既話,係應該平時就聽上司講電話,從旁學點答, 
但係我平時采佢有味,結果而家唔太識答。 


有無試過打去查詢電話問題,發現對面唔識答? 而家我要面對了。 
以前聽過數學教師分享「如何唔識計數而不失霸氣」, 
就係先答「今日時間比較趕,呢題我小息(下堂)再答你」 
然後小息即去樓下查答案,教員室有本齊晒step既full solution架。 


冷靜思考整理,有人打來查詢,我唔識答的話,大致有以下四招: 
「A.負責同事唔係度呀,佢要下星期一返。」 
太衰格,等於馬會電話買六合彩,你答要下星期一先買得到,已經開兩次啦。 
而且拖太多到下星期,上司返來會知我乜都無做,積晒係度。少量算啦。 


「B.交俾上上司答」 
上司講低唔識答既話,必要時可以轉俾上上司答, 
不過當然唔可以比上上司發現,我乜都唔識做呢個秘密,同A一樣少量。 
「C.好,麻煩講低電話,我幫你跟一跟」 
然後去查果疊說明書同舊FILE(見第5章),自己搵答案俾佢。 
咁做太勤力,違反我HEA算承諾,盡量唔好。 
「D.電話未放好,就聽少好多電話啦」 ... 少量啦都。 


接過最天才既查詢係,打來話 
「你地個網係咪出左問題呀, 
佢寫住「這個程式沒有回應,正在關閉」喎,咁要點做?」 
「咁你撞豆腐死左去囉」心裡面好想咁覆, 
但嘴巴都係要答「哦你熄左佢再開返就得架啦」, 
希望我咁講,都表達到我心中意思啦。 




一如讀者,所料,結果,全個星期,忙到,HIHI 
淨係,查說明書,都查,到眼花,唔好話,睇漫畫,完。 



下回頹務署篇結局,有我扮忙史上最大型既鬥智戲碼, 
講述我為左HEA而不擇手段,到比人拉入房照肺之類,充滿驚險鏡頭。 
上司:「我都唔想寫衰你份REPORT架,係咪?」