[扮工中環傳] 第一章 遲到戰士 Termin-later 

我入職政府頹務署(假名) 第一日, 
已經聽到上司講左一句話,好振奮人心,好令人有歸屬感, 
「上手做到退休,都未OT過。」 
好鼓舞,呢份係一份好工。 

政府職位好有壞,有D位係上手辛苦到申請調走,有D位係上手退休, 
明顯後者好九萬倍,我抽到好籤。 



返工初期,我最先做既事,就係觀察可唔可以遲到同唔OT。 
關於OT方面,有上司一句,我已非常放心, 
另外我同上司講,其實我放工後要去教補習,所以盡量要準時走。 
有時佢甚至會提我「夠鐘啦,你要教補習就準時走啦。」 仲要覺得我好勤力。 
OT問題暫時解決。問題係遲到。 

我對遲到,係有一份執著。 
從小每年淨遲到平均六個缺點,遲到五分鐘留堂一小時覺得OK。 
返第一份工,唔好話勤工,當年老細為左我,而買左一個打卡鐘。下個月我辭左工。 
甚至試過約得到女神食飯,都照遲到。 



今次呢份工,我由第二日開始,遲到一分鐘,第三日,遲到兩分鐘, 
一路一日一分鐘咁遲多少少,非常準時。 
咁做係為左試探,呢份工遲到既底線。 
我要以分鐘為單位,知道最多可以遲幾多。 

返工簽到係自己埋去簽簿,淨簽簿我寫凌晨5點返工都得,問題係上司出唔出聲。 
多日的觀察結果,十分鐘內,上司當無事,仲可以講早晨; 
十至十五分鐘,上司會俾說話我聽,話你唔好咁遲啦。 
超過十五分鐘,上司會執正來做,監住我寫落簿遲到。雖然唔知遲到太多次會點。 



於是,我漸漸準時遲14分鐘。如果真係遇上塞車,就扮病射波,雙重保障。 
上司都係會不滿,有時都係會記我遲到,不過我OK。 
重要既不只係賺呢14分鐘,而係我享受左遲到的過程。 

許多成功的金句,都是教人要堅遲。 

「不要失去信心,只要堅遲不懈,就終會有成果的。」 
「偉大的作品不是靠力量,而是靠堅遲來完成的。」 
「要在這個世界上獲得成功,就必須堅遲到底,至死都不能準時。」 
「I will be late」 

唔知有無搞錯咩野,但我一直銘記住做人要堅遲,終會帶來成功。 

#本故事大概虛構


#上司見到唔好當真