[扮工中環傳] 第二章  扮工俠2之 決戰電腦哥
 
上唔到網。
上唔到網。
上唔到網。
公司部電腦,因為保密機密乜乜物物,上唔到網,除左工作要上既內聯網。
甚至插USB都無反應,用USB要寫紙申紙,先借隻專用USB手指俾你用一陣。
WIFI更加唔駛諗,唔係話唔俾密碼你,而係全層樓無WIFI呢樣野。
 
 


幸運既係,手機上網收得到。以前試過返工頭一日發現手機上網收唔到,
即刻問同事邊台收到,放工即刻出機轉台。今次唔使。
 
 
問題係,而家上司非常正經古板,佢手機係史前鍵盤式,無touch-screen。
即係,只要我用手機,佢就以為我玩,
佢唔知我關心緊世界大事,用fb睇國際新聞。
佢以為我打爐石係玩,佢唔知爐石係國際賽指定電競項目,
我只係返工期間e-sport。
 


 
我座位背後係上司,佢會唔知幾時望住我,無所遁形。
如果我做野期間玩手機太耐,佢會響我全朵,「XXX,做野啦」,
上司似乎知道響人全朵係幾恐怖,扮緊工聽到自己全朵,唔知點解特別驚。
而且我背對走廊,電腦畫面係其他人經過望得到,唔可以HEA得太明顯。
 
 
講到扮工上網,最重要係識得快捷鍵,快捷鍵記通,扮工好輕鬆。
基本功, WIN+D,一按就係顯示桌面;
進階,WIN+D之後再按WIN+E,打開「我的電腦」。


正確扮工姿勢,左手手指長期放係WIN+D,將第六感推高到極限,
感覺到任何人影接近,有理無理,即刻WIN+DE,
就會每個人經過,都會見你望住「我的電腦」唔知做咩,不過睇落似做野。
 
 
再高階,我以前會將FB條藍色BAR整走,試過比秘書見到我咁做,
佢唔係話我,而係問我「點整走條藍色邊架,幫我整埋丫。」
不過上唔到網,呢D招又有乜用,只能上政府網頁,唯一雌性照片係林鄭張相,嘔。
初期我渡過左要做野,無得頹廢,唯有做野既頹廢時間。終於有一日曙光來臨。
 
 
附近同事唔知乜公事,拎出一隻光碟,叫我入隻光碟安裝唔知乜。
我話「唔係鎖晒機架咩 乜有得入光碟既」
佢話「係呀 其他野都唔插得 但係光碟就可以」
我係上唔到網既黑暗中,找到一線曙光!


就係咁,我去左買隻CD-RW,去DL左各種平時無心機睇既電子書,
拎左堆可能會PRINT既CV、補習筆記之類,一口氣燒晒落碟,
仲有少少漫畫、影片,期望有睇得到既一日。
 
終於突破左公司電腦既重重障礙,
我可以開word睇電子書,或者print出來睇。我而家好鐘意睇書LU~
更逼真可以將電子書copy and paste去email度,極似做緊野。
透過我既電腦能力,係號稱完全封鎖既公司電腦當中,搵到扮工新出路。
 
                                                                        
我諗起某個靠偷拍自己維生既扮工英雄,佢最經典既金句︰
「能力越大,返工越HEA。」