[農曆七月應節故] 校園鬼故事 - 紅衣女孩: （三十五）

其實有很多問題我需要弄清楚，例如：堅叔是否施降者、小敏為何會仍在學校等等。
 
但，有一條問題必須弄清楚！就是我在夢中，夢見小詠向我求救的事，還有，為甚麼小詠會在夢中幫助我，要我小心食物，又把報紙內容給我看，這些究竟是甚麼意思？
 
「天命叔，我想知道，鬼……會唔會向人求助？」我把以上這些都歸納成一條問題。
 
天命叔呆了一呆，看來他想不到我會問這條問題。
「細路，點解你會咁問？」天命叔用嚴肅的聲線向我詢問。
 
我想了一想，還是先把這兩天，夢境和現實，所得到的資訊，被操控回到學校和在操場遇到紅衣女人的事告訴天命叔。




亦把小詠第一次要求我幫她，和之後提醒我小心食物的夢境如實相告。
 
天命叔沉思了一會，神色凝重的看著我：
「你……應該無係夢入面應承佢D咩呀？」
 
我搖了搖頭，然後天命叔吁了一口氣：
「嗯，我睇你都唔似有應承到，總之無就好啦！」
 
「你咁講係咩意思？我唔明？」我追問著。
 




「點講好呢？細路，你覺得鬼，其實究竟係咩黎？」天命叔沒有直接回覆我的問題，而是向我提問。
 
「鬼係咩？人死左咪變鬼囉！」我理直氣壯地回答。
 
天命叔用一副看見新大陸的表情看著我，仿佛覺得我無藥可救似的：
「你……唉，你真係蠢到無得救。如果人死左就變鬼，咁大撚鑊啦，一日死咁多人，咪成街都係鬼，你都戇鳩鳩嘅！」
 
「咁……咁有輪迴架嘛，佢地可能投左胎呢！又或者轉生！又或者……」我紅著臉辯解著，但也覺得自己愈來愈沒有說服力。
 
「我估……鬼，其實係一種能量。」在一旁的阿詩看了看我，然後小聲的回答著。嗚，她也在看不起我嗎？




 
「果然係我個新抱仔，答得好！無錯，鬼，每個宗教都會有唔同演譯，但其實，講穿左，都只係一種能量嘅存在！而呢種能量，其實就人體內所謂的靈魂。舉例，其實人點解會有思想，有活動，其實係所謂嘅靈魂，我會話係一種能量推動身體嘅運作。靈魂嘅力量會不斷增強，而且亦都會學習，更加係有思想嘅。所以當我地愈來愈大個，識嘅野愈黎愈多，靈魂會成長，並利用身體這容器，去做唔同嘅野！」天命叔正經的解說著。
 
我看著他，張大了口完全合不上，想不到眼前這位維園阿叔，能夠說出如此正經，有條有理的說話。
而阿詩亦瞪大了雙眼，用不可思議的表情看著天命叔。
只有天賜，他仿佛理所當然的聽著他父親的說話。
 
天命叔注意到我們的變化：
「細路，唔駛崇拜我，我知我係勁嘅，你要歡呼嘅話唔該等我講晒先，一次過拍手歡呼。咁我繼續啦，而有D人長大後，可能會出現智商問題，心理問題，甚至行為偏差等等。醫學當然有解釋，就係腦部或者身體嘅機能出現一D問題，呢個我認同嘅。就好似風扇咁，如果有機件故障，就算電力正常，一樣運作唔到。而另外一個解釋，就係靈魂出現左問題，可能係唔見左一部分，可能係靈魂本身受到損壞，咁就係電流斷下斷下咁，風扇就算用到，都會有問題。」
 
「即係話人的身體係容器，推動容器的電源就係靈魂，缺一不可。咁解釋咪簡單得多囉！」天賜在一旁插嘴。
 
「多事啦衰仔！咳咳！所以鬼其實只係能量，人死後，大部份係因為身體老舊而死。所以能量仍然會殘存係世上，咁殘留時間長短有好多因素影響，一般認為係四十九日。而有好多較強的能量，可以留存係世上好耐嘅，就好似小敏咁。」
 
我聽到這裏，心裏莫名的起了一陣寒意，可以學習的靈魂，咁鬼咪好似人咁，會不斷成長！




 
「而頭先我問你，有無應承過隻鬼幫佢。原因就在於，一般的鬼，極其量對人類只能夠造成好細嘅影響。因為本身我地已經有自己嘅靈魂，二黎就係波長問題，唔同電器用的電量，輸出等等其實都好唔同，所以一般係無辨法對人進行操控。除非你咁黑仔，遇到一隻能量極強的鬼，波長又吻合的鬼，先會造成所謂鬼上身的情況。而另一個成因，就係假如你應承過隻鬼任何野，就等於開放自己的容器，答應俾隻鬼入黎。好彩你雖然蠢，但都無應承到小詠任何野！」天命叔說完後，環視著我們，像在提醒我們，以後也不要答應任何鬼的請求。
 
「唔係喎！咁學校果個紅衣女人點解釋呀？佢真係捉住我架喎！嗱，你望下我件衫，仲有啲紅色嘅手指印係度！」我把染紅了的衣服展示給天命叔看。
 
「咪講過囉，鬼係一種能量！唔會直接掂到人，最多係影響你腦部，造成幻覺。或者操控人體，先可以直接掂到你。」天命叔邊盯著我的衣服邊告訴我。
 
「能量……幻覺……！！！你係話果個紅衣女人，係小敏操控左一個人，然後再黎捉我？」我真心的感到驚訝。
 
「嗱，我無講過呀！可能係操控，又或者，可能係有人特登扮成咁！」
 
「咁......咁……小詠佢真係俾到好多訊息我，同埋幫到我喎！佢只係想上我身？」我仿佛接受不了事實般，感到非常洩氣。
 
「細路，記住啦，唔係話鬼唔駛人幫，或者鬼唔會講真話。而係絕大部份，有力量嘅鬼，都識得講大話，佢地會希望你同情佢，幫佢，應承佢！所以，鬼講嘅野千祈唔好信。雖然唔知道你地所講嘅堅叔係咪俾人操控，如果佢同你講嘅夢境係真，我唔信憑小小嘅行動可以感化到小敏，而堅叔同情小敏的時候，會唔會已經答應左D野但我地唔知呢。」
 




「即係話，堅叔好有可能已經被鬼操控住？」我驚訝的道。
 
天命叔向我點了點頭。
 
一下子太多訊息進入了我的腦中，但現在，很多東西都可以解釋了。
 
鬼只係能量，不會施降，不會抓著我們，不會跟踪我們而讓我們察覺得到。
那麼，就應該是堅叔做的。
而的確，之前堅叔像有預謀的在學校地下等著我，又請我吃了西瓜味雪條，這一切，全部都顯得好可疑。
還有甚麼呢？對，上香，他要求我上香，為甚麼我現在才想起來。
 
「天命叔！我諗，我知道個法術點解俾人破解左啦，係上香！」我自信的對他們說！