[農曆七月應節故] 校園鬼故事 - 紅衣女孩: （三十六）
「駛撚你講咩，個衰仔同我講返你成壇野果陣，我就已經知道係俾佢慢慢咁破左個陣！問題係，究竟點解佢要選擇上香，要破呢個陣，其實有更多宗教儀式可以做，破壞力勁好多！但上香其實就好似玩刀仔鋸大樹咁，又慢又麻煩，我係怕，上香係有其他目的Ja！同埋，奇怪嘅係，點解佢老婆唔制止佢！無啦啦上香俾小敏，佢老婆唔覺得奇怪嘅咩？」天命叔嘆了口氣。
「咩小敏呀？我果日係佢地間小屋，我明明見個神主牌寫住李麗詠架喎。」我奇怪的道。
「咩話？你肯定？」天命叔抓著我的肩膊，緊張的道。
「我梗係肯定啦，我仲記得第一次睇到個神主牌，個牌乜都無寫！點知堅叔講完個故仔，要我上香果陣，我就見到李麗詠三個字啦！」我用肯定的語氣解釋。
只見天命叔低頭沉思了一會，抬起頭看著天賜：
「衰仔，點解你當日無同我講呢個細路見到個名？」
「吓？可能我記錯左掛。同埋只係一個名者，有咩理由聽故仔之前無，之後突現出現，我估係子鋒有幻覺掛。」天賜解釋著。
「幻覺？如果係幻覺就好啦，咁起碼唔係我諗嘅最壞情況。」天命叔臉帶憂心的說。
「老豆，最壞情況究竟係咩？之前你都係無解釋過！」天賜詢問著。
「好啦，我就將最壞情況話俾你地知啦，反正之後應該都要你地幫手。」天命叔似是下定了決心告訴我們。
「幫……幫手？我地……得咩？」阿詩臉紅紅小聲的道。
「放心，新抱仔，我唔會俾你有事嘅。而且，雖然要你地幫手，其實無咩特別嘅，之後會再同你地交待架啦。講返先，所謂最壞情況，同果個神主牌係有關嘅，點解個名時有時無，其實唔重要！因為有太多原因，可以係幻覺，可以係俾鬼影響左你腦電波，睇錯野！重點係，我原本以為果個神主牌會係小敏，咁就只係簡簡單單破左個法術然後走返出黎害人咁解。但如果，塊牌真係小詠……好有可能，佢地係操控或困住小詠嘅鬼魂，利用埋佢嘅能量！咁就難搞啦！」
「吓？操控鬼魂？」我和阿詩異口同聲地說，天賜則神色變得有驚訝，看來他也是第一次聽天命叔這樣說。
「無錯。上香，好多人會當係供奉仙人或神明用。由於香的波長同鬼魂好易接軌，D鬼魂就鍾意去有香嘅地方。而神主牌就好似入場券咁，寫晒名呀，時辰八字等等，就可以俾特定的鬼進入。所以，好多時，有上香嘅地方，例如寺廟，其實都有好多鬼魂聚集。」
「仆街啦，我仲初一十五都走去做孝子，同阿媽一齊去拜神，咁我咪好危險！」我心裏想著。
「細路你少擔心，一般嘅鬼唔會無啦啦害人，佢地去嚇人，都需要消耗能量架。」天命叔像看穿了我的心思般。
「屌呀，咁你都知我諗乜？」我驚訝的道。
「低能仔諗野個個都差唔多架啦，放心，你唔係第一個咁諗，亦都唔會係最後一個。妖，又阻住我講野，我估小詠就係咁俾佢地吸引左過去。至於點解我會覺得佢俾人操控或者困住，係因為學校呢個地盤係小敏嘅，小詠應該唔會想留係度，但你條友仔又話夢見小詠，即係話佢仲係學校。咁可能性只有一個，就係小詠被困或操控，被逼留左係學校。而小詠嘅力量就會俾小敏利用！一隻十年嘅鬼，我師兄都覺得難搞，何況依家兩隻，仲要又過多十年，呢次真係大鑊！」
天命叔說到最後，竟然忍不住搖了搖頭。
「你講到咁，咪者係無得搞？」我緊張地問。
「痴線，你當我張道陵第六十五代弟子張天命流架！我係話難搞，唔係無得搞！唔該你條友唔好亂講，破壞我名聲呀，我係油尖旺師奶界好出名架！」
「師奶界？咁……師奶殺手，究竟可以點做呢？」我本想藉此諷此一下天命叔，怎料他看似非常受落，這維園阿叔真難捉摸。
「又唔好講到殺手咁犀利。其實目前我地有D野一定要搞清楚，第一，究竟小敏係操控左邊個？係堅叔？堅嬸？定兩個都俾人操控？第二，究竟小詠係俾人操控左？定就咁困住左？我當然希望係後者，如果唔係會麻煩好多。第三，細路，就係你身上！點解佢地咁多個唔搞，淨係搞你！同埋佢操控你返學校自殺，一定有原因！」天命叔指著我說。
我果然是背負宿命的男人，只是，為甚麼是我？
電影也有分動作片、文藝片、愛情片、愛情動作片等等。
為甚麼偏偏要是鬼片，我真的不想成為鬼片的主角，因為這類主角多半沒有甚麼好下場。
「咁……可以點搞呀？」我洩氣的道。
「俾你個生辰八字我！」天命叔把筆和紙交了給我。
我把資料寫下後，只見他口中念念有辭，然後他再看了看我。
「細路，我大慨知點解你會咁啦！你都幾黑仔下，咁難中都俾你中到！我俾定三道符你，應該幫你頂到幾野！如果你見道符條紅繩斷左，咁就無效架啦！自己小心。」
我接過這三道符，希望真的能幫到我吧。
「跟住，就係你接落黎要做嘅野！如果，你又夢見小詠，你應承佢嘅要求！」
「咩話？你又話唔可以應承鬼嘅任何野？」我驚訝的道。
「係架，一應承左就可以寄居係你度，甚至乎可以操控埋你！不過只有咁，先可以將小詠由神主牌，轉移去你呢個身體上面，到時就會知道小詠係被操控定點架啦。至於你兩個，因為新抱仔你避過左一刧，對方應該都會發現你無出到事，所以星期一你同衰仔一齊返學，等佢保護你！」
「吓，我唔係繼續請假咩？咁對方咪會知我無中到招囉？」天賜疑惑道。
「死蠢，新抱仔跳樓俾你阻止果一刻，佢地已經知道你無事！倒不如大搖大擺咁出現，挫下對方銳氣都好啦，同埋呢度一人一道符，隻鬼埋唔到你地身，只需要小心堅叔堅嬸，同埋唔好亂食學校D野，最好連水都唔好飲。照我估計，我地得返一個星期左右去搞掂單野，如果唔係師兄個法術完全消失晒就仲麻煩！仲有無咩問題？」
「我想問，咁我係咪一定要俾小詠上身？咁同推我去死咪無分別？」我真的不想再被操控，那感覺很不好受。
「細路，唔駛諗啦，做你就做硬架啦！你樂觀D啦，其實我無插手嘅話，你一早都死左啦。今次如果你唔俾小詠上身，搞唔掂單野，其實咪又係死！橫又死掂又死，不如壯烈犠牲啦！最多我免費幫你做法事，無事嘅！」天命叔搭著我的肩膊說。
我真的要哭出來了：「吓……咁......咁我返去見下屋企人先啦！」
「哈哈哈哈，老豆你唔好再嚇子鋒啦，你放心啦，你果三道符堅野黎架，再加上我都係學校睇實你，唔會有事架。」天賜對我說。
「我……我都會幫手架。」阿詩也溫柔的對我說。
我頓時安心了許多，至少知道有三道救命符幫我。
「超，你地有無睇戲架。男主角都係抱住必死嘅決心架嘛，俾你地咁搞一搞，無晒氣氛啦。唉，算啦算啦，都係時候傾下衰仔同新抱仔同居單野。」天命叔又回復嬉皮笑臉。
「呀，我都係走先啦，世伯，阿鋒同天……天賜。」阿詩紅著臉的道別。
「衰仔你聽到啦，仲唔送新抱仔返屋企，今晚你唔返黎訓都得架，最緊要追到新抱仔呀！」天命叔吩咐著天賜。
「夠啦老豆！阿詩我送你返去啦！」天賜也紅著臉對阿詩說。
「我又要你送我！」我在一旁也起哄道，結果我肚子又吃了紮實的一拳。
明天，星期一，我就要讓小詠上身了，希望順利吧！