港大七不思議食女事件: 36. 試毒
36. 試毒 老子有云：「禍兮福之所倚，福兮禍之所伏。」係咪中梅毒，又有咩好怕喎。令我同牧子分手嘅導火線，正係當日，浮木碼頭，酒入愁腸，誤砌阿Yan，今我打電話畀牧子嘅契機，又係阿Yan，真係成也蕭何，敗也蕭何。 「喂，我係麥可。」為燙平我內心嘅緊張，我講咗一個唔係咁好笑嘅笑話。 「阿邦？你打畀我咩事？呢排點呀，好耐冇聽你把聲喇。」牧子素來燕語鶯聲，但喺嗰一刻，聲音竟然有些許抖動。 「好耐冇見。有樣嘢，我想同你講，但係真係唔知點開口……」 「做咩唔開心呀？你講啦，我聽緊。」 「係咁嘅，其實分手嗰日，我冇返到大陸，反而去咗Raymond御龍山屋企開Party，飲大咗，同條新識嘅女搞咗嘢，我真係唔知自己做緊咩……」 我好友「屌聖」森爺教落，除非斷正，一定唔可以戇鳩鳩招認偷食。因為學讀Law嘅細佬話齋，One is innocent until proven guilty，若有證據，我死不足惜；但我受港大先進教育，打滾情場，食女無數，就好似冷戰時期嘅美國特工，就算被蘇聯佬嚴刑逼供，都會守口如瓶，決不洩密。 今忽歷巨變，人之將死，其言也善，喺呢個生死悠關嘅當口，我決定向牧子坦白。不過，可能出於面子，或者顧全牧子嘅感受，我並冇將野狼幫襯佢嘅故事，話畀佢知。 牧子冇出聲。電話聽筒，一片頹唐。 「我地都散咗啦，你仲同我講呢啲做咩？」 「我細佬今日入咗醫院，我喺瑪麗門口撞番呢個女仔。佢同我講，話佢中咗梅毒，唔知邊個惹邊個…… 「牧子，聽日我地不如約出嚟，一齊去油麻地診所驗吓，睇吓有冇中招……」 「…………」 「哦，你想點就點啦。」牧子平靜得出奇，令我回想起，尚未分手之時，每逢意見不合，佢都會默不作聲。比起患梅毒，變尼采二世，牧子嘅死寂，令我更加不安。 「好啦，咁聽日晏晝十二點，油麻地地鐵站見。」 翌日下午，風雲變色，大雨滂沱。我喺油麻地地鐵站，撐一把雨傘，等待歸人，等待不知幸或不幸嘅結局。 腕錶之上，時針分針秒針相疊，牧子就好似同我初相識一樣，從後拍一拍我膊頭。牧子短髮及肩，嫵媚依舊；惟細看之下，穿著背心披肩嘅牧子，與上月相比，清減不少，鎖骨隆起，同佢纖巧嘅香肩，形成一雙乾涸湖泊。 「行喇。」牧子眼神倔強，語氣比秋雨還冷。 「好耐冇見，你呢排點呀？」我嘗試一路行去診所，一路打破寂靜。 「我搬咗去同契哥一齊住。幾百個Friend，得佢一個收留我。」講咁耐，佢正眼都冇望過我。 「契哥？」我心入面第二句，就係「唔撚係掛」。 「關唔關你事？」 「我好怕我地會有事，尋晚我成日喺到諗，渣住條啫，左睇右睇，冇訓過覺。上次御龍山單嘢，我真係唔想，對唔住。」 「算啦，過咗去。你呢排做緊咩？」我一扮死狗，牧子即刻心都軟埋，拍拍我肩膀。 「我就畢業，寫緊本小說，當係自己嘅畢業論文。可能佢會好似《哈利波特》咁好賣，改拍電影，我做埋男主角，賺第一桶金，開電影公司，上市之後再集資，炒股炒樓，跟手再分拆上市，到時喇喎，淨係食股息呀，都食過世啦。」為了緩和心中嘅不安，我又喺到鳩嗡。 黑面嘅牧子，聽到呢到，忍俊不禁，然後就講：「你同以前一樣，咁鍾意周星馳同埋亂講野，冇變過。個故仔關於咩架？男女主角叫咩名呀？」 「男主角叫阿邦，同我一樣係港大生，係關於畢業嘅故事；女主角就叫阿杼……」想起阿予嘅小眼睛，我頓時失聲，竟然好像錯做事嘅小朋友一樣，有啲膽怯。阿予whatsapp咗我成朝，我都仲未覆佢機。 「點解叫呢個名咁撬口嘅？」牧子越講，就越變番以前嘅牧子。 「『杼』，木字邊做個予字，即係一個木，一個予，拼埋一齊，咪木予，木子，即係牧子囉。」將故事逆轉嘅一刻，我覺得我極有潛質去做小說家。 雲下雨，風正飄，傘子內，牧子笑。只要佢見到我，恨意就被風雨洗刷，旁人眼中，我地似係拍緊拖，多過去驗梅毒。 「係呢，點解你咁冷靜嘅？」我對牧子出奇嘅沉著，大惑不解。 「其實我自從同你分咗手之後，就冇再出嚟做喇；之後我做過身體檢查，好彩乜事都無。其實我想見吓你，陪吓你。」牧子一路講，一路食住支煙，將煙圈呼出，煙沒在雨中，語間似有無盡辛酸。 我望住牧子，心裡感動，不能再說些什麼。 行吓行吓，終於上到去一間免費驗性病機構，名為「關懷愛滋」。同牧子等電梯嘅時候，我總係覺得看更會驚嘆：「陰鳩公囉，咁後生就瀨嘢。」所以，我全程都冇望過佢。 一上到去，社工姐姐一見到我同牧子，眼神流露出半分謎樣嘅眼光。可能佢覺得，驗性病呢啲咁私人嘅事，好少男女朋友會一齊嚟驗。 「你地邊位驗？」 「我一個咋。」 「你一陣跟我入房，抽血，好快就知結果。」 我見到等候室入面，有幾個男人，都好似我一樣，猶如待決嘅死囚，個個年初四咁嘅樣。 「冇事嘅，一陣你出番嚟，我請你食雪糕。」牧子放低我對佢嘅背叛，好似我阿媽細個帶我去睇牙一樣，話要買雪糕氹番我。 等咗一陣，社工姐姐就我入房抽血。 社工姐姐問長問短，問我有冇嫖妓、有冇女朋友、有冇SP、點解嚟睇病、有冇出去一夜情。我過去一塌糊塗，連賓妹都屌過幾獲，如果有得驗，我想一次過驗埋伊波拉病毒。 「冇，不過呢排條啫有啲痕啫。」我談笑風生，差再未叫社工姐姐，過嚟幫手搲吓。 「好啦，你伸隻手出嚟，滴完血，如果張試紙有一條線，就有事，如果有兩條線，就冇事架喇，好快就知道結果。」 我依佢所言，抽血驗身。我雙眼望實張試紙，時針分針秒針，頓然停止。我諗起阿媽同細佬，兄生性病弟倍感高興；仲有出面憂心如焚嘅牧子，冰室嘅阿予，未完成嘅小說，壯志未酬，就星落五丈原，竟一時緊張得說不出話來。