港大七不思議食女事件: 51. 二姝

51. 二姝
 
「陳納邦，做緊咩呀，補完習未？今次補咁耐，都唔打畀我嘅？」牧子溫柔一如往昔，不知男友於情慾禁區妙射得手，做一晚城市花園大帝。
 
我輕按阿予纖纖玉手，試圖畀唔存在嘅安全感佢。阿予遇上第二個施立毅，一雙小眼睛向天花板放空，可憐可悲。
 
「係，個學生今日問題特別多，我私人補多咗畀佢，喂，一陣打畀你吖，乖。」只要講多兩句，阿予必定崩潰，我當機立斷，收牧子線，將阿予一擁入懷，輕吻佢臉龐。
 
之前講過，我行走江湖，食女無數，素遵父教，「死都唔認」，屌西屌感情，無往而不利。但阿予情感易碎，謊言一旦戳破，北角私樓夢碎事小，華富納邦去勢事大。
 


周旋二姝，全身而退，對受西化教育嘅浪子嚟講，都不過係權衡輕重嘅Prisoner’s Dilemma。人天性自私，我由是決定坦白從寬，脫離德仔嘅羈絆：「啱啱係我女朋友打畀我……」阿予聽罷，指甲深陷我嘅前臂，幾近見血。
 
淚水掛於阿予眼尾，欲墮不墮之際，天才小說家逆轉思路，又講咗一番蕩氣迥腸嘅大話：「你進入我生命嘅時候，啱啱同佢分手，但係識咗你之後，中間發生咗好多事，唔小心又喺番埋一齊，我唔敢同你講，係因為驚傷害咗你，變咗第二個施立毅。」阿予遭甜言蜜語攻陷，由爪變掃，輕撫我前臂嘅爪痕，既惱怒，又心痛。
 
「識咗你之後，我一路都寫緊小說。我見親你，都充滿靈感，所以我將個女主角叫做阿杼。
 
「根據小說嘅大綱，阿邦以為自己好愛阿杼，點知佢缺乏母愛，鍾意咗佢砌過嘅百佳阿姐，狠飛為咗自己而被冰室老細強姦嘅阿杼。最尾我冇咁樣寫，你知唔知點解？」呢一刻，我再肯定自己寫小說，講大話嘅天賦。
 
阿予聽到荒誕嘅劇情，不由得破涕為笑，搖搖頭咁講：「唔知呀，你繼續講啦。」
 


「我一直以為我會按劇本寫，但係我越寫就越代入，愛上咗唔存在嘅阿杼。直到我喺星光燦爛嘅夜晚，過海渡輪之上錫咗你一啖，我就知道鍾意嘅係你，唔係存活喺鍵盤入面嘅女主角。
 
阿予被我嘅說話感動，渾然忘記牧子嘅存在。
 
「我嗰日喺百佳冇砌到你，因為我知道自己有女朋友，你又醉咗，咁樣做，對你唔公平。」我捉住佢嘅手，再講埋呢個大話落去：「現實入面，我已經錯過咗你兩次，我又有女朋友，我地冇可能喺埋一齊，所以我唔會喺鍵盤世界再錯過你多一次。」如果港大有個Major係滾女人，我一定First Hon畢業。
 
「我鍾意Happy Ending，你畀個好嘅結局阿杼啦，應承我好唔好？」阿予對Happy Ending有一種無法解釋嘅執著。
 
「好，我就嚟畢業，上下求索，對前途一無所知，唯有喺冰室吊扇之下，邊食雞翼米，邊寫小說，先搵到救續。我有女朋友，我地冇可能喺埋一齊，你唔喺我身邊，我無靈感憑依，蕩氣迥腸嘅小說注定爛尾，我唔再寫喇。但係我今日先知，我擺脫唔到你。我唔係有心呃你，對唔住。」我講到激動處，諗起牧子，竟然眼角噙著不知真情定假意嘅淚水。
 


「有冇女朋友，又有咩所謂，只要你坦白，唔好好似施立毅咁呃我就得喇。」阿予被我嘅大話感動，用指尖掃去我嘅眼淚，身心都被我征服咗。
 
一番說話，兩個用法，牧子阿予，一雞兩味。就好似好友屌聖森爺話齋，將同一番說話，一次過send畀電話內可食用嘅囡囡，省時快捷，萬試萬靈，簡直係食女教條，Eating Girl’s Creed。
 
就係咁，我用三寸不爛之舌，輕易拆解呢個屌感情雙飛死局。
 
次日，我去銀行兌過支票，步出銀行，按一按袋裡得來不易嘅銀兩，確保佢不會好似我嘅感情一樣，易去易逝。我拎起電話，十隻手指好似跳舞一樣，不斷回應二姝痴身短訊，口袋嘅銀紙忽然變得沉重，竟然令我羨慕山大，佢一出世就住貝沙灣海景豪宅，視富貴如空氣般理所當然。
 
自此之後，我一三五就陪阿予，二四六就陪牧子，星期日我再冇打飛機，令自己玄鐵重劍稍作休息，過住忙碌兼荒唐嘅大學生活。我游刃於兩女之間，踩綱線如履平地。
 
有一日，牧子接我放學，陪我喺港大荷花池食Subway。我將Sub of the day食到一半，牧子忽然同我講：「你係咪唔鍾意我喇，你而家好少主動掂我喇。」
 
我分身侍二女，須知再鋒利嘅玄鐵重劍，都會有生銹嘅一日，牧子竟然用我行房次數，質疑我對佢嘅愛。我對呢句說話極其敏感，彷彿傷害咗我嘅尊嚴。
 
「我咁辛苦去搵幾份補習，畀錢你租屋住，等你唔駛再住喺契哥到，你而家話我唔鍾意你？」呢幾個星期，我瘋狂替人補習，畀錢牧子，好似王爾德嘅《夜鶯與玫瑰》入面嘅夜鶯一樣，用自己有限嘅生命尋找玫瑰，送畀意中人，令佢幸福。


 
「你咁大聲鬧我做咩？好啦，我返番去契哥到，唔再要你幫我喇。」牧子受軟唔受硬，竟然想拋疾我。呢個牧子，我真係又愛又恨。
 
我好嬲，諗起對阿予費盡唇舌，方呃呃騙騙到些許補習錢，南水北調，歷盡艱辛，供給正印。於是方丈好小器，將半個sub of the day怒轟落荷花池，對住牧子咆哮：「走囉，走咗以後唔好返嚟！」
 
牧子拎起手袋，轉身就走，頭也不回，經Run Run Shaw與中山階，行落開心公園。喺開心公園中間，牧子步伐稍為放慢，但係我真係好小器，放唔低男人嘅尊嚴，冇追到上去，牧子嘅短髮，就同開心公園[1]嘅榕樹一樣，消失得不留半點痕跡。
 
我喺荷花池踟躕不前，牧子去契哥到住，我就要去阿予屋企過夜。恰鳩我吖嗱，恰鳩我吖嗱。
 
巴士上面，我偷偷地檢查牧子嘅最後上線時間，發覺時間凝固，佢竟然嬲到3G都熄埋。身為浪子，我當然唔會死死地氣打畀佢先。
 
愛郎兼女婿夜訪，阿予羅太均極高興。當晚，我將留畀牧子嘅子孫，雙倍畀咗阿予，正是：「港大雲佩斯作客城市花園梅開二度」，羅太一定係球證韋比，無視雲佩斯對寶貝女粗野蹂躪，反為我嘅球技暗暗喝彩。深愛我嘅阿予，則希望呢場球賽永不終結，Until we score。
 
我摟住嬌小嘅阿予倦極入睡，夜來竟無夢，不知預告甚麼。
 


次日朝早，我檢查whatsapp，牧子嘅最後上線時間係上午五點，我倒並無放在心上。阿予見到我，就好似蜜蜂見到蜜糖，對我千依百順。日上三竿，我知道我該走了，離別之際，阿予眼睛發紅，就講：「我好唔捨得你，你畀我送你返屋企好唔好？我都好耐冇去華富喇。我地去冰室食嘢吖好唔好？」
 
陰西神功收服阿予，令佢上癮，無法自拔。佢曾經講過，要見到我，先感到生命嘅存在，見唔到我嘅時候，就頓覺生無可戀。我一番戲言，就屌咗阿予感情。
 
我拖住阿予，思念牧子，內心同現實一樣糾結不清，牧子嬌柔，阿予痴心，可惜人生唔係出奇蛋，無法一次過滿足三個願望，我知道終有一日要逼我揀，我知道。
 
落車。
 
阿予拖住我，甜蜜地向冰室行去。「等陣，我有驚喜畀你。」阿予話畢，喺袋中拎出一條手織淺藍色頸巾，掛喺我頸上，眼睛充滿快樂：「我織咗好耐架喇，你睇吓你幾靚仔！」
 
雖然條頸巾手工好差，錯晒針，但畢竟係一番心意，我心裡無限感激，只好攬住阿予，一嘢轟落去。
 
對住女人，除咗一嘢轟落去，我仲識啲乜？
 
奇遇往往喺我身上發生。我轟吓轟吓，感覺一股涼氣，抬頭，只見不遠處，牧子冷冷咁望住我同阿予，眼神充斥忿恨與失望，秋風發微涼，我卻感寒風刺骨。


 
阿予望住牧子，眼神堅定，用頸巾索住我，將我摟得更緊，向牧子示威，一定知道發生緊咩事。
 
牧子轉身狂奔，阿予大力捧住我臉龐，一嘢轟上嚟，不自覺流淚，不容我挪移半步。華富邨空氣停頓，阿予瘋狂吻我，遭受刺激，不斷叫我「阿毅」，我無法呼吸，好像返回童年，於華富邨與野狼遭飛仔欺負，不知該不該拔足逃跑，從愛情逃離，再追趕愛情。 [1] 開心公園：正式名稱為中山廣場，位於港大圖書館對出。