那夜,我在老蘭狩獵了天使: 第九章

我依幾日就好似拍戲咁,男女主角終於一齊,跟住初戀情人出現,簡直係編劇諗唔到橋夾硬作出來,之後就話男主角同初戀情人點樣又誤會,跟住經過多輪波折之後男女主角又係返一齊咁(一定係除非唔係)。
老實講,自從分手之後我都無見過Suki,不知不覺過左五年。佢好似肥左,仲記得以前係大學係校花,上過雜誌選過(好似嬴左),靠既係甜美樣子同笑容。我地係大學同學,佢讀醫我讀商,朋友介紹相識。我唔太記得點追佢(大概送下花出下街),係一次睇完戲送佢返屋企,佢同我講:「同你一齊感覺好舒服,好開心...」就係咁,我地係一齊。我地拍左兩年幾,可能大家家庭成長環境唔同,經常都嗌交,有時佢忍下我,有時我忍下佢,將嗌交啲野求其過左去就算。
至於點解分手?就算今日我問自己我都唔係好知,可能佢有第二個掛(聽人講佢同我分開無幾耐就有個新既),一直想知點解但都無機會。
「點解分手?咸豐年前既事就唔好提啦!」今日Suki就咁答我。
我地係附近搵間cafe坐低傾計,佢而家係公立醫院做急症,仲有個下個月就結婚既未婚夫。至於我,佢有以下總結:
「你仲係咁既樣呀?都五年喇,你都無變過?」
的而且確,五年來我渾渾噩噩,如果唔係屋企既關係我神早就訓街,我諗依啲就係佢同我分手既原因。
「其實你人幾好嫁,又會關心,做事又體貼,係有時做野三分鐘熱度,太容易放棄...」
佢不停講左一大埋缺點出來(我諗EQ低啲既可能會走去自殺),佢人就係咁得勢不撓人...
「你有女朋友未呀?無我可介紹俾你喎,醫院啲護士都唔錯嫁,啱晒你玩制服喇!哈哈哈...」


「講依啲...唔使喇!我而家有女朋友,唔係玩玩下個隻。」
「咁咪好囉!對人好啲啊!」
「我識嫁喇!長氣!」
「仲有呀...人要長大嫁,過去左就過去左,攬住都無用,時間唔等人...好啦!得閒電話聯絡,仲有下個月準時出席啊,人唔到禮都要到啊!」
「得喇!到時整份大禮俾你好唔好?拜拜!」
「拜拜!」
望住Suki越走越遠,心裡百感交集。以前我以為自己可以好灑脫,咩都放得低,但分手之後先發覺自己唔係咁,漸漸我開始去浦去強迫自己忘記佢,但有些事越想忘記越係記得,而且每次回想就好似有把刀要將所有野刻落個心度要你一世都要記住咁。慢慢我開始用性去麻醉自己,估唔到一過就過左五年。
今日撞返Suki,我個人好似輕鬆左,以前放唔低既都放低左,不知不覺間又行返阿珊間cafe度。見到阿珊,我知道自己必須改變,否則就會重複返以前既錯誤,我要為阿珊作出改變...