《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 商埸征途
「咁不如我地再介紹下自己先啦， 我叫呀傑， 岩岩救左我地個位係權哥。」
因為啊權救過我， 而佢年紀同身型都好明顯大過我， 所以我下意識叫左佢權哥。 而且佢一臉冷淡咁望住出面， 我諗佢應該諗緊野。
原本企係牆邊既權哥橋住雙手望緊門口外邊，聽到我介紹佢之後擰轉臉揮一揮手。之後呀帆就搶過話題開始介紹自己，
「我叫黃一帆， 我22歲做救生既，平時好鍾意玩水上運動， 岩岩放工之後搭車返屋企就遇到d咁既事，跟住就見到你地啦。」
坐係呀帆隔離既係啊豪，見我地視線集中係佢身上就開始講，
「我叫周俊豪， 我做地產既， 呢個係我女朋友楊芊琪…， 佢做文員。」
「千奇百趣？！」 呀帆難掩一臉驚訝既神情， 睇黎佢都係傻傻地既。
。。。
呢個時候大家都靜左一靜， 無人估到呀帆突然間會搞個咁既gag出黎，呀豪反應過黎就睥住佢。
「我… 都係想搞下氣氛姐… sorry呀芊琪姐冇心笑你個名架… 你千奇唔好嬲呀…」
「哈哈哈哈哈哈」
旁邊傳黎海晴既爆笑聲，「千奇百趣，好搞笑呀哈哈哈」佢掩住個嘴係咁係到笑，笑左幾秒之後終於停，「笑到肚痛啦」
芊琪姐一臉無奈咁擺擺手，「算啦你叫返我Coco姐算啦， 唔洗再叫中文名啦。」
「好，咁我地開始討論啦，討論一下我地之後應該點先安全？我地可以點做？大家可以隨便發表意見，再投票決定點做好冇？ 咁我開始講先，我認為我地應該先搵一個安全既地方，然後係個到等警察黎救我地，你地覺得呢？」
係我地岩岩先開始放鬆既時候， 呀豪開始討論我地之後既行動， 雖然依加既我地好攰， 但係都明白唔可以坐係到乜都唔做。
「唔我唔係好同意我地應該搵地方等人救， 岩岩我地跑黎商埸個陣， 我見到火車站大堂門口個到都有架救護車停左係到， 如果有人黎救我地既話應該一早就黎左啦。」海晴望住呀豪， 但係明顯唔同意佢既講法。
「無錯， 加上依加火車站d喪屍走曬出黎， 而原本出面都可能有喪屍， 我地好難搵到一個地方可以長駐係到等救援。」 Coco姐都唔讚成呀豪既意見， 睇黎留係到都係無咩可能。
「仲有，就算我地真係搵到個地方留低，比如係呢個商埸咁，我地點樣封好d出入口同搵野食？ 仲有地方咁大唔知商埸上面有冇危險，而且岩岩試多左次報警係無人但係無人聽電話， 佢地都可能收左皮」我亦都支持佢地既想法。
「話說你地上唔上到網？ 我部電話冇曬signal，本來想上網睇下有冇新聞知發生咩事，但係一格都收唔到。」 呀帆拎住電話一邊睇一邊問我地。
的而且呢個係一個需要慎重考慮既問題，我地需要一個長遠而有效的方案， 每一步既行動都要三思而後行， 只要有少少錯失我地就會失去性命！
「我一早係火車站已經發現左電話收唔到， 講返之後， 我覺得出去始終好危險，出面實在太多喪屍！」 呀豪都係反對離開商埸呢到， 但係唔走我地可以係到等到幾時呢。
「去碼頭。」呢個時候權哥加入我地既對話，
「紅磡碼頭？ 去個到坐船走？ 你有船咩？」 呀豪對權哥講， 語氣並唔和善。
「咁我有同你解釋下，第一，呢到已經被喪屍發現左，完全係唔適合留係到。第二，為左逃走少少危險係無可避免，岩岩我地走個陣，被幾多喪屍追住，係幾多喪屍口邊走出黎？最後，我可以保證，碼頭係我地逃生最大既機會。 而岩岩係車廂你地都見到我殺左兩個喪屍， 而且應變能力都唔差。 去碼頭既路上有危險我會盡力保護大家，但我唔能夠證你地全部人既安全，不過我會為大家判定邊條路係安全，係危險情況應該做咩野。如果都係唔同意既話， 我會自己前往碼頭。」
權哥冷漠而堅定既雙眼掃視在埸每一個人， 每個字都清晰咁傳遞一個信息── 就係紅磡碼頭先係唯一既生路。
「仲有冇人有問題？ 咁邊個人想去碼頭？」
權哥低沉有力既聲音彷彿穿越我地耳膜， 直接傳遞信息去我地個腦到咁， 不自覺覺得佢講既野比其他人更有權威。
「我同意權哥既講法， 佢講得好有道理， 但係依加出去亦都係危險， 而大家都好攰啦。 不如係到留一晚先， 休息一下回復精神同體力， 第朝再行好唔好？」
我贊成權哥講既野， 而呀帆海晴都點頭話同意留一晚先， 之後再去碼頭。 而權哥就回一點頭， 之後繼續望住商埸入口個邊。
但係呀豪似乎唔鍾意權哥講既野， 佢正想企起身同啊權再對質， 但Coco姐拉住佢，再勸佢一齊行動，
「留係到都唔知安唔安全， 況且大家一齊行動始終安全d， 我地跟住佢地去碼頭先啦， 中途如果再有其他地方我地先走好唔好？」
聽到Coco姐咁講， 呀豪都冷靜左，睇黎佢都被勸服左一齊行動去碼頭， 只不過係唔滿意權哥既語氣姐。
「好咁我地休息下先， 想訓覺既可以訓先， 到休息完先去搵武器同糧食。 我地搵一個人睇住門口， 啊權哥你望左咁耐就你繼續睇門口啦。 」
講完後呀豪就拉埋佢女朋友坐去角落頭到休息， 而呀帆就周圍搵野食，仲時不時問我同海晴食唔食包，
「喂你地食唔食d包先呀， 食d野精神d 呀， 食飽再訓啦。」
見我地只係擰擰頭， 呀帆繼續講， 「話說呢到好黑喎，原來已經7點半啦，」
呀帆睇一睇隻錶再講，「係咪因為d 人變曬喪屍冇人開燈呢， 哈哈哈…」
「得啦得啦，有野抖陣先講啦， 我想去廁所洗個面呀， 你地陪我去啦。」 海晴一邊企起身一邊問我地。
「喂我都有d 急尿吊喎， 傑仔你想唔想去廁所…」
「唉去啦去啦去完再訓， 話說出面無事架可…」講完我都唔係好放心， 周圍望下有冇野拎黎旁下身。
於是我地三個就企起身， 經過權哥既時候同佢講左聲， 佢提我地記得閂好門再去廁所， 留意周圍環境， 同時入去整麵包個廚房到拎左把刀比我地。
「有事大叫， 我會趕過黎。」 權哥走前再叮囑我地， 之後就住返低去角落。
跟住， 我地就開門， 行入無盡既黑暗之中。
海晴，阿帆同埋我，我地一行三人小心翼翼咁向住商埸既廁所走去。
依加時間已經係夜晚， 商埸亦只有靠街外微弱既燈光照入黎， 係呢個昏暗既環境下我地只有一步一步慢慢前進， 去搵指向洗手間既牌。
「呃啊！」 後方傳黎恐怖既慘叫聲同埋碰撞聲， 雖然知道係商埸外面既喪屍而唔係商埸入面， 但係呢個氣氛既包圍下我地都加快左前進既步伐。
由麵包舖行出黎， 我地行向同商埸入口相反既方向， 呢條路應該係通向商埸中心， 而行到前方會係一個三叉路口，前方係比較空曠既地域，左同右分別通往其他舖頭。
洗手間既方位通常係會座落於商埸既角落， 正當我地想轉彎繼續去搵洗手間既時候， 突然有人拉我同阿帆去牆邊。
「等等！ 個邊好似有人影！」
海晴突然拉住我地企係原地， 同時指向一條扶手電梯。
被佢拉一拉同聽到遠處有人影既消息， 我既心跳不由得加快， 照道理呀豪佢地唔會依加跟埋出黎， 就算係都冇可能快過我地！
「唔通係其他乘客？」 海晴做口型問我地， 我搖搖頭， 表示不可能。 其他乘客以我估計應該凶多吉少，
跑向A同B出口既只有我地， 而去C出口既係岩岩逃跑既過程都見到只有阿晴一個出到黎， 而D出口大概係去紅館既方向， 點都唔會行黎商埸呢邊。
咁唔通係喪屍？ 諗到呢到既我開始恐懼同焦急， 我地係咪應該返去搵權哥佢地先再一齊行動？ 分開行動通常會出事！
上一秒仲以為係好安全既商埸， 依加先記得我地係周圍都有喪屍既地方！ 根本唔可以放鬆！
「定係你睇錯？ 」
阿帆慢慢伸個頭出去睇， 但係呢到咁黑， 可能係商埸d風口位吹郁左d野姐， 但係後來我先知道， 我實左錯得好緊要。
喪屍係到既可能性的確好低， 我係到安慰自己。 一直以來期待自己成為末日既英雄， 但當危險黎到自己面前， 我先知道原來我真係好驚。 我心跳好快， 全身都發熱出汗， 耳邊不停響起喪屍既吼叫聲同拍打聲， 緊張既我企係牆邊，等待喪屍襲擊出現。
阿帆一邊望一邊同我地揮揮手， 「應該無野， 我睇唔到有野行黎行去。」
聽到阿帆咁講， 我緊繃既心情終於放低， 身體一軟就攤左係牆邊。
阿帆拎轉面， 見到我坐係地下， 就問我有冇事， 我擰擰頭就起身繼續同佢地行。
「喂你冇事嘛， 行啦唔好再攤係到」 聽到之後我企返起身， 行去望下廁所到底係邊一邊。
「我記得廁所係轉右就係啦， 我地小心小小行過去啦。」
雖然好似安全，但海晴都係唔放心，叮囑我地幾句就繼續行。
行到前方路口， 我地轉向右邊， 而洗手間就係前方不遠處。
商埸入邊仲係冇電， 冇燈光照明亦都冇冷氣開， 只有之前開落殘存既冷氣剩低， 為呢個商埸營造左恐怖既氣氛。
「吚呀───」
終於我地行到廁所指示牌到， 推開防火門後我地走入到幾乎全黑既走廊入面， 我地只好拎出電話黎照住行。
一路上我地都冇再講野，經過左岩岩既事， 即使係好鍾意講野既阿帆都被氣氛影響到， 只係警戒咁慢慢行。
走廊應該係一直通向前面， 而左手邊間唔中有d門， 應該係連接住餐廳後門比人去廁所方便d， 而前少少既走廊右邊， 就係洗手間。
係走廊盡頭， 有一個醒目既綠色牌寫住 EXIT， 應該係防火通道既出口， 但係火車站既喪屍呢一刻都唔知去左邊， 佢地完全有可能已經遍佈商埸外圍。
「不如我地全部去同一邊， 叫做安全d， 呀晴你可以去廁格， 我地唔會偷睇你。」
我將心中既諗法講出黎， 因為分開兩邊去的確好危險， 有事上黎好可能趕唔切幫手。
「吓… 咁好啦…」 海晴聽後好似唔係好願意， 但最後都肯一齊去男廁個邊。
海晴入左廁格之後， 我同阿帆將電話放係洗手盤附近當燈咁照住， 阿帆將把廚房刀放係一邊。
我地去完之後就開始洗下臉我擰開水龍頭， 好在仲有水比我地用， 而洗手間只有水流動既聲音，令到洗手間喺呢一刻越發寂靜。
「其實你覺得我地有冇可能去返原本既生活？」 突然阿帆打破沉默， 佢阿帆望住鏡入面既佢， 一邊問我。
「我都唔知… 但我覺得出面一定仲有生還者， 而政府一定都會有安全既地方保護我地既， 況且權哥講去碼頭走佬， 我覺得係可行架。」
我望向鏡入面既阿帆， 一臉倦容既佢露出一絲微笑， 只不過眼神帶有點悲傷。
「如果可以， 我希望可以返屋企睇下屋企人， 雖然我知道好可能佢地已經唔係個到， 但唔望一望我都唔會甘心。」
阿帆望向我， 我都點點頭， 呢個時候海晴都係廁格出返黎， 佢行黎我地隔離到開始梳洗。
「呢到我地3個年紀最相近架啦， 我地應該互相幫忙！ 第時就算喪屍末日完左都可以做朋友嘛！」
見海晴出返黎， 阿帆又再次繼續鳩up， 見佢轉變咁快， 我都呆左一呆， 但諗起佢岩岩講既野， 我都明白佢既心情。
寂靜再次包圍我地， 洗手間再次只有流水既聲， 終於我地梳洗完， 阿帆再拎返起把刀， 我同海晴拎住電話照明， 一行三人準備起行返去麵包舖。
出到去， 前方依舊只有寂寥既燈光， 照係一張張櫈上面。 岩岩我地冇留意到前面到底放左咩， 原來呢個地方係Pacific Café既。
海晴一見到就行過去，「喂… 不如過去拎杯咖啡， 萬一一陣休息唔夠都可以飲黎頂住一陣嘛。」
但係好明顯我地未應， 佢就已經行左過去， 我同阿帆只好跟上去。
行到去café個邊， 海明行去吧台後面開始搵咖啡， 阿帆則企係旁邊睇住佢。而我就企係遠少少既地方， 再次開始打量一下呢個商埸。
同頭先一樣， 商埸仍然係一片昏暗， 周圍既舖頭都打開門任由人進入。 商店入面並無開燈， 望入去只有漆黑一片。
離我地最近既屈臣示亦都一樣， 被黑暗圍繞住既店舖入面一d生機都無。
「好啦我搞掂啦， 行得啦」 終於耳邊傳黎海晴既聲音， 佢同阿帆向我行過黎， 海晴兩手都抱住一罐罐既咖啡， 但係佢唔夠力， 一個唔小心將d罐跌曬落地下。
「哐噹────────」
整個商埸響起一聲聲巨響， 聲音就猶如流水般包圍我地， 係商埸既地下同天花不停回響， 亦令到我地三人都嚇一跳。
「哇頂， 嚇死人咩」 阿帆嚇得退後一步， 即使有所警備咁舉起手上既刀， 係睇清係呀晴跌野之後先鬆一口氣。
「小心d嘛你， 一陣引到d喪屍入黎商埸我地就大獲啦。」
阿帆同海晴講， 海晴由呆左一呆終於回神， 向我地舉一舉手表示歉意。
「喂我幫你拎d啦」 見佢拎得咁辛苦， 而阿帆係我地唯一一個有武器既人， 無野拎既我就同海明講幫佢拎d咖啡。
執返起之後我地三人沿住原路行返去， 我地回復正常步速係黑暗中穿梭， 好快就行返到去商埸既中心位。
而係商埸中心位扶手電梯附近， 散落左一塊血色既玻璃碎。
「喂你地睇下， 地下個d係咩黎？！」 海晴見到地下既碎片， 即時停下腳步叫我地。
同時我同阿帆都睇到地上既碎片， 係一塊染上血既玻璃碎。
「點解地下會有塊玻璃？ 之前黎個陣地下有冇架？」
海晴一邊彎低身望住玻璃碎一邊問道。以我既記憶黎個陣係無呢塊玻璃， 加上佢有疑似係血係上面， 即係話…
「權哥佢地個邊可能出左事！ 岩岩我地睇到既人影唔係睇錯！ 我地快d返去！」
突然間所有疑問都解開， 就係商埸已經唔安全！ 至少唔係我地諗既咁安全！
佢地聽到之後即刻開始跑， 我地沿路一直跑返去麵包舖。
「但係權哥佢地個到都可能有喪屍！」阿帆邊跑邊講。
「係， 但係可能都等緊我地救佢地!」 海晴回答。
係我地仲相議緊既時候， 我地已經就快到我地避難既地方， 係前面左邊就係麵包舖。
而係呢個時候， 我終於确認岩岩睇到既並非係睇錯。
麵包舖係商場既入口對出， 靠住出面微弱既燈光， 我地依舊可以睇到門口既情況。
商場入口既玻璃門上， 依然插住權哥放既鐵櫈， 但係。。。
但係上面穿左一個大洞!
玻璃門既上半被撞開一個大洞! 破碎既玻璃一地都係， 而係洞上面仲有喪屍上半身伸左入黎! 幸運既係佢雙臂被斷開既玻璃插穿， 雙手郁唔到。
「呃啊…….」
喪屍發出呻吟聲。
「天啊……. 入口打爛左…」 海晴見到呢個情況不由得掩住口難掩佢既震驚， 我地都唔知大事不妙了。
「我地慢慢靠牆行返去面包店， 權哥佢地可能仲係入面未走!」 我唔相信權哥佢地就咁會出事， 以權哥岩岩既表現， 佢絕對可以帶阿豪佢地走得甩！
我一邊凝視商場門口一邊伏低， 準備慢慢向麵包店行去。
「其實面包舖咁近入口， 首當其沖一定會見到佢地， 如果佢地已經出左事我地再去咪送羊入虎口?」
阿帆呢個時候提出一個好好既問題， 佢望住我同海晴雙眼， 堅定既腰神同平時輕浮既佢有好大出入。
海晴不可置信咁望住阿帆， 「你意思係唔返去我地自己走? 如果芊琪姐佢地等緊我地救或姐等緊我地返去! 咁我地點對得住人地呀!」
呢個時候我覺得有d驚訝， 阿帆竟然會反對返去救權哥佢地?
阿帆再繼續講，「 唔係咁既意思… 我只係覺得返去有一定既危險性姐」
「由喪屍出黎到依加我地一直都咁危險架啦! 如果我地今次唔返去， 我地以後都唔會安落! 返去可能未必救到佢地， 但至少我地都問心無愧」海晴講到好激動， 成身都顫抖住。
聽住佢地講我先明白， 原來人與人之間好多時候都會有拗撬， 有不同既意見。 又見到喪屍到走入黎商埸開始， 我一直一廂情願咁以為大家已經係一team人。佢地都會擔心權哥佢地既安危。 雖然識左唔耐， 但都算係同過患難既伙伴。
我心中諗既係我地一定會去救佢地， 救佢地係我地不可避免同首要既任務， 可惜阿帆並唔係咁諗。
「既然你地都想返去， 咁我都同你地返啦。 」終於阿帆嘆氣一聲， 由於我同海晴都支持返去麵包舖。如果再反對落去阿帆都只能自己走， 佢放棄左反對我地就擰轉面望向入口。
「但係……」
「千奇唔好分開跑」阿帆再同我地講，
阿帆指向岩岩洗手間既方向，「如果有事我地就走入商場入邊， 轉左個邊有另外一個出口」
「喂，個邊又有個人影！」雖然前面有住我地唔知既狀況， 但係未確認權哥佢地生死之前我地都唔會甘心。
「呃啊啊啊啊」
「係… 係喪屍呀！」 海晴心急咁拉住我地， 同時指向右手邊既扶手電梯。
係商場入口附近就係兩條扶手電梯， 而我地既位置就係兩條電梯既後面， 即係只能夠望到近d既電梯下面同遠d既電梯既側面。
呢個時候扶手電梯傳黎一聲聲既叫聲， 係我地熟悉既喪屍叫聲， 只不過並唔係發現人類時興奮既叫聲， 更似係無黎神氣既聲。
「睇黎佢地應該未發現我地， 襯依加快步行返入去!」 我壓低聲音同海晴佢地講。
我地開始慢慢咁潛行過去， 伏低身既我盡量唔發出任何聲音。 周圍一片昏暗同死寂， 寂靜之中不時傳來一聲聲既怪叫，
「嗚嗚嗚嗚嗚…」
被周圍既聲音加上詭異既環境影響， 我既體力始消耗得好快。 我既雙腳同腳底傳黎陣陣酸痛， 汗亦係背脊同手心滲出黎。
潛行左大約一半路程， 短短十幾米既距離就好似要行一個鐘咁耐同咁沉重， 我地開始同扶手電梯擦身面過， 高聳既電梯就係我地右邊， 電梯上既廣告仍然清晰可見。
繼續行既時候， 右邊突然傳來異樣。
「呯──────────────!!」
係我地右邊! 有一個人影撞向電梯下另一邊 ! 著住白色衫既女人係無意識只係係到行走既佢面向我地， 撞向電梯扶手處 ! 發出一聲響徹雲霄既碰撞聲 !
「吼啊啊啊啊啊啊！」
「呃啊啊啊!!!! ──吼啊啊啊啊!!! ───」
豪無先兆之下， 佢發出一聲驚天地既大叫， 回復佢既， 係係商場入面各處發出既吼叫聲… 同埋商場入口傳黎既燥動。
「佢見到我地啦， 走啦！ 佢跑過黎我呢邊啦！」 海晴急聲講， 同時停低腳步。
「踏踏踏踏踏───」
到處傳黎一聲聲既跑動聲
「哐啷!!!!!!! ────────」
前方入口都傳黎玻璃爆破既聲音， 入口終於被撞爛左!
「走啊!!!!! 返轉頭!!!!! 」阿帆起身就跑。
四周除左一陣陣既叫聲， 仲有無數既腳步聲環繞我地傳黎… 唔通商埸入面本來有喪屍? 但係無可能， 入口先岩岩被撞爛…
呢個念頭係我腦中一閃而過就被我壓返低， 呢個時候無時間諗其他野住 !
「等陣 ! 我去睇一睇就返黎 !」 我地離麵包舖其實只係得返幾步既路程， 既然被喪屍發現左， 再潛行都無用 ! 跑過去睇一睇好快姐 !
「如果佢地仲係到就走左出黎啦 ! 喂 !!」
無聽到阿帆既勸告， 兩三步我就跑到去聖安娜餅屋既門口， 敞開既玻璃門入面…
空無一人。
「沙沙…. 沙沙沙…. 沙沙…」
櫃檯呢個時候傳黎衣服摩擦既聲音， 應該有人喱埋左係下面，權哥佢地果然係到 !
「我地返黎啦 ! 喪屍爆左入黎啦 ! 快d走啦 !」
下一秒一個身影係收銀處台下面企起身， 但無燈光我睇唔到係邊個。
「權哥…? 阿豪… Coco姐…?」
我試探性咁問… 因為企起身既只有一個身影。 個身影慢慢咁行近我， 商埸外既燈光亦慢慢照射到佢既臉上。
一個中年大叔既臉映入我雙目， 佢口角流住一滴滴既血同一點點既肉碎， 雙眼同鼻都有一行行既血…
「吼啊啊啊啊啊啊 !!!」
可惜回答我既並唔係權哥呀豪Coco， 而係一聲我最唔想聽到既答覆。