眼前見到既唔係權哥、呀豪同Coco, 而係喪屍。  係呢間舖頭入面見到既只有喪屍, 並無任何活人。

「快d走啦! 入面無人啦! 走啦!」

呀帆經過我身邊拉我走, 呆滯既我差少少被眼前既喪屍咬到。

如果我知道所有既事會轉化成咁, 我情願一早就死去。 呢個時候我開始有少少頭痛。

喪屍既腳步聲已經近在咫尺, 係我身後響起無數既吼叫聲, 身體傳黎一股力量將我拖走。 儘管我仍然處於發呆既狀態, 雙腳卻自然咁跟住退後, 為我身體保持平衡。





係麵包舖跟出黎既係滿身鮮血既喪屍, 我明白到, 剛才認識既生還者們, 已經唔再係到。

「屌呢邊呀走啦!」

耳邊再次傳黎阿帆心急既呼叫聲, 同時面上傳黎一陣火辣既刺痛。

「肯醒未呀你! 殺到黎啦唔走由得你!」

係海晴, 我記得我仲有你同呀帆, 眼前焦急既兩人令我終於回過神黎。 但係門口既喪屍亦開始湧入黎。





可能我地會生存落去, 可能唔會, 唔係, 唔關生還事, 只係呢一刻我唔想放棄呢兩位朋友。

千奇唔好分開跑

如果有事我地就走入商場入邊, 轉左個邊有另外一個出口

我企返起身保持平衡, 拖住海晴同推住呀帆, 轉身就向商埸深處跑。

前面有一棟棟支撐商埸既柱, 大型既圓柱可以為我地拖延短暫既時間。 前方有一個白衫既女喪屍, 而後方則有大量既屍潮。





只有前方先係我地既出路。

我跑向喪屍, 抬起腳踢向比其他喪屍瘦弱既女人, 藉住助跑既衝力伸向佢心口, 成功將佢踢係地下。

然後我地三人就繼續向前跑, 前方係岩岩既café。

我地身後整個商埸都傳黎震耳欲聾既吼叫聲同腳踏聲, 每一個追緊我地既喪屍都以自己極限既速度追逐緊我地, 甚之有d仲用上四肢去加速。

當你被一大群生物以超越常人既速度追趕既時候, 唯一可以做既就只有向前跑。 過左前方既café就會有一條分叉路, 以一條扶手電梯作為分隔。 照呀帆既講法左邊就應該係出口! 係依加唯一既生路!

呢個時候我地經過右方既洗手間, 快速跑入處於商埸店舖中間既pacific café入面,

昏暗既café入面, 四周都係一張張梳化圓枱同埋櫈, 露天既設計令我地有更多遮蔽去拖延時間。

「呀!」





突然後面傳黎海晴既叫聲, 拖住佢手臂既掌心亦開始滑落。 我回頭一睇見到海晴右腳被櫈腳勾一勾, 整個人失去平衡跌係地下。

我以最快既速度扯起海晴, 同時佢亦儘快企起身。 但同時我亦望到後方既喪屍已經離我地只有十米都無既距離!

「吼啊啊啊啊啊啊啊!!!」

身後大約有十幾個喪屍追住我地, 每一個都成面都係血, 離我地最近既甚之已經掹大左個口! 血同口水混埋一齊流出黎。
以最快既速度起返身後, 海晴同我再繼續向前方跑去, 阿帆既身影離我地亦越來越近。

阿帆停左係條扶手電梯背面既下方, 好快我同海晴已經跑到去佢身後。

「走啦搞乜呀你!」 海晴焦急咁問,

阿帆亦快速咁指向前邊,「你睇下前邊…」





呢個時候我終於明白點解阿帆停低。

前方等緊我地既並唔係出路, 而係另一片地獄。 十幾二十個喪屍係前邊遊蕩緊, 部份近我地既甚之已經開始注意到我地!

「鈴鈴鈴鈴鈴鈴鈴鈴鈴鈴鈴鈴鈴鈴鈴鈴──────────────────────」

呢個時候右邊突然傳黎刺耳既火警鍾聲! 前邊既喪屍大部份都即刻跑去右邊, 左邊只係得返幾隻喪屍! 雖然唔知咩事, 但係係好機會!

「照衝! 去出口!」

回頭一望身後既喪屍已經離我地只有四、五米, 我地已經無選擇, 只可以強行衝去左邊!

睇完後面既喪屍之後, 恐懼感驅使我快速行動, 我拖住海晴帶頭跑向左邊, 係喪屍雙手捉到我之前一腳踢低佢! 再全速向前跑!





「呃啊啊啊啊啊啊啊啊啊啊啊啊啊啊啊啊──────────────────!!!」

好快被踢低既喪屍發出吼叫聲, 佢後面既喪屍都開始撲向我地, 全速跑緊既我烏低身同時貼住左邊店鋪既玻璃窗跑, 但係我減唔到速只能夠撞向玻璃窗。

頭同膊頭傳黎劇痛,同時海晴亦撞落我背脊, 雙重既痛楚令我想坐低抖下。 但我無時間再停低, 後方傳黎阿帆既大叫聲。

我企起身拖起海晴再跑, 同時回頭見到阿帆用刀插向喪屍條頸到, 未拎得切把刀出黎就跑黎我地隔離!

前面已經見到好多廣告牌, 而呢到既盡頭就係向下既扶手電梯!

前方走廊盡頭再傳黎喪屍既叫聲! 兩個雙眼通紅既女喪屍跑過黎呢邊! 一個喪屍額頭上既傷口深可見骨,另一個面額仍被咬穿!

「哼───」

阿帆低哼一聲, 拎起左邊鐵造既垃圾筒, 一野掃向前面右邊喪屍既頭令到佢失平衡, 比時間佢走。





剩低既喪屍我伏低避開佢既雙手, 女喪屍既雙手撥過我頭髮, 好在捉唔到已經係極速跑緊既我, 我同時跑去佢後面, 再將佢推向牆邊。

終於有空位比我地跑落去, 扶手電梯已經停電無再郁, 我地三人跳級跳級咁極快跑到落去地面, 左邊又係另一道玻璃門!

「出口係個到!」 阿帆興奮咁同我地講。

「踏踏踏踏踏踏踏踏─────────────────」

後方傳黎響亮既腳踏聲, 喪屍已經追到扶手電梯跑緊落黎!

我地三人繼續跑, 阿帆突然叫我, 「喂幫幫手拉跌佢!」

係左邊有一大埋扭蛋機, 阿帆跑向最近玻璃門個一部, 想將佢推跌!

我即刻上前幫手, 合我地兩人之力推趺部機, 同時海晴拉開玻璃門, 我地見部機開始趺就跟上去, 應該可以為我地拖延多d時間!

出左玻璃門之後, 左邊再有扶手電梯, 我地三人迫不及待咁跑落去, 跑左兩條之後終於再無電梯向下!

我地終於走出商埸, 但係呢個出口卻係帶領我地再次返到火車站。
 
 


 
講返由商場跑出黎之後, 我地見到既係一條扶手電梯, 電梯係露天既, 所以係見到出面既情況。

落左第一條電梯之後, 我地既落腳點係係同火車站成水平既高度, 透過一塊高度到心口既長玻璃隔住我地同馬路,而再落一條就會係接駁返火車站A出口既行人天橋。

係我地落左一條之後, 我望向出面既火車站, 情境實在令我無法忘記。

熟悉既香港已經唔係到, 見到既係同電影情節一樣。

由於天色已黑, 外面只能靠街燈照明, 一片金黃既燈光照係夜幕已深既車輛到, 但係出面既卻唔係人, 而係一班癲佬──喪屍。

「我屌…」

阿帆跑跑下都停左落黎望一望出面, 我地都停低睇。

外面既情況與其話係好多喪屍, 不如話係屍橫遍野, 到處都有喪屍行走既蹤影, 間唔中有喪屍撞到的士都無反應照舊行走, 而火車站…

早已面目全非。

火車站既落地玻璃已經碎曬, 係個邊有好多, 好多既喪屍扒係人類身上, 佢地係之前既乘客。

睜開眼既佢地睇得出死前既唔甘心, 恐懼既表情再加上掹大左口, 我完全想像到佢地被生勾勾咬死痛死既情境。

但係喪屍被咬唔係應該會變異埋做喪屍?  如果佢食左個人咪無得變多個喪屍?

後來當我知道呢個問題既答案時候, 一切都已經唔再重要了。

無數既喪屍係到進食, 有一部份係到破壞阻住佢地既門, 但佢地都有一個目的…

 「佢地係咪去緊下面? 」 海晴驚訝咁問,

 「無錯, 我地要快d行, 我覺得佢地係離開緊火車站! 因為呢到已經冇活人! 」  我一邊講一邊拉佢地行,

海晴再係我後邊問, 「唔通只有火車站有喪屍, 下面仲係安全有活人? 係既話我地要快d通知佢地! 」

阿帆答 「冇用架, 呢到已經冇信號, 我覺得下面已經係同呢到一樣, 係一個死城。」

「噓──────────────」

帶頭既我已經行完第二條扶手電梯, 再落多條樓梯我地就會到行人天橋, 我示意叫佢地停一停講野。

本身如果由a出口出既話會係轉左行一條行人隧道, 但我地一開頭走個陣冇轉左而上左樓梯去地面。 如果照住行, 過左行人隧道就會係行心天橋, 而我地既地既扶手電梯就係接係行人天橋既右邊。

呢一刻我地哩埋係已經唔郁既扶手電梯後面, 偷睇行人天橋既情況。

天橋上面已經有喪屍。

火車站既喪屍同我地諗既一樣, 冇獵物就會去第到。

行人天橋話展唔展話短唔短, 要走既話都要5分鐘先行得完。 而出面遊走既喪屍都有好多下。

「喂點算好? 」

「前面就係我住既宿舍啦, 個到有鐵閘應該可以頂住佢地! 」 海晴提議道。

要跑過去...? 我地手無寸鐵, 點可能走得到... ?

「呯─────────────」

呢個時候上面傳黎一聲撞擊聲。

我地即刻望向上面, 見到既係一隻隻喪屍係到拍玻璃欄杆!

望上去既我地同喪屍四目交投, 佢地見到我地之後發出大聲既吼叫, 係發現獵物既叫聲!

「吼啊啊啊啊啊啊啊啊──────────────────────────!」

見到我地之後佢地更多瘋狂, 本來只有兩三隻喪屍頓時引黎十幾隻喪屍! 但睇落佢地並唔識跨欄, 如果唔係我地大獲。

「走啦仲望!」

我同身邊既兩位同伴講, 同時擰轉去行人天橋, 但係… 我地應該點行過去…?

阿帆周圍行開一陣, 返黎個陣又拎住個鐵垃圾桶。

「我最多只係搵到呢個, 都好過徒手推開喪屍。」

阿帆雙手拎住垃圾桶, 的確有野揸手係好d既, 我周圍望一望, 四圍只有汽水機同埋一部唔知咩既Canon機。

「去買幾罐汽水啦, 你地有冇八達通?」 實在諗唔到有咩可以做武器, 拎幾罐汽水至少有安全感d, 點都好過徒手掛。

「吓你想用汽水打喪屍…? 得唔得架…」

海晴o左嘴咁望住我, 雖然我都知咁係傻傻地, 但係我覺得點都好過依加衝去。

「快d啦無時間啦信我啦。」我實在廢事解釋, 阿帆已經開始幫我買緊, 幾聲響亮既砰砰聲係汽水機傳出黎。

阿帆將汽水拎比我地, 雖然聽落好低能, 但係呢個時候只要有野係手我地先有勇氣走向條橋。

可惜事實從來都係同我地諗既唔同。

「哐噹───────────────」

上面傳黎一聲響亮既玻璃碎裂聲, 身後傳黎一塊塊既玻璃跌落地既聲音。 我地三人下意識向後望一望…

「呯呯呯呯呯──────────────────────────」

「走啊!!!」 上面既喪屍越黎越多, 唔知係撞爆玻璃定點, 總之佢地已經打爛左塊玻璃, 十幾二十個既喪屍幾個幾個咁跌落地!

「吼啊啊啊啊啊啊啊啊──────────────────────────!」

差唔多二樓咁高咁跌落黎, 但係佢地完全無行動不便既傾向, 只係片刻既停傾, 佢地就爬起身向我地襲黎!

「屌衝啦!!」

阿帆帶頭就向行人天橋跑去, 我地都轉頭跟佢一齊跑, 5分鍾姐… 只要去到宿舍, 我地就會安全!
 

 

 
我大力咁chok下罐汽水, 之後打開佢就用力掟去行人天橋既遠方, 行人天橋入口近我地既喪屍已經向我地撲過黎, 但遠方既就被汽水吸引開, 一時之間我地爭取到一d時間。

阿帆帶頭行起, 雙手舉起垃圾筒就向撲向佢既一隻喪屍揮去, 一下將佢撞開。 其後再跑黎另一隻喪屍, 我見到即刻一腳踢去佢心口踢開佢。

「踏踏踏踏踏────────────────」

前方再跑黎三隻喪屍,身後仲有兩隻跟住跑黎 !

「屌! 我頂住左邊! 你搞右邊!」

阿帆都見到好多喪屍, 大叫完之後佢就沖上前, 用垃圾筒頂住左邊一隻喪屍, 希望佢拖得住!

聽完佢講之後, 我都立刻上前, 一個剪住金毛既男喪屍衝向阿帆, 我即刻扯住佢件衫, 用盡我最大力拉佢向後。

喪屍被我拉後左一兩步, 轉頭就向我撲黎!

行人天橋兩邊係欄杆, 而中間就有一條柱。

雖然我見到佢咁做, 但係佢既力氣比我想像中大好多, 一下我就被推向行人天橋既柱上面, 成口血帶住強烈既惡臭就向我咬過黎! 我一邊用力推頂住佢膞頭, 一邊盡量遠離佢既口。

「海晴! 救我呀海晴!」

呢個時候一隻好白既手拎住罐汽水打向喪屍既口, 總算將危機解除。 借住呢下我即刻烏低身, 雙手頂住佢心口, 推開佢之後就跑離開佢。

阿帆呢個時候已經變左同兩隻喪屍角緊力, 喪屍血紅既雙眼滴住血, 蒼白既臉孔有無數既青筋係上面, 兩個西裝友喪屍一邊想咬向阿帆, 一邊瘋狂推阿帆向天橋邊!

「幫…手…!」

阿帆一面咬實嘴唇一面出力頂住, 我見到即刻行去幫阿帆, 好在阿帆都有d肌肉, 睇落都算健碩, 睇黎做開運動既佢力量都唔細。

不過只係對人類黎講。

當你既對手係兩個唔要命既癲佬, 有理智既人點都會怕。

所以阿帆動搖左, 佢一邊頂住喪屍, 一邊退後。 被推到欄杆既佢上半身開始被推出天橋, 兩個喪屍既頭不斷想咬向佢。

「呀!!!!!」

呢個時候我終於跑到喪屍後面, 我用盡全力抆住其中一個喪屍既膞頭, 用力拉開佢離開阿帆, 但喪屍力量奇大, 我只能拉開少少。

突然喪屍擰轉面轉移佢既目標, 轉頭想咬我, 係拉佢個陣我已經不斷開始同自己講佢會擰轉面, 所以我仲反應得到, 我烏低身避開, 再踢佢背脊。

呢個時候藉住海晴既幫助, 阿帆都成功爭脫, 我地三人立即繼續向天橋方向走去。

跑左幾步, 前面再跑黎兩個喪屍, 一男一女, 望住佢地恐怖既面貌實在令人想走, 但逃生既路就只有呢條!

我揸住汽水, 一拳打向女喪屍個頭再推開佢, 阿帆都用垃圾筒推開男喪屍, 一有空隙海晴就跑左去前面, 而開左條路既我地立刻向前跑, 前面一個人影都冇, 睇黎喪屍仲未漫延到宿舍個邊 !

「前面無喪屍啦! 快d走啦!」 海晴帶住我地係天橋行, 到一個位就轉右, 前方又係另一條走廊。

「吼啊啊啊啊啊啊啊啊──────────────────────────!」

後面有無數既喪屍係到吼叫, 我已經唔知道有幾多追住我地, 我諗成個火車站既喪屍已經追緊我地, 但只要去到宿舍, 有鐵閘我地就會安全!

「踏踏踏踏踏踏──────────────────────────!」

我地三人係咁跑係咁跑, 出盡力咁想盡快到安全既地方, 經過左右邊既半島豪庭之後, 再過多一條直路就會到宿舍!

我個心跳得好快, 面同背脊都出左好多汗, 風係咁咁打向我塊面, 強烈既緊張感令我越黎越攰。

「吼啊啊啊啊啊啊啊啊──────────────────────────!」

後方傳黎幾聲跌撞聲, 應該係喪屍佢地跌低或者撞到野, 呢個時候我都無時候深究, 只能係咁向前跑!

短短半分鍾, 我地已經就快跑到宿舍!

可惜, 喪屍既速度被我地想像中要快, 可能係因為我地太攰所以跑得慢左!

 「吼啊啊啊啊啊啊啊啊啊啊啊啊啊啊啊──────────────────────────!」

喪屍既叫聲開始近到係正後邊! 我忍唔住回頭一睇, 見到一雙手正抓向係我身後既海晴!

我即刻大叫!

「小心呀!!」

海晴即刻轉頭一望, 但喪屍雙手快要捉到佢!

呢個時候我轉頭跑去海晴到, 一手拖住佢一手按低佢個頭, 岩岩好避開左喪屍既追擊!

「走!!」

我拖住海晴再跟住阿帆向前跑, 再跑多少少就會到達宿舍!

岩岩救海晴既時候我發現, 我地身後有大概十幾二十個喪屍! 我都已經唔知有幾多追緊我地!佢地不繼吼叫不繼想撲向我地到,到底點解人類會變成咁?

但好在同佢地相距仲有兩、三米, 我地應該夠時候走得到!

跑係前面既阿帆已經衝到宿舍既入口位置, 佢一個轉右就跑左去位於天橋右手邊既宿舍入口, 我地終於到啦!

「到啦到啦!」

我同海晴呢個時候都轉向右邊既入口, 宿舍入口有兩道鐵閘, 阿帆已經閂左右邊個道, 企係左邊舉高左垃圾桶!

「呢邊呀! 你地Dup低頭!」

海晴拉低左我, 我地頭上飛過左垃圾桶, 呯一聲撞向喪屍到, 為我地爭取左少少時間!

「呯─────────」

我地終於跑到入去宿舍, 終於到左安全既地方。
已有 0 人追稿