《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 深入宿舍
終於都入到宿舍！
「呯呯呯呯呯呯呯呯呯呯呯呯呯呯呯呯─────────」
「吼啊啊啊啊啊啊啊啊啊啊啊啊啊啊啊──────────────────────────！」
門外既喪屍撞向鐵閘， 不繼咁拍向鐵閘同伸手入去， 試圖捉我地。
我地望住出面癲曬既喪屍， 一雙雙血紅既眼睛好似想食左我地一樣， 我地慢慢咁退後， 確定佢地入唔到黎就轉頭向大樓行去。
兩道鐵閘中間有一個小小既警衛室， 我地入左鐵閘入面之後先可以抖一抖。
「呼…」
我地大家都鬆一口氣， 終於可以休息一下。
「海晴你住係呢到架？」
大樓入面漆黑一片， 唔知到底安唔安全。 所以如果海晴係住呢到宿舍， 我地可以係佢房到休息一晚， 聽日再行動。
海晴點點頭， 「係呀， 就係前面個到轉左上去。」 佢指向大樓入面。
「咁行啦， 鐵閘應該頂得住既， 我地入去搵下有冇野食先。」 阿帆講完就帶頭， 向前方大樓入面行去。
「入面係飯堂黎架， 但係依加都停左電， 上去我房到拎d武器先啦， 一陣先去睇下有冇野食啦。」 海晴睇黎好熟呢到， 咁都好既有人識路。
阿帆望向我， 我點點頭示意好， 反正依加我地都係兩手空空， 大樓入面唔知有冇危險， 上去宿舍如果安全既話都可以抖一抖同拎d野旁下身先。
「好， 咁點樣上去？」阿帆問海晴， 同時都警惕咁望住鐵閘個邊。
「呢到入去就係宿舍， 我住係5樓…」海晴有d尷尬咁講
5樓… 依加停曬電咪即係要行樓梯！？ 唔知樓梯個到同宿舍上面會唔會有喪屍， 如果有係咁窄既地方咪好危險？
我將我既疑慮講左出黎， 海晴一面無奈咁講， 「依加周圍都唔安全架啦， 無論我地去邊都要博一博架啦。」
阿帆轉過頭同我地講， 「我都同意呀晴咁講， 依加邊到都可能有喪屍， 但我覺得上去值得博一博多d。」
雖然我唔明點解上去會安全d， 但係佢地咁講我都只可以聽從。
「咁行啦， 如果有多喪屍就掉頭走， 我地慢慢潛行上去。」 阿帆帶頭行入左邊既宿舍大樓行入去。
我將電話既電筒快速咁照向成個大堂， 除左一個人都無之外都無咩可疑， 所有野都放得好整齊， 汽水機個d都無爛到， 睇黎呢到無喪屍入過黎。
海晴指向右手邊， 我照過去見到一條樓梯， 我揮揮手示意我地依加行過去。
我地行去樓梯到， 我抬起頭再照照上面， 視線內都見唔到任何人影都喪屍， 阿帆見到就慢慢咁一級一級行上去…
行上去個陣雖然只係短短幾分鍾， 但係之前既緊張感令到我覺得好似過左好耐咁。
終於我地到左5樓， 樓梯係走廊既盡頭， 轉右就係宿舍既房間， 走廊一片黑暗， 我地停係樓梯口回一回氣。
「好似都無咩危險， 你間房係邊到？ 」 我覺得前面都應該係安全，
走廊個邊好明顯睇得出係女生宿舍， 走廊同門口都報置左d女仔既野， 好似一d粉紅色既璧報咁。
海晴指一指走廊個邊， 我地就行去個邊， 走廊一片寂靜同黑暗， 電話既燈光只係可以照到兩、三米既範圍， 終於我地停左係一間房前面。
呢間房道門掛住左一個兔仔既門牌， 門上面仲掛左一個白板， 應該好似一塊比呢層宿舍既人互相溝通咁， 板上面有d人寫低生日快樂既字眼。
「生日快樂喎海晴， 你幾時生日呀？」
阿帆見到就問海晴， 睇黎海晴同宿舍既人關係都好好， 不過都係既佢都幾靚女， 人緣好都係好正常。
海晴呢個時候岩岩係褲袋搵到條鎖匙出黎， 佢一邊開門一邊答，
「多謝呀， 我前日生日。」
門一打開， 我地就跟住海晴行入佢間房， 入曬去就閂埋房門。
終於我地上到去入到宿舍， 暫時黎講亦都算安全。
「終於都安全啦。」
阿帆拎住頭先買黎旁身罐可樂， 一邊開一邊講。
我亦都由驚嚇之中回過神， 並開始視察四周環境。 宿舍好靜， 而且周圍好暗， 只係見到手臂範圍內既野。
突然我見到前面有樣野閃閃下係地下， 原來係阿帆開電話既電筒周圍係到照。
依個時候我突然覺得背後一涼， 我完全唔敢向後望， 因為我怕我向後望， 就會係死前添加一份恐懼 …
短短幾秒， 但係我既角度完全好似過左幾個鐘一樣。
突然， 我感覺到有野向我耳邊靠近， 跟住落黎就係一把女聲， 係邊個， 依把聲係， 好熟， 原來係海晴把聲！
跟住我已經眼前一黑。 而我聽到海晴講既果句野竟然係 …
「隨便坐啦你地， 我去拎少少野食先。」
講完海晴就行去書台旁邊既櫃到拎左d餅乾同水比我地， 阿帆就隨便坐係地上面。
原來所有野只係我太緊張… 睇黎岩岩火車站恐怖既經歷令到我精神極度繃緊， 好在依加都叫安全， 可以好好訓一覺。
房間入面有一陣清新既香味， 牆上貼左好多星星， 海晴住既呢間係一個單人房， 床係右邊書台係左邊， 而窗口就係我地既前面。 房入面好整齊， 同時亦都不失可愛既風格， 例如好多野都係粉紅色咁。
「我係得咁多喳， 食完就無啦。」 海晴比左d餅我地食， 之後佢就坐左係床上面同我地講。
「唔該曬。」
而我就坐係書台隔離張櫈到， 打開餅開始食。 岩岩係咁跑同被喪屍追實在令我覺得好肚餓同口渴， 好快就食曬d野食。
海晴得咁少食物， 睇黎長期留係到都無可能， 即使長期留係到係咪會有人黎救我地？ 由火車站到依加， 除左車上既乘客之外我地一個外人都見唔到， 有無其他生還者都係問題…
仲有權哥佢地有無事？ 商埸入面既火警鍾到底係權哥佢地整出黎， 定係喪屍亂咁撞撞到？ 睇權哥似乎係知道點做先安全， 如果佢係到我地就知應該點做。 我地就應該可以平安去到碼頭… 但點解佢會知碼頭係唯一出口…？ 太多太多既問題開始係我腦入面出黎。
反正呢d問題都唔係一時三刻有答案， 最重要係依加應該做咩先。
「咁我地今晚係到訓一晚先？ 聽日再落去其他樓層？」 我想知我地一陣既行動會係點， 所以提出同大家相談下先。
「係囉我地都攰啦， 訓醒先再落去啦。」 海晴坐係床上面一面眼訓樣， 一個女仔岩岩既跑咁耐攰都好應該既。
阿帆回應我地， 「我地洗唔洗搵個人看住門口先？ 其餘兩個訓咁樣？」
「其實唔洗既我覺得…」
我講到一半阿帆就打斷我， 但我真係覺得宿舍已經好安全， 無謂再訓到一半起身啦。
「安全d點都好既， 你地想訓個陣同我講啦， 我守第一更， 依加9點鍾， 我地每人訓5個鍾啦。」 講完阿帆就繼續食野， 而我都頂唔順， 就扒係書台到訓覺算。
好快我就進入夢鄉……
「依呀─────────────────────────」
訓到暈暈地個陣， 我聽到有人開門出左去， 我望向門口只係見到一片黑色， 應該係有人去廁所姐我諗， 於是我就繼續訓。
唔知訓左幾耐， 突然有人拍醒我。
「喂到你做看更啦， 3點啦到我訓啦。」
原來係阿帆叫我， 佢細細聲講示意我起身比佢坐， 咁我就行去門口個到挨係牆到坐。
海晴仲係床上面訓緊， 阿帆就扒左係張台到訓。
既然都無野做， 我就決定去搵下廁所去。
行左出房門， 我見到右邊走廊盡頭有個玻璃窗， 就行埋去睇下出面依加點。
個玻璃窗係對住行人天橋個邊， 由於太黑我差唔多咩都睇唔到， 但都見到依稀有d人影係到， 而人影已經佈滿左行人天橋…
睇黎喪屍被我地引離左火車站… 佢地應該會去黃埔既市中心位置行去… 到底我地點先可以走得到… 到底有無人會黎救我地…？ 到底…
……
咔喀喀喀 ……
到底幾時先唔洗咁緊張咁過生活？… 我地可唔可以安全去到碼頭呢…
咔喀喀喀 ……
係咩聲 … ？
啪！
突然大樓入面傳黎一聲巨大既撞擊聲！ 但我好肯定唔係呢層發出！ 唔通宿舍入面仲有喪屍？！
我即刻快步行返去房入面， 緊張咁打開房門見到阿帆起左身， 但海晴仲訓緊。
「發生咩事？ 你見到d咩？」 阿帆仲未訓著， 見到我岩岩返黎就追問我。
「我都係岩岩出去行下就聽到， 唔通鐵閘被喪屍打爆左？！ 我地走定留係到？」
「無可能… 出面個鐵閘好硬淨， 憑喪屍無可能推得爛鐵閘… 唔通…」
「唔通宿舍入面仲有喪屍？ 佢地聽到我地d聲所以上緊黎？」 我即刻行去床到拍醒海晴， 睇黎再留係呢到都唔安全。
「唔…? 」
睇個樣佢都未訓醒， 我同佢解釋幾句就同阿帆睇下有咩可以拎黎做武器， 準備離開呢到。
「喂我搵到把較剪， 你岩唔岩洗？」 我仲係到搵緊有咩岩用，
「海晴你有冇d止痛藥個d， 你拎個袋帶齊佢啦」 海晴哦左一聲就起身拎野， 阿帆同時再問佢，
「你有冇繩呀？ 無既話拎d床單頂住先」
我見佢起左身就問佢， 海晴只係擰頭， 表示佢無繩。 跟住就拎床單。
我地手忙腳亂咁執野， 好快就搞掂左， 準備行去宿舍其他地方， 依加係凌晨3點半。
我地慢慢咁打開門， 行出漆黑一片既走廊。 我地用電話慢慢照向樓梯， 確定安全就行過去。
「喂咁我地依加上去定落去？」 我回頭問下阿帆， 阿帆指指上面，
「我記得d聲係係上面傳過黎， 我地上樓睇去， 如果多喪屍就走。」 我點點頭示意明白， 就開始跟住阿帆行上去。
突然有隻手捉住我， 係海晴拖停我， 佢細細聲咁講，
「喂你地停一停先… 你地聽唔到聽有聲？」
我地停係5樓上6樓既樓梯中間， 屏息以待咁聽下四周…
一片寂靜──────
「無聲喎。」 阿帆回頭答我地， 「繼續行啦， 小心。」
電話繼續向上照， 見到既係6樓既走廊， 我地再繼續行上去。
一級一級咁我地行上去， 四周黑麻麻只有電話既光， 我企係阿帆後面同海晴前面慢慢咁移動。
「兵... 砰棚！」
呢個時候黑麻麻既大樓入面傳黎一聲跌野聲， 雖然唔大聲但都響徹成座大樓， 我即刻示意佢地搵地方避一避先， 同時我向聲音來源望一望， 但望到只係一片漆黑。 聲音只係出現左一次， 再無動靜我唯有行上少少去睇下。
阿帆對我點點頭， 示意聲音係係上面傳黎。
「小心d… 」
海晴細細聲咁講， 我慢慢行去上面樓梯既入口個到， 拎出電話黎照明。
阿帆跟係我後面， 我地慢慢行入去， 電話燈照向6樓， 我地慢慢咁行上去…
燈光慢慢轉向走廊個邊， 我緊張到心跳加速， 手心出汗， 我地會唔會已經唔經意入左喪屍既巢穴？
「喂───────────────！」
走廊個邊傳黎一聲叫聲？
「哇屌！」
身後既阿帆嚇到屌左一聲， 我將電話照向走廊， 見到有幾個人係盡頭個邊。
「你係邊個？！」
對面既人即刻用電筒照過黎， 搞到我睇唔到佢地係咩人， 我只好用手臂擋一擋光。
阿帆大叫返過去， 「我地唔係喪屍呀， 我地住係宿舍架！ 你又係咩人呀？」
我聽到對面既人係到講左幾句， 之後終於唔再照住我地， 我都唔再照住佢地。
「好你地過黎先再講， 我地呢到搵到間房。」
對面有個另一把男聲傳過黎， 我望向阿帆同海晴， 佢地只係同我對望， 睇落唔知點做， 既然係咁不如行過去， 搵多幾個人一齊走佬既機會會大d。
我地三個行過去， 佢地已經入左房入面。
我地入左房， 佢地已經一排住係床上面， 佢地有三個人， 兩男一女， 睇落年齡應該都係同我地差唔多， 佢地都係呢到既大學生。
佢地將個電筒放係地上面照住天花， 等停左電既宿舍都有少少光比我地用。 有光之後我就開始睇下對面既人係咩料。
左手邊既男仔染左少少金頭髮， 前額留左一pat斜陰， 著住t-shirt同牛仔褲， 睇落好似好mk咁， 並唔係善男信女咁既樣， 有著好冷淡既表情。
另一個男仔係比較斯文d既打扮， 不過佢身材明顯比其餘兩位高大， 佢有清爽既短髮加上著住格仔慍衫同短褲， 睇落比較斯文陽光同友善溫柔。
最後坐中間既女仔留住到膊頭既短髮， 對眼好大， 身材好好同成個人好修長， 絕對係可以做instagram既女神咁樣，睇落似係個大方又好友善既女仔。
係我地對望既時候， 個好mk既男仔打開話題， 佢一雙眼望實我地，
「你地都係走唔切既人？」
「走唔切既人？ 你咩意思？」 阿帆回應佢， 我地三人同時都坐左係地下， 另一個男仔就開始出聲，
「我地自我介紹先啦， 我叫許廷朗， 呢位係...」 呢個男仔友善咁同我地介紹起上黎。
「你地叫我家瑜得架啦」 中間個女仔微笑揮揮手同我地打招呼， 之後大家都望去MK仔個到， 佢都係一面冷淡， 只係講左句，
「我叫呀奇。」
呀朗就笑笑口咁話， 「佢係咁樣架你地唔好介意」
「唔緊要啦， 哈哈」 阿帆回應佢地， 「我叫做阿帆， 呢位係海晴同阿傑」 我同海晴點點頭say個hi， 跟住就開始傾大家既問題。
「既然你地唔係走唔切， 咁你地邊到黎?」 呀奇再次問我地，
「我地係係火車站走出黎， 本來我地搭緊去紅磡， 點知車上面突然有人變左做喪屍， 跟住又有架西鐵帶左好多喪屍黎， 我地走下走下就走到黎呢到。」 阿帆將我地既經歷簡短咁講比佢地知， 回答左呀奇既問題， 之後就到我問， 我腦海中有好多問題想搞清楚， 到底...
「你頭先話咩走唔切既人 ...... 係咩意思？」
我忍唔住問佢地呢個問題， 咩野走唔切？ 唔同佢地一早知道有喪屍出黎所以有機會走先？ 咁點解我地唔知？
「你地係外面入黎？ 點解會咁樣...」 呀朗一面驚訝咁自言自語， 係佢隔離既呀瑜都加入一齊自言自語，
「係囉... 無可能可以再入黎架應該...」
「喂你地講咩無可能入黎？ 你地係咪知到底發生咩事？」 見佢地唔答我， 我忍唔住再追問佢地， 唔通呢到已經被喪屍入侵曬？ 所以無可能再入到黎？
「出面依加係咩情況？」 係佢地自言自語個陣， 呀奇並無回答我既問題， 反而再問我地問題。
「喂你做咩唔答我姐？ 到底你地係咪知發生咩事？」 見佢再無答我既問題， 係咁係到回避， 一直好緊張既我忍唔住企起身發脾氣大聲問佢，
呀帆拉低返我， 「唔好咁燥啦， 佢地諗緊點答你姐，」
呀帆再望向呀奇講， 「我地頭先被好多喪屍追住， 係火車站好唔容易先走到黎呢到， 依加出面周圍都係喪屍， 我諗佢地已經開始佈滿係宿舍既四周。」
呀奇點點頭， 呢個時候家瑜同呀朗都傾完計， 佢地望住我地， 我都慢慢咁坐返低， 準備聽佢地講到底發生咩事。
海晴呢個時候發問， 「咁呢到係咪只係得你地走唔切？ 仲有冇其他人係到？」
佢地三人面面相覷， 你眼望我眼咁。 終於呀朗望住我地， 意味深長咁慢慢解釋比我地聽。
「聽你地咁講... 睇黎你地無收到個個信息...」