《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 屍殘末路 上

「點呀！ 啞咗呀！ 講野啦！」

「喂…… 喪屍無人知道佢哋嘅集性， 可能佢哋喺陳sir查完之後上咗去呢？」 海晴夾喺二人話題中間， 佢嘅原意應該喺希望大家和平相處吧。

但依加好明顯唔係一個好時機。

海晴就好像一匹純白無邪嘅小山羊一樣， 站喺低頭嘅獵鷹與怒不可遏嘅豹。

軒少轉過頭， 面上帶著隱約因憤怒而股起的青筋， 同樣地滲透汗水嘅瀏海遮掩住少許眼睛， 但無阻佢眼神中嘅怒意。





「收聲。」 軒少冷漠地說出呢句， 淡然望向嘅人卻唔係海晴， 而係我。

我趕緊拉返海晴返黎， 喺佢耳邊細聲講， 「等佢哋自己解決， 唔好出聲。」

「我唔知上面有……」

「唔知！？」

軒少正想一拳打向陳晉時， 權哥出手拉實已揮在空中的拳。





「軒！ 停手！」

軒少狠狠地轉頭， 對權哥怒目而視， 權哥再度開口， 「睇清楚依加處境！ 冷靜落黎！」

「哼！」 軒少發作般推開陳晉， 陳晉拍拍衣領， 「我唔知道上面有感染者， 上一次檢查嘅時候根本無人影。」

「你信又好唔信又好， 希望你唔好再亂黎。」

軒少瞪大雙眼， 眼神就似在問， 你可以將我點？ 你想挑戰我？





陳晉摸一摸腰間後方嘅手槍， 同時揚起衣衫， 原來佢把槍一直藏喺身後。 依加佢無疑就喺向軒少施壓， 睇黎軒少一路已黎嘅行為終於踩到佢底線。

就係唔可以危害到生命！

陳晉見軒少沉默， 續說， 「大家抖好未， 我哋要繼續出發。」

望向前方昏暗嘅走廊， 渺無一人。

「呢到過去仲要幾耐？」 我問向陳晉。

「通道大概要行五分鐘， 之後就到Block A。」

「條通道大概係點行法？ 一條直路定係點？」 昏暗環境下我睇唔清前方嘅路， 只係見到一無盡頭。

「唔係直路， 好難講， 跟實我。 我同呀權帶頭， 你哋跟返隊型， 我哋行。」





「放輕腳步， 前方可能會有感染者。」

「小心。」 我向前方嘅海晴講， 佢聽到聲音後全身抖震一下， 然後回頭。 我定神一望， 先發現海晴此時仍然未定驚一樣， 被喪屍追殺以及軒少嚴厲斥責後， 我看佢心情仲未平伏， 猶如一隻受驚的小白羊一樣， 眼神滲透著驚慌。

佢一面著急住， 抬起疲倦嘅雙眼看著我， 「我… 我唔知應該點做……」

我輕輕拍一拍海晴嘅肩膀， 溫柔地安撫佢， 「無事架， 我會喺你後面， 行啦。」

佢點點頭， 我搭住佢雙肩就推住佢行， 好似小時候一樣。

我哋跟住陳晉小心翼翼咁邊蹲邊爬地靠牆壁向前走， 然後躲在一個外面難以發覺的轉角位。

陳晉舉起手， 我哋就跟隨佢停下。 佢回頭面向我們， 做出一個口型……





「有……」

「呃啊啊啊啊啊啊！！」

！！？

一個斷咗半隻左手嘅女喪屍突然喺轉角位跳出黎！ 女喪屍身穿便服， 流住血嘅雙眼已經緊緊盯住我哋！

「呃啊啊啊啊啊！！」

「睇住呀！」 「仆街！」 口中嘅警告已來不及， 喪屍動作好快， 轉眼看似就要擒下陳晉！

可幸係權哥更快！

「呯──」





女喪屍被權哥一腳踢向心口， 倉促哋跌向後方！

「呃啊啊！！！」

「呃啊啊啊啊啊！！！！」 叫聲驀然四處響起， 但並唔屬於眼前嘅喪屍……

「快走！ 我有唔好嘅預感！」 我低聲叫道， 馬上拉起海晴走過轉角位！

前方只有一條路， 轉過轉角位時， 海晴打開電筒。

數十對血紅雙眸頓時閃現！

前方嘅喪屍至少有十幾個身影！ 數目遠遠超越我哋， 多得令我唔敢去招惹！ 佢哋雖然分散企喺前方， 但走廊太窄， 看似就已經阻塞同迫滿通道！





數十張詭異面孔轉頭望來！

「呃啊啊啊啊啊啊啊啊啊啊！！！！！！！」

「妖！ 嚇死我！」 軒少低聲暗罵， 同時跟上我哋腳步。

「踏踏踏踏踏踏踏踏踏──────────────」

「黎緊啦！ 走！」 軒少走上我同海晴前方， 跟上權哥一同向無盡昏暗嘅走廊奔去！

剛才見到嘅喪屍身影忽然浮上眼前， 化為無數血紅鬼影。 前面咁多喪屍， 到底有無第二條路可以行？

我回頭望向身後， 防火門依然傳出啪啪呯呯嘅聲音。

只有一條路可以走…… 望著前方嘅身影開始走去， 我內心不甘再次發出疑問。