[惡搞無極限] 就係咁，我同幾個豬朋上左大陸獵金: ９２　今日，我係阿文

眼前既境像，唔止阿俊嚇左一跳，就連我，阿輝同阿倫，以及在場咁多個人都呆晒，除左一個人，勞斯萊斯。 

ＭＡＮ姐，佢係人群中出現，今日既佢唔再係果日我見度既男性打扮，佢一頭烏黑亮麗既長髮，我諗應該係假髮，頭髮邊會生得咁快。 臉上面上左淡淡既妝，著上左一條純白色既長裙，著住一對淺粉綉花鞋。 

今日既佢，活脫脫係一個清純既女仔，佢今日係阿文，唔係ＭＡＮ姐。 

所有人見到佢咁樣，都嚇到呆左，佢慢慢一步又一步咁走到勞斯萊斯面前，就話：「記唔記得今日係咩日子？」 

勞斯萊斯答：「今日係我黎到呢到第五年既日子。」 





ＭＡＮ姐點一點頭，「嗯，而且係我地相識既第五年。」 

聽到ＭＡＮ姐咁講，我先醒起勞斯萊斯講過話佢第一日黎到呢度果陣，見到既就係ＭＡＮ姐。 

「果一日，我就係著緊呢套衫，呢對鞋，呢個髮型，同呢一個妝。」ＭＡＮ姐微笑咁望住勞斯萊斯，好似回憶緊果一日咁再講：「今日，我係阿文。」 

睇黎ＭＡＮ姐好重視今日，試問有幾多日會咁悉心打扮成第一日相識時所見到既自己，然後係五年之後出現返自己既面前。 

但係，當我望住勞斯萊斯，佢一臉無動於衷，佢地兩人個對比，就似係一個冀盼著，但一個卻冷血得絕情……