[惡搞無極限] 就係咁，我同幾個豬朋上左大陸獵金: １６５　阿妹的回憶（２）

每晚我都會攬住依唷，同佢傾計，而媽媽就會係旁邊不停咁摸我個頭，整理我既頭髮。

「快Ｄ訓拿。」媽媽話。

「唔制，我要同依唷傾多陣計先。」我扭計咁話。

「再唔訓，聽日一早爸爸黎見妳唔知醒就比佢鬧架拿。」我聽到媽媽咁講，成個人彈起撲左落佢度，「真係架！？爸爸聽日會返黎啊！？」

「係啊，爸爸打過電話返黎話比媽媽知啊。」





「點解爸爸打返黎妳唔同我講。」

「妳果陣訓左。」

「叫醒我嘛！！！」我亂打我媽媽。

「妳睇妳，一聽到爸爸返黎，就扔左依唷埋一邊。」媽媽指住跌左係床邊既依唷話。

而我就即刻飛奔左落床，勁快咁執返依唷返上床後就講：「依唷，快Ｄ訓，聽日爸爸返黎。」





「傻瓜。」媽媽講完呢兩個字後，鍚左我額頭一啖。

而第二日，我好快就起左身，衝左出屋企門口等爸爸返黎，而媽媽同平時一樣，整緊佢既野。

等左五分鐘……半個鐘……一個鐘……其實果陣我點知我等左幾耐，只不過當一個人有目的等緊一樣野果陣，就算係一秒都會覺得好耐。

而當我望到好遠有個好熟悉既身影行緊果黎果陣，我就大叫：「爸爸返黎拿！」

媽媽都停左手頭上做緊既野，望一望前方。





係，真係爸爸，而佢旁邊仲跟左兩個人，一個好老下，一個就應該同爸爸差唔多年齡。