[惡搞無極限] 就係咁，我同幾個豬朋上左大陸獵金: １６６　阿妹的回憶（３）

就係我跑向爸爸果陣，先只發現原來佢身邊有兩個人，我一下子停住左腳步望住爸爸，但係又因為好耐無見過爸爸，最後後者既情感蓋過所有，我都係衝左去爸爸度飛撲左過去。

「爸爸！」我仲細，只可以抱住爸爸隻腳，但係爸爸就將我抱起左，用佢滿臉鬍渣既面磨我塊面。

「好癢啊。」我一路笑一路講。

「可兒有無聽媽媽話先？」爸爸問，可兒係我既名。

「有啊。」我點住頭，然後望一望身邊果兩個人，再係爸爸耳邊輕身咁問：「爸爸，佢地邊個黎架？」





爸爸笑左幾聲之後，就話：「呢個係我朋友，妳叫佢方叔叔啦。」我望一望爸爸所講果個男人，佢有一個大肚腩，好肥，仲成面鬍鬚，「方叔叔。」我好聽爸爸話咁叫左佢一聲。

「乖。」方叔叔摸一摸我個頭。

而爸爸再抱住我面向老Ｄ果一個，就話：「呢個係妳爺爺啊。」我聽完爸爸講左之後，問佢：「咩野係爺爺啊？」

佢地三個都大笑，然後爸爸就話：「爺爺，就係爸爸既爸爸囉。」

我點一點頭，然後叫：「爺爺。」呢次就係我第一次見爺爺。





我再望一望爺爺，佢拎住一個好大既箱，我就問：「爺爺，果Ｄ咩黎既。」

「呢Ｄ？」爺爺笑一笑話：「如果妳聽話既話，就係比妳架。」點解Ｄ大人好鐘意用呢招叫人聽話既。

行到屋企前面，爸爸放低左我，去到媽媽前面，錫左媽媽一啖後話：「辛苦妳拿。」

「辛苦你先真，咁遠都要走入黎，快Ｄ入黎坐啦，阿爸，您都入黎啦。」媽媽話。

我地屋企從來都未試過有咁多人係度架。