[惡搞無極限] 就係咁，我同幾個豬朋上左大陸獵金: ２０２　救唔到

方叔叔話入去先講，但其實行入去既路程都有成十五分鐘，因為佢住既地方真係好大，係大得好跨張下。

一路行，都有Ｄ著住西裝既人行過黎，而方叔叔就叫左幾個人去收拾頭先門口既殘局，其他人，就好似保護住我地咁行。

睇到呢個形勢，心諗好彩頭先方叔叔咁岩出黎見我地，唔係我地都唔知點樣入黎。

行既途中，見到方叔叔既神情係百感交集，阿妹就係佢身邊扶佢，而我，就跟係佢後面，諗耿頭先方叔叔既說話。

佢對我地兩兄妹唔住，唔通係同阿爸既死有關？





阿欣佢好出奇咁好靜係我身邊，可能佢都意識到，而家應該要認真。

「阿賢……」佢好認真咁問我。

「咩事？妳驚？」我問佢。

佢搖左搖頭話：「……我地一陣會有Ｄ咩野玩架？好緊張啊。」

……我收返我話佢充認真既說話。





終於行到入一間大屋入面，我地係一個好撚大既客廳坐住，然後有好多類似工人既人行過黎招呼我地。

執好茶，放低左Ｄ茶點，方叔叔就叫佢地避席，而佢，又好凝重咁道歉：「對唔住。」

佢又入黎到而家，已經講左好多次對唔住，方叔叔望一望我同阿妹，然後話：「當年我救唔到你阿爸，如果救到，你地兩個就唔駛好似而家咁。」