[惡搞無極限] 就係咁，我同幾個豬朋上左大陸獵金: ２１９　舅父殺到

人件事比方瀡講到好神秘咁，我地咁幾個到靜晒等緊佢既偉論，而佢又望住我地幾個咁認真既野，笑左出黎。

「點解笑？」阿妹好認真咁問佢。

「唔好意思，我次次見到Ｄ人咁認真望住我就想笑。」方瀡答左佢後，就繼續講佢查出黎既野：「其實你舅父係呢幾年黎，只要一返黎就會去搵一個男人，當然每次都只係食個飯吹陣水，但係佢就算幾忙都好，都一定會搵佢。」

「竟然？」我問，而後面個阿輝就話：「咩阿賢你舅父係大陸收埋個男人咁搞笑。」

我聽到佢咁講只係無奈左一下，無理到佢繼續聽方瀡講野。





「之後我查到呢個男人同當年既案有Ｄ關係，只不過呢個人都好醒目，而且佢Ｄ野都好難查，所以到而家都只係有呢Ｄ線索。」方瀡將個檔案合上後放返上架，「不過，我覺得單案就快搞店。」

我聽到佢咁講後，問佢：「點解無啦啦又咁講呢？」

方瀡好得意咁笑左笑話：「查案既直覺。」

佢呢一句聽到我一頭無緒。

聽完佢講左阿爸Ｄ野後，令我好想知道成件事既來龍去脈，阿妹佢更甚，因為佢一直都想幫阿爸同佢媽媽報仇，但係報仇又談何容易，而且個目標係碇司令呢條變態佬，我擔心阿妹會有事仲多。





我地之後一行人返左去方叔叔度，一踏入去，方瀡就話：「睇黎今日又有貴賓，而且應該係同你地有關既人。」

又係呢Ｄ令人一頭無緒既說話。

我地慢慢行到去大屋到，打開門，見到一個人坐左係度同方叔叔佢傾到大笑起黎，而呢個笑聲……咁熟既？

我再望真Ｄ……「舅父！？」

舅父佢聽到我叫左呢一聲後望住我，係用一個今次仲捉你唔到既眼神望住我。